स्टार्टअपलाई लगानीको १० प्रतिशत परियोजना धितोमा कर्जा दिन एफएनसीसीआईको सुझाब

काठमाडौं ।

नेपाल उद्योग बाणिज्य महासंघ (एफएनसीसीआई) ले स्टार्टअपहरुलाई कुल लगानीको १० प्रतिशत परियोजना धितोमा कर्जा प्रवाह गरिनु पर्ने माग सहितको सुझाब नेपाल राष्ट्र बैंकलाई दिएको छ।

महासंघका अध्यक्ष शेखर गोल्छाले आज राष्ट्र बैंकका गर्भनर महा प्रसाद अधिकारीलाई बुझाएको मौद्रिक नीतिसम्बन्धि सुझाब पत्रमा आर्थिक वर्ष २०७८/७९ को बजेट वक्तव्यको बुंदा नं. ६८ मा उल्लेखित युवा उद्यमीहरुलाई स्टार्टअप व्यवसायमा उत्प्रेरित गर्न प्रदान गरिने बीउ पूँजी कर्जा सम्बन्धी व्यवस्थाको कार्यान्वयन गरिनुपर्ने उल्लेख गरिएको छ।

जसअन्तरगत साना तथा मझौला उद्यमी स्टार्टअपलाई पूंजी उपलब्ध गराउन कुल लगानीको १० प्रतिशत परियोजना धितोमा कर्जा प्रवाह गरिनु पर्ने भनिएको छ।

त्यसैगरि साना उद्यम एवं स्टार्टअपलाई निशुल्क वा न्युन शुल्कमा क्रेडिट रेटिङ गर्न सकिने व्यवस्था गर्नुपर्ने सुझाब दिईएको छ भने महासंघले यस सम्बन्धमा विस्तृत सम्भाव्यता अध्ययन गरी यसको प्रतिवेदन पेश गर्ने जानकारी समेत दिईएको छ ।

महासंघले स्टार्टअपका साथै डिजिटल बैंकिङ्गलाई समेत प्रबद्र्धन गर्न सुझाबमा उल्लेख गरेको छ।

यसअन्तरगत अनलाइन भुक्तानीलाई प्रोत्साहन गर्न तथा बैंकहरुमा भौतिक उपस्थिति कम गरी कोभिड संक्रमण कम गर्न अन्तर बैंक एटीम प्रयोग तथा अनलाइन भुक्तानीलाई सहज बनाउन यसमा लाग्ने शुल्क घटाउनुपर्ने सुझाब महासंघको छ।

यसका साथै सुशासन कायम गर्न समेत महत्वपूर्ण हुने भएकोले सरकारी सेवाको भुक्तानी गर्दा सेवाग्राही र सेवा प्रदायकबीच भौतिक सम्पर्क नहुने गरी भुक्तानी प्रणालीको विस्तार एवं व्यवस्थित गरिनुपर्ने भनिएको छ ।

कर्जालाई डिजिटल माध्यमबाट समेत उपलब्ध गराउने गरि हाल केहि बैंकले शुरु गरेको कर्जा सुविधाको विस्तारका लागि आवश्यक नीतिगत एवं पूर्वाधार बिकास गर्नुपर्ने समेत महासंघले केन्द्रिय बैंकलाई दिएको सुझाब पत्रमा उल्लेख छ ।

यसका साथै एफएनसीसीआईले आर्थिक पुनरुत्थान, तलरता व्यवस्थापन, अर्थतन्त्रमा सुधारलगायतका विषयहरुमा सुझाब दिएको छ ।