यस्तो छ यूरोपसहित विभिन्न देशका सरकारी वेबसाइट बन्द हुनुको कारण

काठमाडौं ।

व्यापक रूपमा प्रयोग हुने एउटा प्रोग्रामिङ भाषामा गम्भीर सुरक्षा कमजोरी भेटिएपछि आफ्ना प्रणाली सुरक्षित गर्न वेबसाइट सञ्चालकहरू सक्रिय हुँदा बुधबार युरोप र अन्य क्षेत्रका सरकारी वेबसाइटहरू अफलाइन भएका छन्।

पीएचपी प्रोग्रामिङ भाषाका विकासकर्ताहरूले मंगलबार दुईवटा गम्भीर सुरक्षा कमजोरी पत्ता लगाएको बताएका थिए। उनीहरूले समस्या समाधान गर्ने अद्यावधिक संस्करण उपलब्ध हुनेबित्तिकै आफ्ना वेबसाइट अपडेट गर्न प्रयोगकर्ताहरूलाई आग्रह गरेका थिए।

ह्याकरहरूले ती कमजोरीको फाइदा उठाउँदै वेबसाइटहरूमा प्रवेश गर्न थालिसकेको खबर आएपछि नेदरल्यान्ड्स र फिनल्यान्डका सरकारी निकायले सावधानीका रूपमा आफ्ना वेबसाइट अफलाइन राखेका थिए।

रोयटर्सका अनुसार इन्टरनेटको ठूलो हिस्सा पीएचपीमा आधारित रहेकाले धेरै वेबसाइट साइबर आक्रमणको जोखिममा पर्न सक्ने चिन्ता बढेको छ।

साइबर सुरक्षा कम्पनी हन्ट्रेसले आफ्नो ब्लगमा भनेको छ, “पीएचपी जताततै छ। यसले चुपचाप वर्डप्रेस, ड्रुपल, जूम्ला र मजेन्टो वेबसाइट, साझा होस्टिङ प्लेटफर्म, कन्ट्रोल प्यानल तथा पर्दापछाडि पीएचपी प्रयोग गरिरहेको जानकारीसमेत नदिने धेरै सफ्टवेयर सञ्चालन गरिरहेको छ।”

वेब तथा क्लाउड सुरक्षा कम्पनी क्लाउडफ्लेयरका प्रमुख प्रविधि अधिकृत डेन नेख्टले आक्रमणहरू देखिन थालेको र तत्कालका लागि जोखिम कम गर्न कम्पनीले आफ्नो फायरवालका नियमहरू अद्यावधिक गरिरहेको बताएका छन्।

उनले सामाजिक सञ्जाल एक्समा भनेका छन्, “हामीले सुरुवाती आक्रमणहरू देखिरहेका छौँ र आक्रमणका नयाँ तरिकाहरू देखापर्दै जाँदा जोखिम कम गर्ने उपायहरू अद्यावधिक गरिरहेका छौँ। यो अस्थायी उपाय मात्र हो। पीएचपीले अद्यावधिक संस्करण जारी गर्नेबित्तिकै अपडेट गर्नुहोस्।”

वर्डप्रेस वेबसाइटलाई सुरक्षित राख्ने सुरक्षा प्लगइन वर्डफेन् ले सबै वर्डप्रेस वेबसाइट पीएचपी जडान गरिएको सर्भरमा सञ्चालन हुने बताएको छ। उसले स्वचालित अपडेटबाट यो समस्या समाधान नहुने चेतावनी दिँदै आफ्नो वेबसाइटमा पीएचपी अपडेट गर्ने जिम्मेवारी कसको हो भन्ने पत्ता लगाउन वेबसाइट सञ्चालकहरूलाई सुझाव दिएको छ।

युरोप, अस्ट्रेलिया, जापान र बेलायतका साइबर सुरक्षा निकायहरूले PHP प्रयोगकर्ताहरूलाई तत्काल अपडेट गर्न वा सुरक्षा सुधारसम्बन्धी प्याच लागू गर्न नसकिएसम्म वेबसाइट अफलाइन राख्न आग्रह गरेका छन्। नेदरल्यान्ड्सको साइबर सुरक्षा निकायले पनि सुरक्षा कमजोरीका कारण सावधानीस्वरूप आफ्नो वेबसाइट अफलाइन राखेको जनाएको छ।

अधिकारीहरूले पीएचपी ५ र त्यसपछिका सबै संस्करण प्रभावित हुन सक्ने बताएका छन्। तर पीएचपीले कुन-कुन संस्करणमा सुरक्षा कमजोरी रहेको छ भन्नेबारे अझै खुलाएको छैन।