बालबालिकालाई लत लगाउने फिचरहरू अवैध रूपमा प्रयोग गरेको भन्दै फ्लोरिडामा स्न्यापमाथि मुद्दा

काठमाडौं ।

फ्लोरिडाले फोटो साझा गर्ने एप स्न्यापच्याटको मालिक स्न्यापमाथि मंगलबार मुद्दा हालेको छ। राज्यले कम्पनीमाथि बालबालिकालाई लत लगाउने फिचरहरू अवैध रूपमा प्रयोग गरेको र १३ वर्ष वा त्यसभन्दा कम उमेरका बालबालिकाका लागि खाता खोलेको आरोप लगाएको छ।

मुद्दामा भनिएको छ, ‘स्न्यापच्याटका अनन्त स्क्रोलिङ, पुष नोटिफिकेसन, अटो-प्ले भिडियो, र प्रयोगकर्तालाई प्रतिक्रिया दिने मेट्रिक जस्ता फिचरहरूले गभर्नर रोन डेसान्टिसले हस्ताक्षर गरेको २०२४ को राज्य कानुन उल्लंघन गर्छन्। उक्त कानुनले बालबालिकाको मानसिक स्वास्थ्यलाई सामाजिक सञ्जालको लतबाट जोगाउन उद्देश्य लिएको छ।’

फ्लोरिडाले स्न्यापको व्यवहारलाई “अत्यन्त आपत्तिजनक” भनेको छ। कारण, क्यालिफोर्नियाको सान्ता मोनिका स्थित कम्पनीले स्न्यापच्याटलाई १३ वर्षे बालबालिकाका लागि सुरक्षित भनेर प्रचार गर्छ, तर त्यस एपमार्फत अश्लील सामग्री हेर्न र लागूपदार्थ किन्न सकिने लगायत हानिकारक क्रियाकलाप गर्न सकिने उल्लेख रोयटर्सले उल्लेख गरेको छ।

मुद्दामा स्न्यापले १३ वर्षे प्रयोगकर्तालाई हटाउन नसकेको र १४ तथा १५ वर्षे प्रयोगकर्ताका लागि अभिभावकको सहमति आवश्यक नबनाएको थप भनिएको छ। स्न्यापले फ्लोरिडाका अभिभावकहरूलाई आफ्ना किशोरहरूलाई उक्त प्लेटफर्ममा पहुँच दिनुका जोखिमबारे झुक्याइरहेको छ,” भनिएको छ।

यो मुद्दा फ्लोरिडाका अटर्नी जनरल जेम्स उथमेइयरले घोषणा गरेका हुन् र राज्यको पानह्यान्डल क्षेत्रमा पर्ने सान्ता रोजा काउन्टीको राज्य अदालतमा दायर गरिएको हो। उथमेइयर र डेसान्टिस दुवै रिपब्लिकन हुन्।

स्न्यापले एक विज्ञप्तिमा भनेको छ, फ्लोरिडाको कानुनले बालबालिका र वयस्कहरूको पहिलो संशोधन अन्तर्गतको अभिव्यक्ति स्वतन्त्रताको अधिकार उल्लंघन गर्छ। यसबाहेक अनलाइन सुरक्षा र उमेर प्रमाणीकरणका लागि अपरेटिङ सिस्टम, एप स्टोर र डिभाइस तहमा “गोपनीयता-मैत्री समाधानहरू” उपलब्ध छन्।

प्रविधि उद्योगसँग सम्बन्धित दुई व्यापार समूह नेटच्वाइस र कम्प्युटर एण्ड कम्युनिकेशन्स इण्डस्ट्री एसोसियशनले फ्लोरिडाको यो कानुन अमेरिकी संविधान विपरीत भएको भन्दै राज्यको राजधानी ट्यालाहासीको संघीय अदालतमा चुनौती दिएका छन्।