ताजा समाचार

स्थानीय वासिन्दा सञ्चार सेवाबाट वञ्चित

स्थानीय वासिन्दा सञ्चार सेवाबाट वञ्चित
Global IME Bank

डडेल्धुराको भित्री मधेश क्षेत्र रहेको परशुराम नगरपालिकाका विभिन्न गाँउका स्थानीय वासिन्दा सञ्चार सेवाबाट वञ्चित रहेका छन् ।

डडेल्धुराका ती गाँउहरूमा सामान्य मोबाइल फोन गर्न पनि नेटवर्क नभएको परशुराम नगरपालिका –११ का वडा अध्यक्ष मानबहादुर महराले बताए । परशुराम–११ का एकलेगडा, पातल, सिमलवण्डा, सलेता, पलगडीलगायतका दर्जनभन्दा बढी गाउँमा सञ्चारको पहुँच नभएको वडा अध्यक्ष महराले बताए ।

टेलिफोन सेवा प्रदान गर्ने भन्दै नेपाल टेलिकमको टावर निर्माण भएको दुई वर्षभन्दा बढी हुँदा समेत लाइन नदिएका कारण स्थानीय बासिन्दा सञ्चार सेवाबाट वञ्चित रहनुपरेको बताइएको छ ।

अधिकांश स्थानीय तहका गाउँमा सञ्चार सुविधा पुगे पनि डडेलधुराको आधा जनसङ्ख्या रहेको भित्री मधेशका जनताले भने हालसम्म नेपाल टेलिकमको सञ्चार सेवाबाट वञ्चित हुनुपरेको परशुराम नगरपालिका–११ का स्थानीय लक्ष्मणदत्त भट्टले बताए ।

‘सो क्षेत्रमा एनसेलको मात्रै पहुँच छ । तर, नेपाल टेलिकमको छैन । टेलिकमको टावर निर्माण भएको दुई वर्ष हुँदा समेत लाइन छोडिएको छैन,’ वडा सदस्य प्रताप महराले भने ।

विद्युतले ढिलो गरेको र ट्रान्सफर्मर’ नहुँदा लाइन छोड्न नसकेको नेपाल टेलिकमका इन्जिनियर मोहन जोशीले बताए । ‘अहिले विद्युत्ले ट्रान्सफर्मर’ उपलब्ध गराइदिने कुरा गरेको छ । अब एक महिनाभित्र लाइन जोडिन्छ,’ जोशीले भने ।

अहिले विद्यार्थीको पढाइ अनलाइनबाट भइरहँदा यहाँका विद्यार्थी टेलिकमको सेवा नहुँदा पढाइबाट वञ्चित रहेको शिक्षक गणेश भाट बताउँछन् ।

टेलिफोन टावर बने पनि लाइन नहुँदा विद्यार्थीदेखि स्थानीय सबैलाई समस्या भएकाले तत्काल लाइन छोड्न स्थानीयले आग्रह गरेको बताइएको छ । गोरखापत्र दैनिकबाट

Sajilo Visa
easy care