मोबाइल सेवाको गुणस्तर मूल्याङ्कन, मापन तथा विश्लेषण गर्दै प्राधिकरण

काठमाडौं ।

नेपाल दूरसञ्चार प्राधिकरणले मोबाइल सेवाको गुणस्तर मूल्याङ्कन, मापन तथा विश्लेषण गर्नका लागि आशयपत्र आह्वान गरेको छ।

नेपाल सरकारको बजेटमा सम्पन्न हुने यो परियोजना प्याकेज १, २ र ३ गरी तीन भागमा बाँडिएको छ।

प्याकेज १ मा प्रदेश १ र प्रदेश २, प्याकेज २ मा बागमती र गण्डकी प्रदेश तथा प्याकेज ३ मा लुम्बिनी, सुदूर पश्चिम तथा कर्णाली प्रदेशमा मोबाइल सेवाको गुणस्तर मापन गराइने प्राधिकरणले जनाएको छ।

यो परियोजनाले देशका विभिन्न प्रदेशहरुमा उपलब्ध दूरसञ्चार सेवा प्रदायकहरुका भ्वाइस, एसएमएस तथा डाटा सेवाको गुणस्तर मूल्याङ्कन, मापन तथा विश्लेषण गर्ने उद्देश्य राखेको छ।

यसका लागि इच्छुक र योग्यता पुगेका परामर्शदातृले आगामी जनवरी २१ मध्याह्न १२ बजेभित्र प्राधिकरणको कार्यालय जमलमा वा अनलाइनमार्फत् www.bolpatra.gov.np/egp मा वा https//:nta/gov.np/en/ मार्फत् पनि बुझाउन सकिने सूचनामा उल्लेख छ।

उक्त समयभित्र आएका रित पुगेका संस्थाहरुलाई क्यूईसी प्रक्रियाबाट छानिनेछ जसमा गुणस्तरको ५० प्रतिशत, अनुभवको ४० प्रतिशत तथा कार्यक्षमताको १० प्रतिशत अंकभार रहने उल्लेख छ।

छानिएका परामर्शदातृले विभिन्न प्याकेजअन्तर्गतका सबै प्रदेशहरुमा दूरसञ्चार सेवा गुणस्तर सम्बन्धी  उपनियम २०७३ अन्तर्गत प्राधिकरणले तोकेबमोजिमको क्यूओएस मिजरमेन्ट युजिङ ड्राइभ टेस्टका लागि मानक सञ्चालन प्रक्रियाअनुरुप बेन्चमार्किङ सोलुशन प्रयोग गरी ड्राइभ टेस्ट गर्नुपर्ने सूचनामा उल्लेख छ।

विभिन्न ती औटा प्याकेजहरु समापन गर्नका लागि पनि सूचनामा समयसीमा तोकिएको छ।

छानिएका परामर्शदातृले सबै विवरणसहित नेपाल दूरसञ्चार प्राधिकरणलाई प्रतिवेदन बुझाउने र प्राधिकरणका अधिकारीहरुसमक्ष प्रिजेन्टेशन पनि पेश गर्नुपर्नेछ।