नेपाल टेलिकम व्यवस्थापन पक्ष र कर्मचारी ट्रेड युनियनहरु बिच सहमति, आन्दोलनका कार्यक्रम फिर्ता

काठमाडौं ।

-अनुज राज

नेपाल दूरसञ्चार कम्पनी लिमिटेड (नेपाल टेलिकम) व्यवस्थापन पक्ष र कर्मचारी ट्रेड युनियनहरु बिच शुक्रबार अबेर राती सहमति भएको छ ।

दुबैपक्षबिच अहिलेको कर्मचारी विनियमावलीमा संसोधन गर्न सिफारिस गर्ने लगायतका विभिन्न विषयहरुमा सहमतिका साथ आन्दोलन रोकिएको छ।

यसअघि कर्मचारी विनियमावलीमा संसोधन गरिएको, ट्रेड युनियनमा सहभागी हुने तह परिवर्तन गरिएको भन्दै सो कर्मचारीहरुले आन्दोलन गर्दै आएका थिए । यसका साथै कर्मचारीहरुले वर्तमान प्रबन्ध निर्देशक डिल्लिराम अधिकारी पुनः कम्पनीमा दुई तह घटेर आउन लागेको भन्दै विरोध जनाउँदै आएका थिए ।

टेलिकम ट्रेड युनियन र  व्यवस्थापनबिच शुक्रबार अबेर सहमति भएको नेपाल दूरसञ्‍चार राष्‍ट्रिय कर्मचारी संगठनका अध्यक्ष यादव प्रसाद पनेरुले जानकारी दिए ।

शुक्रबार बिहानदेखि नै बुँदागत सहमति गर्न छलफलमा रहेका सबै पक्षबिच अबेर राति सहमति भएको हो। सो वार्ताको लागि सञ्चार तथा सूचना प्रविधि मन्त्रालयले केहि समयअघिदेखि नै सहजीकरण गर्न टोली खटाएको थियो।

“मन्त्रालयका सचिव ज्यूको पहलमा भएको यो सहमतिलाई सकारात्मक रुपमा अगाडि बढाएर मन्त्रालय, व्यवस्थापनलगायतका पक्षले कसरी कार्यान्वयन गर्ने हो त्यो आगामी दिनमा हेर्नुपर्ने हुन्छ, तर यसले नयाँ बाटो खुलाएको छ,” पनेरुले भने, “सहमतिपछि अब आन्दोलनका कार्यक्रमहरु रोकिएका छन् ।”

सहमति भएका बुँदाहरुमा कम्पनी सुधार कर्मचारीको वृत्ति विकास प्रबन्ध निर्देशकको कार्य अवधि र रणनीतिक योजना फोरजीको अडिटलगायतका विषयहरु मुख्यरुपमा समावेश गरिएका छन् ।

जसअनुसार कम्पनीमा तह ११ मा पाँच वर्ष र तह १० मा आठ वर्ष सेवा अवधि पुगेपछि स्वत: अवकाश हुने व्यवस्था कम्पनीको कर्मचारी विनियमावली, २०७८ मा कायम गर्ने गरी संसोधन गर्न लोक सेवा आयोगमा पठाउने सहमति भएको छ।

त्यसैगरि प्रबन्ध निर्देशक पदमा नियुक्त भएमा नियुक्त भएको मितिदेखि कम्पनीको सेवाबाट स्वत अवकाश हुने व्यवस्था कम्पनीको कर्मचारी विनियमावलीमा कायम गर्ने गरी संसोधन गर्ने बुँदामा पनि सहमति भएको छ ।

यसका साथै २०६६ कात्तिक १ गतेपछि कम्पनीको स्थायी सेवामा नियुक्ति पाएका कर्मचारीहरुलाई विनियमको दफा १४४४(२) को सुत्र सरह हुने गरी योगदानमा आधारित निवृत्तभरण उपलब्ध गराउने र योगदानमा आधारित निवृत्तभरण कोषबाट निवृत्तभरणसँग सम्बनिधत अन्य सुबिधाहरु २०६६ कात्तिक १ अघि नियुक्त भएका कर्मचारीहरुसहर उपलब्ध गराउन विनियमावली संसोधन गर्ने । सवारी चालकको साविक बमोजिमको तहगत व्यवस्था कायम गर्ने, बहालबाला कर्मचारीहरुलाई उमेर हद नलाग्ने व्यवस्था गर्ने, एक तह मुनिको पदमा ३ वर्ष अवधि पुरा गरेको कर्मचारी माथिल्लो तहमा बढुवाको लागि सम्भाव्य उम्मेदावार हुन पाउने व्यवस्था कायम गर्ने, कर्मचारीहरुको वृत्ति विकासमा पूर्वानुमानयोग्य बनाउनका लागि विकल्पहरु पहिचान गरी सिफारिश गर्न क्रियाशिल कर्मचारी युनियनहरुको समेत प्रतिनिधित्व रहने गरि समिति गठन गर्ने, कम्पनीको पुनःसंरचना पुनरावलोकन सम्बन्धी विषय सञ्चालक समितिमा छलफलको क्रममा रहेकोले सरोकारबालापक्ष र कर्मचारी युनियनहरुसँग छलफल गरी मात्र कार्यान्वयन गर्ने ।

