२.४ अर्ब डलरमा बेलायती सेमिकन्डक्टर कम्पनी अल्फावेभ किन्दै क्वालकम

काठमाडौं ।

अमेरिकी चिप निर्माता क्वालकमले सोमबार बेलायती सेमिकन्डक्टर कम्पनी अल्फावेभ खरिद गर्न करिब २.४ अर्ब डलरको सम्झौता गरेको छ। यो सम्झौता कम्पनीको कृत्रिम बुद्धिमत्ता (एआई) प्रविधि सुदृढ गर्न गरिएको प्रयासको हिस्सा हो।

अल्फावेभका सेयरधनीहरूले प्रति सेयर १८३ पेन्स पाउनेछन्, जुन क्वालकमले कम्पनीमा रुचि देखाउने घोषणा गर्नु अघि रहेको मूल्यभन्दा झण्डै ९६ प्रतिशतले बढी हो। सोमबार लन्डनको सुरुवाती कारोबारमा अल्फावेभ को सेयर मूल्य २२ प्रतिशतले उकालो लागेर प्रस्तावित मूल्यभन्दा थोरै तल पुगेको थियो।

रोयटर्सका अनुसार अमेरिकामा आधारित कम्पनीहरूले बेलायतमा रहेका सम्पत्तिहरू अधिग्रहण गर्ने क्रम बढाएका छन्, जहाँ तुलनात्मक रूपमा मूल्याङ्कन कमजोर र वृद्धिदर सुस्त देखिएको छ।

अल्फावेभले डाटा सेन्टर, नेटवर्किङ र स्टोरेजका लागि सेमिकन्डक्टर प्रविधि डिजाइन तथा लाइसेन्स दिने काम गर्छ। कम्पनीको ‘सेर्डेस’ प्रविधिका लागि क्वालकम र सफ्टब्याङ्क स्वामित्वमा रहेको चिप प्रविधि प्रदायक आर्मले अप्रिलको सुरुवातमै अधिग्रहणमा रुचि देखाएका थिए।

सेर्डेस प्रविधिले चिपहरूद्वारा डाटा प्रशोधनको गति निर्धारण गर्छ — जुन एआई विकासका लागि अत्यन्त महत्त्वपूर्ण छ — र यही प्रविधि ब्रोडकम र मार्भेल टेक्नोलोजीजस्ता कम्पनीहरूको अर्बौं डलरको विशेष चिप व्यवसायको आधार बनेको छ।

आर्मले अल्फावेभसँग प्रारम्भिक छलफलपछि पछि हटेको कुरा रोयटर्सले अप्रिलमा स्रोतहरूको हवाला दिँदै विशेष रूपमा जनाएको थियो। क्वालकमले बेलायतको अधिग्रहण नियामकबाट प्रस्ताव पेस गर्न समय सीमा पटक–पटक लम्ब्याउँदै दुईवटा वैकल्पिक सेयर-आधारित प्रस्ताव पनि पेश गरेको थियो।

अल्फावेभले नगद प्रस्तावका सर्तहरू उचित र न्यायसंगत रहेको बताउँदै आफ्ना सेयरधनीहरूलाई यो प्रस्ताव सर्वसम्मत रूपमा सिफारिस गर्ने जनाएको छ।

साथै अल्फावेभले चिनियाँ लगानी कम्पनी वाइज रोड क्यापिटलसँगको संयुक्त उद्यम वाइजवेभमा रहेको आफ्नो सेयर पनि सोमबारका दिन त्यहाँका अवस्थित सरकारी सेयरधनीहरूलाई बिक्री गरी फिर्ता लिएको जनाएको छ।