ओपनएआईमा लगानी गर्न ११ अर्ब डलरको बन्ड जारी गर्दै सफ्टबैंक

काठमाडौं ।

सफ्टबैंक ग्रुप कर्पोरेसनले ओपनएआईमा आफ्नो लगानीका लागि रकम जुटाउन १० अर्ब डलर र १ अर्ब युरो (करिब १.१५ अर्ब डलर) बराबरका वरिष्ठ असुरक्षित बन्ड बिक्री सुरु गरेको छ। सोमबार सार्वजनिक गरिएको टर्म सिटअनुसार यस्तो बिक्री गर्न लागिएको हो।

डलरमा आधारित बन्डलाई साढे ३ वर्ष, साढे ५ वर्ष र साढे ७ वर्ष अवधिमा विभाजन गरिएको छ। यूरोमा आधारित बन्ड भने ४ वर्ष र ६ वर्ष अवधिका हुनेछन्।

रोयटर्सका अनुसार प्रस्तावित आकारमा बन्ड बिक्री पूरा भएमा यो एसिया प्रशान्त र जापानमा गैर-वित्तीय कम्पनीले जारी गरेको अहिलेसम्मकै ठूलो कर्पोरेट बन्ड कारोबार हुनेछ। एलएसईजीको तथ्यांकअनुसार यसले जनवरी २०२१ मा सेभेन-इलेभेन इंकले बिक्री गरेको १० अर्ब ९३ करोड डलरको बन्ड कारोबारलाई पछि पार्नेछ।

डिलोजिकको तथ्यांकअनुसार यो चालु वर्ष विश्वभर भएका २० ठूला कर्पोरेट बन्ड कारोबारमध्ये एक पनि हुनेछ।

सफ्टबैंकले टर्म सिटबारे कुनै टिप्पणी नगरेको जनाएको छ।

टर्म सिटअनुसार बन्डबाट प्राप्त रकममध्ये १० अर्ब डलर ओपनएआईमा सफ्टबैंकले गर्न लागेको थप लगानीको तेस्रो चरणको भुक्तानीका लागि प्रयोग गरिनेछ। उक्त लगानी अक्टोबर १ मा पूरा हुने अपेक्षा गरिएको छ। बाँकी रकम कम्पनीका सामान्य प्रयोजनमा प्रयोग गरिनेछ।

सफ्टबैंकले यसअघि ओपनएआईमा लगानी गर्न १० अर्ब डलरको ब्रिज लोन सुविधा सुरक्षित गरेको थियो। टर्म सिटअनुसार नयाँ बन्डबाट प्राप्त रकमले उक्त ब्रिज लोनलाई प्रतिस्थापन गर्नेछ।

बन्डको मूल्य निर्धारण सेप्टेम्बर २४ मा र कारोबारको अन्तिम भुक्तानी तथा हस्तान्तरण सेप्टेम्बर २९ मा हुने अपेक्षा गरिएको छ।

फिच रेटिङ्सले प्रस्तावित बन्डलाई बीबी प्लस रेटिङ दिएको छ।

फिचले जारी गरेको टिप्पणीमा प्रतिबद्ध लगानीका लागि रकम जुटाउँदै गर्दा सफ्टबैंकको ऋण बढ्ने अपेक्षा गरिएको जनाएको छ। तर कम्पनीसँग पर्याप्त तरलता र पुँजी बजारमा पहुँच कायम रहने फिचको अनुमान छ।

टर्म सिटअनुसार डलर बन्डका लागि सिटीग्रुप र युरो बन्डका लागि जेपीमर्गन प्रमुख बुक रनर रहेका छन्।

डलर बन्डका लागि सिटीग्रुप, गोल्डम्यान साक्स, जेपीमर्गन र मोर्गन स्टान्ली संयुक्त ग्लोबल कोअर्डिनेटर रहेका छन्। युरो बन्डका लागि जेपीमर्गन, डोयचे बैंक र गोल्डम्यान साक्सले यही भूमिका निर्वाह गर्नेछन्।