अमेरिकाले इरानसँग सम्बन्धित क्रिप्टो एक्सचेन्ज ‘बिटबैंक’ माथि लगायो प्रतिबन्ध

काठमाडौं ।

अमेरिकाले इरानमा हुने विदेशी आर्थिक प्रवाह रोक्न कडा कदमहरू चालिरहेको छ। यसै प्रयासको एक भागका रूपमा, अमेरिकाले क्रिप्टोकरेन्सी एक्सचेन्ज ‘बिटबैंक’ (BitBank) माथि प्रतिबन्ध लगाएको छ। बिटबैंकमाथि होर्मुज जलमार्ग हुँदै आवतजावत गर्ने जहाजहरूको ‘टोल’ (शुल्क) भुक्तानीको प्रक्रिया मिलाएको आरोप लागेको छ। होर्मुज हाल इरानको नियन्त्रणमा रहेको जलमार्ग हो।

बिटबैंकका मालिक इरानी अर्बपति बाबक जान्जानि हुन्। सरकारी स्वामित्वको ‘नेशनल इरानियन आयल कम्पनी’ बाट लाखौं डलर हिनामिना गरेको अभियोगमा सन् २०१६ मा जान्जानिलाई मृत्युदण्डको सजाय सुनाइएको थियो; यद्यपि, गत वर्ष उनको सजाय घटाइएको थियो। त्यसयता, जान्जानिले इरानी सरकारसँग जोडिएका परियोजनाहरूलाई निरन्तर सहयोग गर्दै आएका छन्। हालै, उनीसँग सम्बन्धित अन्य नौओटा कम्पनीहरूमाथि पनि प्रतिबन्ध लगाइएको छ।

एक सञ्चार रिपोर्टका अनुसार, अमेरिकी अर्थ मन्त्रालयअन्तर्गतको ‘अफिस अफ फरेन एसेट्स कन्ट्रोल’ ले जनाएअनुसार, गत जुन महिनामा जान्जानिले बिटबैंकको प्रयोग गरी लाखौं डलर बराबरको बिटक्वाइन इरानको ‘इस्लामिक रिभोलुसनरी गार्ड कोर्प्स’ लाई हस्तान्तरण गरेका थिए।

अमेरिकाले बिटबैंकको सफ्टवेयर विकासकर्ता कम्पनी ‘पिश्ताज सिमोरघ इलेक्ट्रोनिक ट्रेड कम्पनी’ तथा जान्जानिसँग जोडिएका अन्य व्यक्तिहरूमाथि पनि प्रतिबन्ध लगाएको छ।