अनलाइन कक्षाका लागि विद्यार्थीलाई सिम तथा डाटासहितको एन्ड्रोइड मोबाइल सेट

काठमाडौं ।

अमेरिकी राजदूतावासको आर्थिक सहयोगमा नेपाल इङ्लिस ल्याङवेज टिचर एसोसिएसन (नेल्टा) दोलखा शाखाले यहाँका ४० जना विपन्न तथा जेहेनदार विद्यार्थीलाई पठनपाठनका लागि सिम तथा डाटासहितको एन्ड्रोइड मोबाइल सेट वितरण गरको छ ।

नेल्टा शाखाका सचिव बालकृष्ण दाहालले कोरोना कहरबीच इङ्लिस एक्सेस माइक्रो स्कलरसिप कार्यक्रमअन्तर्गत अनलाइन कक्षामा सहभागी भई पढ्न, गृहकार्य गर्न र कार्यमूलक सिकाइ प्रदान गर्न विद्यार्थीलाई सेट वितरण गरिएको जानकारी दिए । उनका अनुसार विद्यार्थीलाई फोनमार्फत गराइएको १० दिने पठनपाठन कोरोना सङ्क्रमण बढेपछि बन्द गरिएकोमा पठनपाठनलाई निरन्तरता दिन सेट वितरण गरिएको हो ।

अब पठनपाठन सुरु हुन्छ । उनीहरूलाई स्कुल ब्याग र टिसर्टसमेत दिने तयारी भइरहेको छ । दुईवर्षे कार्यक्रममा चरीकोटस्थितका कालिञ्चोक माध्यमिक र पशुपति कन्या मन्दिर माध्यमिक विद्यालयका कमजोर आर्थिक अवस्थाका १३ देखि १६ वर्ष उमेरका छात्र २० र छात्रा २० गरी ४० जना सहभागी छन् ।

एक सय जनामध्ये परीक्षामा उत्कृष्ट ठहरिएकाहरू कार्यक्रममा छनोट भएका हुन् । चार जना शिक्षक अध्यापनरत छन् ।

दुई वर्षसम्म विद्यार्थीलाई हरेक हप्ता विद्यालयको समयपछि पाँच घण्टाको अङ्ग्रेजी भाषा शिक्षण, हरेक हप्ताको दुई घण्टा कम्प्युटर र पहिलो शैक्षिक सत्रको अन्त्यमा एकहप्ते युवा नेतृत्व विकास तालिम प्रदान गरिने पाठ्यक्रम छ ।

हरेक हप्ता सिकेका कुरा जीवनमा सदुपयोग होस् भन्ने उद्देश्यले ल्याइएको यो कार्यक्रम समाप्तिपछि उनीहरूले अमेरिका वा अन्य देशमा अध्ययन गर्न पाउने अवसर पनि मिल्ने नेल्टा शाखाका सचिव दाहालले जानकारी दिए ।गोरखापत्र