ईमेलमार्फत् मस्कले संघीय कर्मचारीहरुलाई भने- कामको औचित्य प्रमाणित गर वा जागिर छोड

काठमाडौं ।

अमेरिकी राष्ट्रपति डोनाल्ड ट्रम्पका अर्बपति सल्लाहकार ईलन मस्कले अमेरिकी सङ्घीय निकायका सबै कर्मचारीले आफ्नो कामको औचित्य पुष्टि गर्नुपर्ने वा जागिर गुमाउनुपर्ने बताएका छन्।

विश्वका सबैभन्दा धनी व्यक्ति तथा ट्रम्पका सबैभन्दा ठूला दाता मस्कले अनावश्यक सरकारी कर्मचारीलाई बर्खास्त गर्ने प्रयासको नेतृत्व गरेका हुन्।
“सबै सङ्घीय कर्मचारीहरूले चाँडै एउटा इमेल प्राप्त गर्नेछन् जसले उनीहरूले गत हप्ता के गरेका थिए भनेर बुझ्न अनुरोध गर्दछ। जवाफ दिन असफल भएमा त्यसलाई राजीनामाको रुपमा लिइनेछ,” मस्कले लेखेका छन्।

एएफपीलाई उपलब्ध गराइएको इमेलको प्रतिलिपिमा सङ्घीय कर्मचारीहरूलाई ‘उनीहरूले अघिल्लो हप्ता गरेका लगभग पाँच वटा मुख्य काम पेश गर्न’ भनिएको छ।

अमेरिकाको ‘अफिस अफ पर्सनल म्यानेजमेन्ट (ओपीएम)’ बाट आएको उक्त इमेलमा ’तपाईंले गत हप्ता के गर्नुभयो?’ भन्ने शीर्षक थियो। जवाफ दिने समयसीमा सोमबार राति ११:५९ थियो, यद्यपि सन्देशमा त्यसो गर्न असफल भएमा जागीरबाट हटाउन भनिएको थिएन।

ओपिएमले शनिबार साँझ एएफपीको प्रतिक्रियाको अनुरोधको तत्काल जवाफ दिएन। सबैभन्दा ठूलो सङ्घीय कर्मचारी युनियन, ‘अमेरिकन फेडेरेसन अफ गभर्नमेन्ट एम्प्लोइज (एएफजीई)’ ले राष्ट्रिय अध्यक्ष एभरेट केलीको एक वक्तव्यमा कुनै पनि गैरकानुनी बर्खास्तीलाई चुनौती दिने प्रतिबद्धता जनाएको छ।

केलीले मस्क र ट्रम्प प्रशासनको आलोचना गर्दै यो कदमले “सङ्घीय कर्मचारीहरू र उनीहरूले अमेरिकी जनतालाई प्रदान गर्ने महत्वपूर्ण सेवाहरूप्रति उनीहरूको घोर अपमान’ भएको बताएका थिए।

उनले भनेका छन्, “निजामती सेवामा आफ्नो दोस्रो वर्दीधारी लाखौं भूतपूर्व सैनिकहरूलाई आफ्नो जीवनको एक घण्टा पनि इमानदार सार्वजनिक सेवा नगरेका यी अछुतो, विशेषाधिकार प्राप्त अनिर्वाचित अर्बपतिलाई आफ्नो (कर्मचारीको) जागिरको जिम्मेवारीको औचित्य साबित गर्न बाध्य पार्नु क्रूर र अपमानजनक छ।”

धेरै सङ्घीय कर्मचारीहरूले एएफपीलाई बताए अनुसार उनीहरूका एजेन्सीहरूले इमेलको जवाफ नदिन र थप निर्देशनको प्रतीक्षा गर्न सल्लाह दिएका थिए।

इमेल प्राप्त गरेका भेट्रान्स अफेयर्स विभागका एक चिकित्सकले एएफपीसँग भने, “मैले धेरै काम गर्न बाँकी छ, म यो नाटकका लागि वास्तविक बिरामीको हेरचाहलाई बेवास्ता गर्ने छैन।”-रासस/एएफपी