काठमाडौं ।
एप्पलले अक्टोबर २८ मा टचस्क्रिनसहितको आफ्नो पहिलो ओएलईडी म्याकबुक सार्वजनिक गर्ने भएको छ। कम्पनीले ‘प्रो एन्ड टेल’ नारासहित आधिकारिक निमन्त्रणा पठाएको छ।
यसले यसअघि सार्वजनिक भएका रिपोर्टलाई समर्थन गरेको छ। नयाँ ओएलईडी डिस्प्ले र टच सुविधा भएका म्याकबुक प्रो सार्वजनिक हुने अपेक्षा गरिएको छ। यसका साथै अपडेट गरिएको आईम्याक र ओएलईडी डिस्प्लेसहितको आईप्याड मिनी पनि सार्वजनिक हुन सक्नेछन्।
जीएसएमएरिनाका अनुसार आईकू नियो १२ अक्टोबर २८ मा चीनमा सार्वजनिक हुँदैछ। कम्पनीले फोनको डिजाइन र तीन रङ विकल्प सार्वजनिक गरेको छ।
फोन फियर्स एज, स्याडो ब्ल्याक र फ्रस्ट ब्लेड ब्लु रङमा उपलब्ध हुनेछ। यसमा स्न्यापड्रागन ८ एलिट जेन ५ चिपसेट, छुट्टै क्यू३ गेमिङ चिप र १८५ हर्जको एमोलेड डिस्प्ले हुनेछ। यसमा ९ हजार एमएएच क्षमताको ब्याट्री पनि रहने बताइएको छ।
आईफोन डुओको ढुवानी यसै साता सुरु भएको छ। अब यसमा ४ हजार ८८३ एमएएच क्षमताको ब्याट्री रहेको जानकारी सार्वजनिक भएको छ।
ओप्पो फाइन्ड एक्स१० र फाइन्ड एक्स१० प्रो म्याक्स अब विश्व बजारमा उपलब्ध भएका छन्। फाइन्ड एक्स१० को मूल्य १ हजार ३०० युरो वा १ हजार १०० पाउन्डबाट सुरु हुन्छ भने फाइन्ड एक्स१० प्रो म्याक्सको मूल्य १ हजार ८०० युरो वा १ हजार ५०० पाउन्ड छ।
फाइन्ड एक्स१० प्रो म्याक्समा नयाँ २ न्यानोमिटर प्रविधिमा आधारित डाइमेन्सिटी ९६०० प्रो चिपसेट, ६.७८ इन्चको १४४ हर्ज एमोलेड डिस्प्ले र तीनवटा २०० मेगापिक्सेलका क्यामेरा छन्।
सामान्य फाइन्ड एक्स१० मा डाइमेन्सिटी ९६००एम चिपसेट र दुईवटा २०० मेगापिक्सेलका क्यामेरा छन्। रोचक कुरा, यी दुवै फोनमा युरोपमा ७ हजार १५० एमएएच क्षमताका साना ब्याट्री उपलब्ध छन्। चीन र अन्य बजारमा भने ८ हजार एमएएच क्षमताका ब्याट्री दिइएका छन्।
एप्पलले आफ्नो सेल्फ सर्भिस रिपेयर स्टोरमार्फत आईफोन १८ प्रो र १८ प्रो म्याक्सका प्रतिस्थापन पार्टपुर्जा तथा मर्मतका उपकरण बिक्री गर्न थालेको छ। प्रतिस्थापन डिस्प्लेको मूल्य प्रोका लागि ३२९ डलर र प्रो म्याक्सका लागि ३७९ डलर छ।
ब्याट्रीको मूल्य १२९ डलर छ। पुरानो ब्याट्री फिर्ता गर्दा यसको मूल्य करिब ६७ डलर पर्छ। नयाँ भेरिएबल अपर्चर क्यामेराको मूल्य २४९ डलर छ। पुरानो पार्टपुर्जा फिर्ता गरेपछि प्राप्त हुने रकम समायोजन गर्दा यसको मूल्य करिब १८९ डलर पर्छ।
ओम्डियाका अनुसार भारतको स्मार्टफोन बजारले सन् २०१६ यताकै कमजोर तेस्रो त्रैमासिक अनुभव गरेको छ। गत वर्षको सोही अवधिको तुलनामा स्मार्टफोन ढुवानी २६ प्रतिशतले घटेर ३ करोड ५८ लाख थानमा झरेको छ।
६७ लाख थान स्मार्टफोन ढुवानी गर्दै सामसङले बजारमा पुनः पहिलो स्थान हासिल गरेको छ। कम्पनीको बजार हिस्सा १९ प्रतिशत छ। त्यसपछि भिभोले ६४ लाख, ओप्पोले ४९ लाख, साओमीले ४७ लाख र एप्पलले ३९ लाख थान स्मार्टफोन ढुवानी गरेका छन्। मूल्य वृद्धि र उपभोक्ताले खर्च गर्दा अपनाएको सावधानी बजार घट्नुका मुख्य कारण रहेको रिपोर्टमा उल्लेख छ।
यसैबीच, साओमीले रेडमी के१०० अक्टोबर २८ मा चीनमा सार्वजनिक हुने पुष्टि गरेको छ। यसमा १० हजार एमएएच क्षमताको ठूलो ब्याट्री, १०० वाटको चार्जिङ सुविधा, स्न्यापड्रागन ८ एलिट चिपसेट र ६.८३ इन्चको एमोलेड डिस्प्ले हुनेछ।
सामसङले पाँच वर्षका लागि ठूलो परिमाणमा मेमोरी चिप आपूर्ति गर्ने सम्झौतामा हस्ताक्षर गरेको पनि रिपोर्ट आएको छ। सन् २०२७ का लागि कम्पनीको डीआरएएम उत्पादनको ७० प्रतिशत र एचबीएम उत्पादनको सम्पूर्ण हिस्सा यसअघि नै बुक भएको बताइएको छ।
यसका कारण मेमोरी चिपको अभाव बढ्ने र मूल्य महँगिने अपेक्षा गरिएको छ। यसले ग्यालेक्सी एस२७ सिरिजसहित आगामी स्मार्टफोनको मूल्यसमेत बढाउन सक्नेछ।
प्रकाशित: ८ कार्तिक २०८३, आईतवार
