काठमाडौं ।
भारतको टाटा कन्सल्टेन्सी सर्भिसेस (टीसीएस) को सहायक कम्पनी हाइपरभल्ट र उसका साझेदारहरूले तेलंगाना राज्यमा एआई डाटा सेन्टर क्याम्पस निर्माणका लागि ७०० अर्ब भारतीय रुपैयाँ (करिब ७.४१ अर्ब अमेरिकी डलर) सम्म लगानी गर्ने भएका छन्।
टीसीएसले शनिबार दिएको जानकारीअनुसार हैदराबादमा निर्माण हुने उक्त डाटा सेन्टर क्याम्पसको क्षमता १ गिगावाट हुनेछ। परियोजना विभिन्न चरणमा विकास गरिनेछ।
टीसीएसको सहायक कम्पनी हाइपरभल्टले परियोजनाका लागि हैदराबादमा २६४ एकड जमिन सुरक्षित गरिसकेको छ। उक्त क्याम्पस विशेषगरी एआई कम्पनी र हाइपरस्केलरका लागि लक्षित हुनेछ।
डाटा सेन्टरमा एआई तालिम तथा इन्फरेन्सका लागि आवश्यक उच्च घनत्वका जीपीयू (ग्राफिक्स प्रोसेसिङ युनिट) जडानलाई समर्थन गर्ने पूर्वाधार विकास गरिने कम्पनीले जनाएको छ।
पूर्ण रूपमा निर्माण सम्पन्न भएपछि यो क्याम्पस भारतकै सबैभन्दा ठूला एआई पूर्वाधार सुविधामध्ये एक बन्ने हाइपरभल्टको अपेक्षा छ।
टीसीएसका प्रमुख कार्यकारी अधिकृत के. कृष्णिवासनले विश्वभरका ग्राहकलाई सेवा दिन आवश्यक पूर्वाधार विस्तारका लागि हैदराबादमा आवश्यक स्तरको जनशक्ति, प्रतिभा र प्रविधि पारिस्थितिक प्रणाली रहेको बताएका छन्।
टीसीएसले परम्परागत आईटी सेवाभन्दा बाहिर आफ्नो व्यवसाय विस्तार गरिरहेका बेला यो लगानी घोषणा भएको हो। केही दिनअघि मात्र टीसीएसले जर्मन लक्जरी कार निर्माता पोर्शे एजीको अटोमोटिभ तथा कन्सल्टिङ युनिट एमएचपीलाई ३७ करोड ३० लाख डलरमा खरिद गर्ने सम्झौता गरेको थियो।
एआईको बढ्दो प्रयोगसँगै विश्वभर उच्च क्षमताका डेटा सेन्टर तथा जीपीयू पूर्वाधारको माग बढिरहेको समयमा टीसीएसले भारतमा ठूलो एआई पूर्वाधार परियोजना अघि बढाउन लागेको हो।
प्रकाशित: २१ भाद्र २०८३, आईतवार
