स्पेनमा ६५,००० भन्दा बढी होलिडे रेन्टल लिस्टिङ प्लेटफर्मबाट हटाउन एयरबीएनबीलाई आदेश

काठमाडौं ।

स्पेनको उपभोक्ता अधिकार मन्त्रालयले सोमबार एयरबीएनबीलाई ६५,००० भन्दा बढी छुट्टी भाडाका सूचीहरू आफ्नो प्लेटफर्मबाट हटाउन आदेश दिएको जनाएको छ। मन्त्रालयका अनुसार यी सूचीहरू विद्यमान नियमहरू विपरीत थिए।

स्पेन सरकारले नगरपालिकाहरू र प्रादेशिक निकायहरूसँग मिलेर एयरबीएनबी र बुकिङ डटकम जस्ता वेबसाइटमार्फत गरिने पर्यटन भाडा सेवाहरूमा कडाइ गर्दै आएको छ।

धेरै स्पेनी नागरिकहरूका अनुसार यस्ता भाडा सेवाले अत्यधिक पर्यटक आकर्षण गराई घरजग्गा अभाव सिर्जना गरिरहेका छन् र स्थानीय बासिन्दाहरूका लागि घर भाडामा लिन गाह्रो बनाइरहेका छन्।

मन्त्रालयले जनाए अनुसार हटाइने अधिकांश सूचीमा अनुमतिपत्र नम्बर उल्लेख गरिएको थिएन भने केहीमा मालिक व्यक्ति वा कम्पनी के थिए भन्ने स्पष्ट गरिएको थिएन। एयरबीएनबीका प्रवक्ताले यसबारे टिप्पणीका लागि गरिएको अनुरोधमा तुरुन्तै प्रतिक्रिया जनाएका छैनन्।

उपभोक्ता मन्त्री पाब्लो बुस्टिनदुयीले आफ्नो लक्ष्य होलिडे रेन्टल क्षेत्रमा रहेको “नियन्त्रणको अभाव” र “अवैधानिकता” अन्त्य गर्नु रहेको बताउँदै आवासमा पहुँच सहज बनाउने र उपभोक्ताको अधिकार संरक्षण गर्ने बताएका छन्।

बार्सिलोना नगरप्रमुख जाउमे कोलबोनीले गत वर्ष जुन महिनामा सन् २०२८ सम्ममा पर्यटन भाडामा पूर्ण प्रतिबन्ध लगाउने आदेश दिँदै हालसम्मको सबैभन्दा कडा कदम चालेका थिए।