आईफोन फोल्ड प्रोटोटाइप परीक्षण चरणमा प्रवेश गरेको रिपोर्टको खुलासा

काठमाडौं ।

लामो समयदेखि चर्चामा रहेको फोल्डेबल आईफोन अर्को वर्ष लन्च हुने अपेक्षा गरिएको छ। यसै क्रममा डिजिटाईम्सको नयाँ रिपोर्टले यो डिभाइस गत महिना आफ्नो प्रोटोटाइप परीक्षण चरणमा प्रवेश गरेको सुझाव दिएको छ। आपूर्ति श्रृंखला स्रोतहरूबाट प्राप्त जानकारीको आधारमा, एप्पलसँग यस अघिदेखि नै आफ्नो पहिलो फोल्डेबल फोनको फङ्गसनिङ्ग (कार्यरत) प्रोटोटाइप रहेको उल्लेख गरिएको छ।

प्रोटोटाइप परीक्षण चरण यस वर्षको अन्त्यसम्ममा समाप्त हुने अपेक्षा गरिएको छ। त्यसपछि, डिभाइस इन्जिनियरिङ भेरिफिकेसन टेस्ट (ईभीटी) चरणमा प्रवेश गर्ने जनाइएको छ। साथै यदि सबै कुरा योजना अनुसार भएको खण्डमा सन् २०२६ को सेप्टेम्बर महिनामा आईफोन १८ सिरिजसँगै यो डिभाइस पनि घोषणा भएको देखिने उल्लेख गरिएको छ।

त्यसैगरी नयाँ रिपोर्टले उत्पादन कठिनाइ र कमजोर उपभोक्ता मागको कारण एप्पलले आफ्नो फोल्डेबल आईप्याडको विकास रोकेको उल्लेख गरेको छ।

पछिल्ला अफवाहहरूका अनुसार, फोल्डेबल आईफोनमा सामसङले बनाएको ७.८ इन्चको मुख्य ओएलईडी डिस्प्ले समावेश गरिने बताइएको छ जसमा अन्डर–डिस्प्ले क्यामरा र साइड–माउन्टेड टच आईडी स्क्यानर हुनेछ। त्यसैगरी डिभाइसमा अब फेस आईडी समावेश नगरिने भएको छ। रिपोर्ट अनुसार डिभाइसमा “अलमोस्ट भिजिबल” क्रिज हुनेछ र फोल्ड गर्दा सम्पूर्ण डिभाइस अत्यन्तै स्लिम (पातलो) लगभग ९–९.५ एमएम हुने जनाइएको छ।

एप्पलले टाइटेनियम अलोय चेसिस र लिक्विड मेटल हिञ्ज (तरल धातुको कब्जा) प्रयोग गर्ने अपेक्षा गरिएको छ जसले फोल्डेबलको लागि अतुलनीय टिकाउपन प्रदान गर्दछ। डिभाइसको सुरुवाती मूल्य २,१०० अमेरिकी डलर देखि २,३०० अमेरिकी डलर दायरामा हुने अफवाहहरू रहेको हुनाले हामी सबैले अपेक्षा गरे जस्तै यो डिभाइसको मूल्य सस्तो नहुने जीएसएमएरिनाले रिपोर्ट गरेको छ।