काठमाडौं ।
दुई ठूला संगीत प्रकाशन समूहले संयुक्त रूपमा एन्थ्रोपिकविरुद्ध मुद्दा दायर गर्दै कम्पनीले ‘इतिहासमै बौद्धिक सम्पत्तिको सबैभन्दा ठूलो र स्पष्ट चोरीमध्ये एक’ गरेको आरोप लगाएका छन्।
सोनी म्युजिक पब्लिसिङ र वार्नर च्यापेल म्युजिकले शुक्रबार एन्थ्रोपिकविरुद्ध उजुरी दायर गरेका हुन्। उजुरीमा एन्थ्रोपिकले आफ्नो क्लाउड एआई मोडललाई तालिम दिन ठूलो मात्रामा प्रतिलिपि अधिकार भएका सामग्री अवैध रूपमा डाउनलोड, स्क्र्याप र टोरन्ट गरेको आरोप लगाइएको छ।
दुवै संगीत प्रकाशकले जुरी ट्रायलको माग गरेका छन्। साथै, उल्लंघन गरिएको प्रत्येक सामग्रीका लागि १ लाख ५० हजार डलरसम्म र एन्थ्रोपिकले प्रतिलिपि अधिकार व्यवस्थापनसम्बन्धी जानकारी हटाएको प्रत्येक घटनाका लागि २५ हजार डलरसम्म क्षतिपूर्ति माग गरिएको छ।
इन्य्याजेटका अनुसार उजुरीमा क्लाउड एआई मोडललाई तालिम दिन ‘हजारौं संगीत प्रकाशकका प्रतिलिपि अधिकार भएका संगीत रचनाहरू’ अवैध रूपमा संकलन गरिएको आरोप लगाइएको छ। यस आधारमा क्षतिपूर्ति अर्बौं डलरसम्म पुग्न सक्ने देखिएको छ।
यस मुद्दाबारे प्रतिक्रिया लिन एन्थ्रोपिकसँग सम्पर्क गरिएको छ। कम्पनीको प्रतिक्रिया प्राप्त भएपछि समाचार अद्यावधिक गरिनेछ।
यसअघि पनि यसै वर्ष दुई अन्य प्रमुख संगीत प्रकाशन कम्पनीले एन्थ्रोपिकविरुद्ध मुद्दा दायर गरेका थिए। कन्कर्ड म्युजिक ग्रुप र युनिभर्सल म्युजिक ग्रुपले एआईलाई तालिम दिन एन्थ्रोपिकले २० हजारभन्दा बढी प्रतिलिपि अधिकार भएका गीत अवैध रूपमा डाउनलोड गरेको आरोप लगाएका थिए। उनीहरूले उक्त मुद्दामा ३ अर्ब डलरभन्दा बढी क्षतिपूर्ति माग गरेका थिए।
यसअघि लेखकहरूको एक समूहले पनि एन्थ्रोपिकविरुद्ध प्रतिलिपि अधिकारसम्बन्धी मुद्दा दायर गरेको थियो। लेखकहरूले कम्पनीले आफ्ना संरक्षित सामग्रीका पाइरेटेड प्रतिहरू प्रयोग गरेर एआई मोडललाई तालिम दिएको आरोप लगाएका थिए। एन्थ्रोपिकले उक्त मुद्दा १.५ अर्ब डलरमा मिलाएको थियो, जुन यस प्रकारको मुद्दामा रेकर्ड रकम थियो।
प्रकाशित: १५ भाद्र २०८३, सोमबार
