काठमाडौं ।
चीनको सबैभन्दा ठूलो टेक दिग्गज मध्येको एक टेन्सेन्टले आफ्ना दुई नन फन्जिबल टोकन (एनएफटी) मार्केटप्लेसहरू मध्ये एउटा बन्द गरेको छ। यस प्लेटफर्मसँग सम्बन्धित वरिष्ठ अधिकारीहरूको सरुवा गरिएको छ।
यसलाई बन्द गर्नुको मुख्य कारण चिनियाँ सरकारको कडा नीति हो, जसअन्तर्गत डिजिटल सङ्कलन वस्तुहरू खरिद गरेपछि दोस्रो बजारमा बिक्री गर्न निषेध गरिएको छ।
स्थानीय पत्रिकाका अनुसार करिब दुई महिनाअघि प्लेटफर्म बन्द गर्ने प्रक्रिया सुरु भएको थियो । डिजिटल सङ्कलन खण्ड यस महिनाको सुरुमा टेन्सेन्टको समाचार एपबाट हटाइयो। प्लेटफर्मबाट सरुवा गरिएका कार्यकारीहरूमा टेन्सेन्टको समाचार विभागका पूर्व इन्चार्ज वाङ शिमु सामेल छन्। चीनमा केही सामाजिक सञ्जाल कम्पनीहरूले सरकारको कडा कदमको डरले आफ्नो डिजिटल सङ्कलन व्यवसाय बन्द गरेका छन्। यसमा अलिबाबा, वेबो र वीच्याट समावेश छन्।
हालै, चीनको सबैभन्दा लोकप्रिय इन्स्ट्यान्ट मेसेजिङ र कलिङ एप वीच्याटले आफ्नो प्लेटफर्ममा क्रिप्टो-सम्बन्धित गतिविधिहरूलाई प्रतिबन्ध लगाएको छ। वीच्याटले यसलाई अवैध व्यापारको श्रेणीमा राखेको छ।
एनएफटीहरुमा ब्लकचेन टेक्नोलोजी प्रयोग गरेर, अद्वितीय वस्तुहरूको टोकन प्रमाणीकरण गरिन्छ जुन पुन: उत्पादन योग्य डिजिटल सम्पत्तिहरूसँग जोडिएको छ। यसमा कला, संगीत, इन-गेम वस्तुहरू र भिडियोहरू समावेश हुन सक्छन्। यी अनलाइन व्यापार गर्न सकिन्छ तर नक्कल गर्न सकिँदैन।
प्रकाशित: २ श्रावण २०७९, सोमबार
