काठमाडौं ।
अमेजनले हालै गरेको एउटा श्रृङ्खलाबद्ध घोषणामा यसको गोदामका रोबोट, डेलिभरी कर्मचारी र व्यापक गोदाम प्रणाली सबैले एआईको प्रयोगबाट फाइदा उठाउने देखाएको छ जसले सामानहरू छिटो ग्राहकको ढोकासम्म पुर्याउन सहयोग गर्नेछ।
कम्पनीले आफ्नो ल्याब१२६ डिभाइस इकाइमा नयाँ समूह गठन गर्ने जनाएको छ, जुन यस्तो गोदाम रोबोटहरू विकास गर्न केन्द्रित हुनेछ, जसले एउटै आदेशमा धेरै काम गर्न सक्नेछन्। हालका रोबोटहरू प्रायः एकल कार्यका लागि मात्र बनाइएका हुन्छन्।
अमेजनका अनुसार, “एजेन्टिक एआई” प्रयोग गरेर बनाइने ती रोबोटहरूले ट्रेलरहरू अनलोड गर्नेदेखि लिएर मर्मतका लागि आवश्यक पार्टहरू निकाल्ने कामसम्म गर्न सक्ने रोयटर्सले उल्लेख गरेको छ।
“ग्राहकका लागि यो छिटो डेलिभरी हो,” ल्याब१२६ का प्रमुख र रोबोटिक्स वैज्ञानिक येश दत्तात्रेयले सिलिकन भ्यालीमा आयोजित कार्यक्रमको क्रममा भने। रोबोटहरू चाडपर्वको समयजस्तो व्यस्त बेलामा, साँघुरा स्थानहरूमा भारी वस्तुहरू उठाउन जस्ता काममा विशेष उपयोगी हुने उनले बताए।
नयाँ एआई प्रणालीले कम्पनीलाई फोहोर न्यूनीकरण र कार्बन उत्सर्जन घटाउन पनि मद्दत गर्ने अमेजनले बताएको छ।
एजेन्टिक एआई हाल प्रविधिको एक चासोको क्षेत्र बनेको छ, जसमा सफ्टवेयरले प्रयोगकर्ताको थप आदेश बिना नै निर्णय लिन र कार्यान्वयन गर्न सक्ने वाचा गरिएको छ। यस्तो सफ्टवेयरले समय तालिका मिलाउनेजस्ता दैनन्दिन कामहरू स्वचालित बनाउन मद्दत गर्छ।
“हामी यस्ता प्रणालीहरू बनाउँदैछौं जसले प्राकृतिक भाषाका आदेशहरू सुन्न, बुझ्न र त्यसअनुसार काम गर्न सक्छन्, जसले गोदामका रोबोटहरूलाई लचिलो र बहुप्रतिभाशाली सहायक बनाउँछ,” अमेजनले कार्यक्रमअघि दिएको विज्ञप्तिमा भनेको छ।
दत्तात्रेयका अनुसार ती रोबोटहरू कस्ता देखिने, कति संख्यामा प्रयोगमा ल्याइने वा कहिले कार्यान्वयन गरिने भन्ने निर्णय अझै हुन बाँकी छ।
प्रकाशित: २३ जेष्ठ २०८२, शुक्रबार
