अपेक्षा गरेभन्दा कम सदस्य थपिए नेटफ्लिक्समा, यो वर्ष पनि सुस्त सुरुवात हुने अनुमान

काठमाडौं ।

नेटफ्लिक्सले गत वर्षको अन्तिम क्वाटरमा निराशाजनक ग्राहक वृद्धि रिपोर्ट गरेको छ। कम्पनीले अक्टोबर–डिसेम्बर अवधिमा विश्वभर ८३ लाख ग्राहक मात्र थपेको छ जुन कम्पनीको अनुमानभन्दा करिब २ लाख कम भएको एसोसिएट्स प्रेसको रिपोर्टले उल्लेख गरेको छ।

फ्याक्टसेट रिसर्चका अनुसार, यी नतिजाहरू जारी गर्नुको अतिरिक्त, नेटफ्लिक्सले यस वर्षको पहिलो तीन महिनामा २५ लाख सदस्यहरूको वृद्धिको प्रक्षेपण गरेको छ तर यो संख्या विश्लेषकहरूको अपेक्षाभन्दा ४० लाख कम हो।

यो निराशाजनक समाचारले विगत दुई महिनामा नेटफ्लिक्सको स्टक मूल्यमा ठूलो गिरावट आएको छ र व्यापारमा लगभग २० प्रतिशतले कमी आएको छ। सन् २०२० मा नेटफ्लिक्सले कोभिड महामारीका कारण भएको लकडाउनबाट निकै फाइदा उठायो। तर २०२१ कम्पनीका लागि चुनौतीपूर्ण वर्ष रह्यो।

२०२१ मा, नेटफ्लिक्सले विश्वभर ८२ लाख सदस्यहरू बनाएको छ जुन पछिल्लो ५ वर्षमा सबैभन्दा कम वार्षिक वृद्धि हो। यसको तुलनामा, नेटफ्लिक्सले सन् २०२० मा ३ करोड ६० लाखभन्दा बढी ग्राहक थपेको थियो। नेटफ्लिक्ससँग अहिले विश्वभर करिब २२ करोड २० लाख सब्सक्राइबरहरू छन्, जुन अन्य भिडियो स्ट्रिमिङ सेवाहरू भन्दा बढी हो।

तर यस क्षेत्रमा वाल्ट डिज्नी र एप्पल जस्ता प्रतिस्पर्धीको प्रवेशसँगै बजार प्रतिस्पर्धा बढेको छ। धेरै अन्य खेलाडीहरू पनि भिडियो स्ट्रिमिङको संसारमा प्रवेश गर्दैछन्। नेटफ्लिक्सले गत वर्ष भिडियो गेमहरूमा विस्तार गर्ने निर्णय गर्नुको एउटा कारण यो पनि हो।

आफ्नो त्रैमासिक सेयरहोल्डर पत्रमा, नेटफ्लिक्सले यसको वृद्धि “थोरै” प्रभावित भएको बताएको छ । यसको सेवा अझै पनि उपलब्ध भएका सबै देशहरूमा बढिरहेको उल्लेख गरेको छ। बिहीबारको कन्फ्रेन्स कलमा, नेटफ्लिक्सका कार्यकारीहरूले गत वर्षको महामारीको अस्थिरता र अनिश्चितताले भविष्यको वृद्धि मूल्याङ्कन गर्न गाह्रो बनाएको बताएका छन्।