अब जुनसुकै विद्युतीय कारलाई वायरलेस चार्ज गर्न सकिने

काठमाडौं ।

इजरायली कम्पनी इलेक्ट्रोन वायरलेसले जर्मनीको ह्यानोभरमा आयोजित आईएए ट्रान्स्पोर्टेशन मेलामा लाइट डीओटी प्रणाली सार्वजनिक गरेको छ। यसले विद्युतीय कार र हल्का व्यावसायिक सवारीलाई वायरलेस रूपमा चार्ज गर्न सक्ने कम्पनीले जनाएको छ।

यो प्रणाली निजी पार्किङ स्थल र साना सवारीसाधनका आधारस्थलमा प्रयोग गर्नका लागि बनाइएको हो। यसलाई राजमार्ग वा सार्वजनिक यातायातका मार्गमा प्रयोग गर्ने उद्देश्य राखिएको छैन।

लाइट डीओटीले पार्किङ सतहमा राखिने प्लेट र भित्तामा जडान गरिने नियन्त्रण उपकरणमार्फत ११ किलोवाटसम्मको चार्जिङ शक्ति प्रदान गर्छ। यसका लागि तार, प्लग वा निर्माणसम्बन्धी काम आवश्यक पर्दैन। गाडी प्लेटमाथि पार्क गरेपछि प्रणालीले गाडी पहिचान गर्छ र चार्जिङ स्वतः सुरु हुन्छ।

यस प्रणालीमा चुम्बकीय इन्डक्सन प्रविधि प्रयोग गरिएको छ। गाडीको तल्लो भागमा सम्बन्धित मोडलअनुसार जडान गरिएको रिसिभिङ कोइलले ऊर्जा स्थानान्तरणका लागि आवश्यक सम्पर्क बनाउँछ।

टेलिग्राफका अनुसार नियन्त्रण उपकरण ग्यारेजको भित्तामा वा बाहिर पोलमा जडान गर्न सकिन्छ। चार्जिङ प्रक्रिया इलेक्ट्रोन फ्लो एपमार्फत व्यवस्थापन गरिन्छ। यो प्रणाली माइनस ३० देखि ५० डिग्री सेल्सियससम्मको तापक्रममा सञ्चालन गर्न सकिन्छ भने वर्षा र हिउँमा पनि प्रयोग गर्न मिल्ने कम्पनीले जनाएको छ।

तर कम्पनीले अहिलेसम्म यसको मूल्य, बजारमा ल्याउने मिति वा सुरुवातमा कुन बजारमा उपलब्ध हुने भन्ने जानकारी दिएको छैन। इलेक्ट्रोनले लाइट डीओटीको कार्यक्षमतासम्बन्धी तथ्यांक पनि सार्वजनिक गरेको छैन।

इजरायलको रोश हआइनस्थित बस स्टेसनमा कम्पनीले यस्तै वायरलेस चार्जिङ प्रविधि प्रयोग गरिरहेको छ। त्यहाँको तथ्यांकअनुसार प्रणालीले ८९.३ प्रतिशत ऊर्जा दक्षता हासिल गरेको थियो भने ९९ प्रतिशत समय प्रणाली सञ्चालनमा रहेको थियो।