काठमाडौं ।
अमेरिकी विद्युतीय कार कम्पनी टेस्लाका प्रमुख कार्यकारी अधिकृत इलन मस्कले क्यानडाका प्रधानमन्त्री जस्टिन ट्रुडोलाई जर्मन तानाशाह एडोल्फ हिटलरसँग तुलना गरेका छन्। उनले एक ट्वीट मार्फत, मस्कले क्यानाडाली ट्रक चालकहरूको भ्याक्सिन सम्बन्धी कडा नियमहरूको विरूद्ध गरेको विरोध प्रदर्शनलाई समर्थन गरेको देखिन्छ।
उनको यो ट्विटले ट्विटरमा ठूलो विवाद सुरु भएको थियो। मस्कले बुधबार अबेर क्यालिफोर्नियाबाट यो ट्वीट गरेका थिए। तर, उनले कुनै कारण नदिई बिहीबार उक्त ट्वीट डिलिट गरे।
मस्कले गत महिना एक ट्वीटमा क्यानाडाली ट्रक चालकहरूको प्रदर्शनलाई समर्थन गरेका थिए। यी ट्रक चालकहरूले क्यानाडामा सडक र पुलहरू बन्द गरेका छन्। यसले अन्तर्राष्ट्रिय स्तरमा ट्रुडो सरकारको नीति विरोधी मुद्दा उठाएको छ।
ट्रुडोको सरकारले प्रदर्शनकारीहरूलाई आर्थिक सहायता रोक्न बैंकहरूलाई आदेश दिएको बारेमा गरिएको ट्वीटको जवाफमा, मस्कले “मलाई जस्टिन ट्रुडोसँग तुलना गर्न बन्द गर्नुहोस्” भन्ने लेखेका थिए र क्याप्शनको साथ हिटलरको फोटोको मिम पोस्ट गरेका थिए।
ट्विटरमा मस्कका करिब ७ करोड ४० लाख भन्दा धेरै फलोअर्स छन् । उनी प्रायः कडा टिप्पणीहरू सहितको ट्वीटहरू गरेर मानिसहरूको ध्यान खिच्छन्।
यद्यपि धेरै ट्विटर प्रयोगकर्ताहरूले ट्रुडोलाई जर्मनीमा नरसंहारका लागि जिम्मेवार नाजी नेता हिटलरसँग तुलना गरेकोमा आपत्ति जनाएका छन्। क्यानडाका उद्योग मन्त्री फ्रान्कोइस-फिलिप श्याम्पेनले ट्विटरमा मस्कलाई सम्बोधन गर्दै उनको टिप्पणीलाई ठूलो धक्का भएको बताए। तर, मस्कको विवादास्पद ट्विटलाई ३५,००० भन्दा बढी लाइक प्राप्त भएको छ र ९,००० पटक रिट्वीट गरिएको छ। धेरै ट्विटर प्रयोगकर्ताहरूले यसको प्रशंसा पनि गरेका छन्।
यसले थप विवाद हुने देखेसँगै उनले सो ट्वीट बिहिबार अचानक कुनै कारण उल्लेख नगरी डिलिट गरेका थिए।
प्रकाशित: ६ फाल्गुन २०७८, शुक्रबार
