सूचना प्रविधि क्षेत्रसहित चीनका ३४ कम्पनी बाइडेन प्रशासनद्धारा कालोसूचीमा

काठमाडौं ।

अमेरिकी सरकारले थप १४ ओटा चिनियाँ कम्पनीलाई व्यापार प्रतिबन्धको सूचीमा राख्ने निर्णय गरेको छ। सो प्रतिबन्धमा अधिकांश सूचना प्रविधि सम्बन्धि कम्पनीहरु रहेका छन् ।

सिनच्याङ उइगुर क्षेत्रमा मानवअधिकार उल्लंघनमा उनीहरूको संलग्नता हुनुको कारण ती कम्पनीहरूलाई प्रतिबन्धको सूचीमा राखिएको सिएनबिसीले अमेरिकी वाणिज्य विभागलाई उद्धृत गर्दै उल्लेख गरेको छ ।

धेरै चिनियाँ कम्पनीहरूले उच्च–प्रबिधि निगरानी प्रणाली प्रस्ताव गरेका कम्पनी पनि अमेरिकाको यो सूचीको हिस्सा भएका छन् । प्रतिबन्धित यी कम्पनीहरूले चिनियाँ कम्युनिष्ट पार्टी (सीसीपी) को उइगुर र यस क्षेत्रका अन्य जातीय अल्पसंख्यक समुदायबिरूद्ध सामूहिक हिरासत र उच्च प्रविधिको निगरानीको अभियानलाई सक्षम पारेको आरोप अमेरिकाले लगाएको छ।

रिपोर्टअनुसार अमेरिकी वाणिज्य मन्त्री जीना राइमन्डोले अमेरिकी मन्त्रालय सिनच्याङमा मानव अधिकार उल्लङघन गर्ने संस्थालाई लक्षित गर्न कडा र निर्णायक कदम चाल्न प्रतिबद्ध रहेको बताएकि छन्।

तिनीहरूमा चाइना एकेडेमी अफ इलेक्ट्रोनिक्स र इन्फरमेसन टेक्नोलोजी; झिनजियांग लियानहाई चुआङ्गझाई इन्फरमेसन टेक्नोलोजी कम्पनी; शेन्जेन कोबर इन्फरमेसन टेक्नोलोजी कम्पनी; झिनज्याङ्ग सेलिङ्ग इन्फरमेसन टेक्नोलोजी कम्पनी लगायतका कम्पनीहरु रहेका छन् ।

अमेरिकी वाणिज्य विभागले समग्रमा ३४ संस्थालाई प्रतिबन्धित सूचीमा थपेको छ जसमा रसिया र इरानका केही र अन्य ५ संस्थाले प्रत्यक्ष रूपमा चीनको सैन्य आधुनिकीकरण कार्यक्रमलाई लेजर र युद्ध व्यवस्थापन प्रणाली सम्बन्धी समर्थन गर्ने बताएको छ।

बाइडेन प्रशासनले ‘पेचिङको मानव अधिकार उल्लङ्घन’ बिरूद्ध कडा कदम चालेको बताइएको छ । दुई महीना अगाडि अमेरिकाले पाँच ओटा चिनियाँ सौर्य प्यानल कम्पनीहरूलाई सिनच्याङ– उइगुर क्षेत्रमा जबरजस्ती श्रम प्रयोग गरेको आरोप लगाउँदै प्रतिबन्धित सूचीमा जोडेको थियो।

अर्कोतर्फ चिनियाँ सरकारले उक्त आरोपलाई अस्वीकार गर्दै यी प्रतिबन्धहरू झूटा आरोपमा आधारित रहेको बताएको पनि एनएचके वर्ल्ड द्वारा सम्प्रेषित समाचारमा उल्लेख छ। चीनले उइगुर मुसलमानहरूलाई असमान व्यवहार नगरेको दावी गर्दै आएको छ।

यद्यपि अमेरिकालगायत उसका सहयोगी राष्ट्रहरूले उइगुर मुसलमान समुदायलाई शिविरमा सामूहिक हिरासतमा राखेर उनीहरूको धार्मिक गतिविधिमा हस्तक्षेप गरेको र समुदायका सदस्यहरूलाई दुःख दिएको बताउने गरेका छन् ।

अर्कोतर्फ सीसीपीले सिन्च्याङमा उइगुरहरूविरुद्ध मानवअधिकार हननका घटना नभएको कुरामा जोड दिंदै कडा शब्दमा अमेरिकी निर्णयको विरोध गरेको छ।

यसअघि पनि ट्रम्प प्रशासनले २० वटा विभिन्न प्रविधि कम्पनीलाई प्रतिबन्ध लगाएको थियो ।