पब्जी निर्माता क्राफ्टनले भारतीय गेमिङ स्टुडियो नौटिलस मोबाईलको बहुमत स्वामित्व खरिद गर्दै

काठमाडौं ।

दक्षिण कोरियाको गेमिङ कम्पनी क्राफ्टनले पब्जी र ब्याटलग्राउण्ड् मोबाइल इण्डिया (बीजीएमआई) जस्ता लोकप्रिय गेमहरू विकास गरेको छ। कम्पनीले भारतीय गेमिङ स्टुडियो नौटिलस मोबाइल मा १४ मिलियन डलरको सम्पूर्ण नगद सम्झौतामा ७५ प्रतिशतभन्दा बढी स्वामित्व प्राप्त गरेको छ।

शुक्रबार क्राफ्टनले दिएको जानकारीअनुसार भारतको पुणेमा आधारित नौटिलस मोबाइल सम्झौतापछि पनि स्वतन्त्र रूपमा सञ्चालन गर्न जारी रहनेछ। कम्पनीका ४५ जना कर्मचारीहरू पनि नौटिलसकै तलबसूचीमा रहनेछन्। सम्झौता यो महिनाको अन्त्यसम्ममा पूरा हुने अपेक्षा गरिएको टेकक्रञ्चले उल्लेख गरेको छ।

२०१३ मा स्थापना भएको नौटिलस ले क्रिकेट खेलप्रेमीहरूलाई लक्षित गर्दै रियल क्रिकेट फ्रेन्चाइज अन्तर्गत पाँचवटा खेलहरू सार्वजनिक गरिसकेको छ, जसमा रियल क्रिकेट २४ र रियल क्रिकेट प्रिमियर लिग समावेश छन्। कम्पनीले यी खेलहरू लाखौं पटक डाउनलोड भइसकेका छन्।

क्राफ्टन इण्डियाका सीईओ सन ह्युनिल सोहनले भने, “हामी नौटिलसको मोबाइल क्रिकेट गेम विकास गर्ने क्षमतालाई थप मजबुत बनाउनेछौं। छोटो अवधिमा यसका अवस्थित खेलहरू परिष्कृत गर्दै, दीर्घकालीन रूपमा नयाँ विधाहरू पनि अन्वेषण गर्नेछौं।”

नौटिलसका सीईओ अनुज मनकरले भने, “नौटिलसको विकास क्षमताले क्राफ्टन लाई भारतको गेमिङ रणनीति मजबुत बनाउन मद्दत गर्नेछ। हामी मिलेर भारतीय र विश्व बजारका लागि थप नयाँ खेलहरू निर्माण गर्न सक्छौं।”

टेकक्रञ्चका अनुसार भारतमा मोबाइल गेमिङ बजार तीव्र रूपमा विस्तार भइरहेको छ।निको पार्टनर्सको रिपोर्टअनुसार, मोबाइल गेमिङले देशको कुल गेमिङ आम्दानीको ७७.९ प्रतिशत हिस्सा ओगटेको छ। भारतको मोबाइल गेमिङ उद्योगको राजस्व २०२३ मा ६४० मिलियन डलर रहेको थियो, जुन २०२८ सम्म १.१ अर्ब डलर पुग्ने अनुमान गरिएको छ।