सोसल मिडियाले बालबालिकालाई लत लगाउनुमा जुकरबर्ग जिम्मेवार नरहेको अमेरिकी न्यायाधिशको ठहर

काठमाडौं ।

संयुक्त राज्य अमेरिकाका एक संघीय न्यायाधीशले मेटा प्लेटफर्म्सका सीईओ मार्क जुकरबर्गलाई सोसल मिडियाले बालबालिकालाई लत लगाएको आरोपमा लागेका २५ मुद्दाहरूमा व्यक्तिगत रूपमा जिम्मेवार नरहेको ठहर गरेका छन्।

क्यालिफोर्नियाको ओकल्याण्डमा रहेको अमेरिकी जिल्ला न्यायालयकी न्यायाधीश इभोन गोनजालेज रोजर्सले बिहीबार जुकरबर्गले फेसबुक र इन्स्टाग्रामको प्रयोगबाट बालबालिकामा गम्भीर मानसिक स्वास्थ्य जोखिमहरू लुकाउन सक्रिय रूपमा निर्देशन दिएको आरोपलाई अस्वीकार गरिन्।

रोयटर्सका अनुसार मुद्दा हाल्ने पक्षले मेटाका अरबपति सह-संस्थापक जुकरबर्गलाई तथाकथित “मार्गदर्शक आत्मा” भनेका थिए, जसले आन्तरिक चेतावनीहरूलाई वेवास्ता गरेको र सार्वजनिक रूपमा जोखिमलाई कम महत्व दिएको आरोप लगाएका थिए। तर न्यायाधीशले जुकरबर्गले के गलत गरे भन्ने बारेमा स्पष्ट प्रमाण नपाएको भन्दै, “कम्पनीको गतिविधिमा मात्र नियन्त्रण हुनु पर्याप्त प्रमाण होइन” भनेर बताएकी छिन्। यो निर्णय मेटा कम्पनीमाथि लागेको अन्य सम्बन्धित दावीहरूलाई भने प्रभावित गर्दैन।

यी मुद्दाहरू १३ वटा अमेरिकी राज्यका कानुन अन्तर्गत दायर भएका छन्, जसमा एरिजोना, कोलोराडो, कनेटिकट, जर्जिया, म्यारिल्याण्ड, न्यूयोर्क, नर्थ क्यारोलाइना, ओहायो, पेनसिलभेनिया, साउथ क्यारोलाइना, टेक्सास, भर्जिनिया, र विस्कन्सिन समावेश छन्।

मुद्दा हाल्ने पक्षका वकिल मोट्ले राइसका पार्टनर रेविन वारेनले शुक्रबार भने, उनका क्लाइन्टरूले “बिग टेकले हाम्रो बालबालिकाको सुरक्षाभन्दा मुनाफालाई प्राथमिकता दिएको कसरी थाहा पाएर पनि नजरअन्दाज गर्यो भन्ने सत्य पत्ता लगाउन” प्रमाणहरू सङ्कलन गर्दै जानेछन्।

यी २५ मुद्दाहरू मेटा, अल्फाबेट (गुगल), बाइटडान्सको टिकटक, र स्न्यापच्याट (स्न्याप) विरुद्ध बालबालिका, तिनका परिवार र विद्यालयहरूले सामाजिक सञ्जालको लतका कारण नोक्सानी दाबी गर्दै दायर गरेका सयौं मुद्दाहरू मध्येका हुन्।

थुप्रै अमेरिकी राज्यका महान्यायाधीशहरूले पनि मेटाविरुद्ध यस्तै मुद्दाहरू अघि बढाइरहेका छन्, जसमा यसको सोसल मिडिया प्लेटफर्महरूलाई चिन्ता, डिप्रेशन, अनिद्रा, र शिक्षा तथा दैनन्दिन जीवनमा अवरोधसँग जोडिएको आरोप लगाइएको छ।

यो मुद्दा “सोसल मिडिया एडोलेसेन्ट एडिक्सन/व्यक्तिगत चोट उत्पादन दायित्व मुद्दा” को रूपमा दायर गरिएको छ, जसको नम्बर ’22-md-03047 हो, अमेरिकी जिल्ला अदालत, उत्तरी जिल्ला क्यालिफोर्निया’ रहेको छ।