त्यसैगरी कम्पनीको प्रबन्ध निर्देशकको कार्यसम्पादन सहमति सार्वजनिक गरी अर्ध वार्षिक रुपमा संचालक समितिले मूल्यांकन गरी आवश्यक निर्देशन दिने, हाल संचालन भईरहेका आयोजनाहरुको प्रगति बिबरण तथा बाँकी कामको कार्य तालिका सहित यथार्थ बिबरण उपलब्ध गराउने, फोरजी एलटीई आयोजनाको थर्ड पार्टि तथा आन्तरिक श्रोतबाट प्राविधिक तथा कार्यसम्पादन परीक्षण गर्ने, कम्पनीको आम्दानी वृद्धि गर्न आगामी तीन महिनामा व्यवसायिक रणनीति तथा कार्ययोजना बनाई लागू गर्ने, नमस्ते पे भदौ २२ गतेदेखि व्यवसायीकरुपमा संचालन गर्ने, उपभोक्ता मूल्य सूचकांकका आधारमा मासिक भत्ता पुनरावलोकन गर्ने, कम्पनीको शेयर नभएका कर्मचारीहरुलाई शेयर उपलब्ध गराउन पहल गर्ने, वार्षिकरुपमा पर्यटन बिदा उपलब्ध गराउने, ट्रेड युनियन अधिकार हालको ७ तहसम्म मात्र भएकोमा ९ तहसम्म कायम गर्न कर्मचारी विनियमावली संसोधन गर्ने लगायतका बुँदाहरु रहेका छन् ।

यसअघि टेलिकम युनियनमा आबद्ध कर्मचारीहरुले कर्मचारी विनियमावली सम्बन्धमा पेश गरेका सुझाव तथा ध्यानाकर्षणहरुको सम्झौता सहमति कार्यान्वयनमा व्यवस्थापन र संचालक समितिले उदासिनता देखाएको भन्दै आइतबारदेखी कडा आन्दोलन गर्ने चेतावनी दिएका थिए।

तर सञ्चार तथा सूचना प्रविधि मन्त्रालयका सचिव डा. बैकुण्ठ अर्यालले आन्दोलन र धर्ना रोक्नुपर्ने भन्दै आएका थिए । उनले दुबैपक्षलाई छिटो वार्ता र सहमति गर्न दबाब दिँदै आएको मन्त्रालय स्रोतको दाबी छ।

“सचिव ज्यूले सकेसम्म छिटो सहमति गर्न टेलिकम ट्रेड युनियन र व्यवस्थापनलाई भन्दै आउनुभएको थियो । ट्रेड युनियनहरुको पुरा हुन नसक्ने केहि मागमा उहाँको असहमति रहेको थियो,” मन्त्रालय स्रोतले भन्यो ।

सोही आधारमा मन्त्रालयको सहजीकरणमा नेपाल टेलिकम व्यवस्थापन पक्ष र टेलिकम ट्रेड युनियन पक्षबिच वार्ता भईरहेको थियो । यसको लागि मन्त्रालयले सहजकर्तामा संस्थान प्रमुख रामप्रसाद सापकोटा र समन्वयनकर्ताको रुपमा महेन्द्र प्रसाद साँखीलाई पठाएको थियो । त्यसैगरि कम्पनी सञ्चालक समितिको तर्फबाट अम्बिका प्रसाद पौडेल रहेका थिए ।

वार्तामा कम्पनी व्यवस्थापनको तर्फबाट भने भानुराज श्रेष्ठको नेतृत्वमा प्रतिभा बैद्य, राजेन्द्र अर्याल, सुरज सिंह थापा, निर्झर भट्टराई, राजन कुमार अधिकारी थिए ।

कर्मचारी युनियनहरुको तर्फबाट नेपाल दूरसञ्‍चार राष्‍ट्रिय कर्मचारी संगठनका  यादव प्रसाद पनेरु र तेज बहादुर शाही, नेपाल टेलिकम वर्कर्स यूनियनका तर्फबाट राजेन्द्र प्रसाद जोशी र महेश्वर खड्का, नेपाल टेलिकम कर्मचारी यूनियनका तर्फबाट विरेन्द्रलाल जोशी तथा धर्मेन्द कुमार यादव रहेका थिए ।

यो पनि हेर्नुस्-

टेलिकमका कर्मचारीहरुसँग वार्ताको वातावरण बनाउन मन्त्रालयको सहजीकरण टोली गठन