काठमाडौं ।
मेटाले ओपनएआई, एन्थ्रोपिक र गुगलले विकास गरेका एआई प्रणालीसँग प्रत्यक्ष प्रतिस्पर्धा गर्ने उद्देश्यले दुई नयाँ कृत्रिम बुद्धिमत्ता (एआई) मोडेल सार्वजनिक गरेको छ।
कम्पनीले सोमबार जारी गरेको विज्ञप्तिअनुसार ‘म्युज वन्डर’ र ‘म्युज वन्डर फुल’ हालसम्मका उसका सबैभन्दा सक्षम एआई मोडेल हुन्। यी मोडेल व्यक्तिगत तथा व्यावसायिक प्रयोजनका एआई एजेन्टका लागि तयार पारिएका हुन्।
यी मोडेलले लामो समय लाग्ने काम गर्न, कम्प्युटर प्रयोग गर्न तथा कानुन, वित्त र स्वास्थ्य सेवाजस्ता विशेष क्षेत्रका काम गर्न सक्छन्।
मेटाका अनुसार यी मोडेलले जटिल कोडिङ परियोजनामा काम गर्न, साना एआई एजेन्टलाई काम बाँड्न र गल्ती हुँदा मूल उद्देश्य नछाडिकन पुनः काम अघि बढाउन सक्छन्।
यी मोडेलको प्रमुख विशेषतामध्ये ‘एक्टिभ मेमोरी’ पनि एक हो। यसले एआईलाई प्रयोगकर्तासँग भएका विभिन्न कुराकानीबाट महत्त्वपूर्ण जानकारी सुरक्षित राख्न र आवश्यक परेको बेला पुनः प्रयोग गर्न मद्दत गर्छ।
त्यस्तै ‘एक्टिभ फोकस’ सुविधाले कठिनाइ सामना गर्दा पनि एआई एजेन्टलाई निर्धारित काममै केन्द्रित रहन सहयोग गर्छ। यसले वैकल्पिक उपाय अपनाउने, नयाँ जानकारीअनुसार आफूलाई अनुकूल बनाउने र आवश्यक पर्दा प्रयोगकर्तासँग थप स्पष्टता माग्ने काम गर्छ।
मेटाका अनुसार यी मोडेलले भाडा सम्झौता बुझ्न, बिमा दाबी प्रक्रियामा सहयोग गर्न, वित्तीय विवरण विश्लेषण गर्न र एप बनाउनसम्मका काममा प्रयोगकर्तालाई सहयोग गर्न सक्छन्।
टेलिग्राफका अनुसार ‘म्युज वन्डर’ अहिले कम्पनीको मेटा मोडल एपीआई र ‘म्युज कोड’ प्रोग्रामिङ उपकरणमार्फत विकासकर्ताका लागि उपलब्ध छ। अझ सक्षम ‘म्युज वन्डर फुल’ भने सशुल्क म्युज कोड सदस्यतामार्फत उपलब्ध छ। मेटाका सबैभन्दा उन्नत टेम्प्लेट प्रयोग गर्न मासिक ५० अमेरिकी डलरदेखि सदस्यता योजना सुरु हुन्छ।
म्युज वन्डरलाई पछि मेटाको व्यक्तिगत एआई सहायक ‘म्युज’ मा पनि समावेश गरिनेछ। सुरुमा यो सुविधा सशुल्क सदस्यका लागि उपलब्ध हुनेछ।
मेटाले सार्वजनिक गरेको तुलनात्मक नतिजाअनुसार कोडिङ, मेमोरी र व्यावसायिक कामसम्बन्धी केही परीक्षणमा यी मोडेलले ओपनएआई र एन्थ्रोपिकका विभिन्न प्रणालीसरह वा तिनको भन्दा राम्रो प्रदर्शन गरेका छन्। यद्यपि, मोडेलको समग्र क्षमताबारे निष्कर्ष निकाल्न स्वतन्त्र परीक्षण आवश्यक पर्नेछ।
कम्पनीले ‘वन्डर’ मोडेल परिवारलाई निजी जानकारीको सुरक्षा गर्न, हानिकारक गतिविधिमा सहयोग गर्न अस्वीकार गर्न र साइबर आक्रमणविरुद्ध सुरक्षा बलियो बनाउन तालिम दिएको जनाएको छ। यसको सुरक्षासम्बन्धी विस्तृत प्रतिवेदन पछि सार्वजनिक गरिनेछ।
यो सार्वजनिकरण मेटाले एआई विकासमा अघि बढाएको व्यापक प्रयासको हिस्सा हो। कम्पनीका प्रमुख कार्यकारी अधिकृत मार्क जुकरबर्गले यस लक्ष्यलाई ‘पर्सनल सुपरइन्टेलिजेन्स’ अर्थात् प्रयोगकर्ताका दीर्घकालीन लक्ष्य, रुचि र आवश्यकता बुझ्न सक्ने एआई प्रणालीको विकासका रूपमा व्याख्या गर्दै आएका छन्।
प्रकाशित: १ कार्तिक २०८३, शनिबार
