काठमाडौं ।
तपाईंले इन्स्टाग्रामबाहिर गरेको गतिविधिलाई आफूले देख्ने विज्ञापनमा प्रभाव पार्नबाट इन्स्टाग्रामलाई रोक्न सक्नुहुन्छ।
इन्स्टाग्रामले कुनै विज्ञापन लगभग हाम्रो मन पढेजसरी देखाउन सक्छ। अर्को वेबसाइटमा कुनै उत्पादन हेर्नुभयो भने केही मिनेटमै त्यही उत्पादनको विज्ञापन तपाईंको फिडमा देखिन सक्छ।
यस्तो अस्वाभाविक रूपमा सटीक देखिए पनि मेटाका अनुसार ती विज्ञापन देखाउन तपाईंको फोनको माइक्रोफोन प्रयोग गरेर कुराकानी सुन्ने गरिँदैन। यसको सट्टा कुनै खुद्रा विक्रेता, एप वा अन्य व्यवसायले तपाईंले आफ्नो वेबसाइटमा गरेको भ्रमण, खरिद वा अन्य गतिविधिबारे जानकारी मेटालाई पठाएको हुन सक्छ।
इन्स्टाग्रामले डाटा संकलन वा प्रयोग गर्नबाट रोक्ने कुनै एउटा मुख्य स्विच छैन। तपाईंले इन्स्टाग्रामभित्र के खोज्नुहुन्छ, हेर्नुहुन्छ, लाइक गर्नुहुन्छ, फलो गर्नुहुन्छ, पोस्ट गर्नुहुन्छ र क्लिक गर्नुहुन्छ भन्नेबाट मेटाले अझै पनि जानकारी लिन सक्छ।
यसले उपकरण र नेटवर्कसम्बन्धी जानकारी, स्थानसँग सम्बन्धित संकेत, व्यवसायबाट प्राप्त डाटा र जोडिएका खाताबीच साझा गरिएको जानकारी पनि प्राप्त गर्छ।
यसबाहेक, मेटा एआईले आफ्ना सिफारिसहरू मिलाउन फेसबुक र इन्स्टाग्रामको गतिविधि पनि प्रयोग गर्न सक्छ। त्यसैले इन्स्टाग्रामले के-कस्तो गतिविधि ट्र्याक गर्न सक्छ भन्ने सीमित गर्न यी प्रत्येक स्रोतका सेटिङ अलग-अलग जाँच गर्नु राम्रो हुन्छ।
अन्य बिजनेसबाट ‘पर्सनलाइज’ हुने फिचर बन्द गर्नुहोस्
मेटाले जुलाई २०२६ देखि ‘एक्टिभिटी फ्रम अदर बिजनेस’ नामको थप व्यापक नियन्त्रण सुविधा प्रयोगमा ल्याउन थालेको छ। यसले ‘योर एक्टिभिटी अफ मेटा टेक्नोलोजिज’ लाई प्रतिस्थापन गर्दै यसअघि रहेको ‘एक्टिभिटी इन्फर्मेशन फ्रम एड पार्टनर्स’ नामको विज्ञापन सेटिङलाई विस्तार गरेको हो।
नयाँ नियन्त्रणले व्यवसायहरूले पहिले नै मेटालाई पठाएको जानकारीलाई विज्ञापन, फिडको सामग्री र एआई प्रतिक्रियालाई व्यक्तिगत बनाउन प्रयोग गर्न पाउने वा नपाउने निर्णय गर्छ।
यो सेटिङ परिवर्तन गर्न इन्स्टाग्राम खोल्नुहोस्, आफ्नो प्रोफाइलमा जानुहोस्, तीनवटा लाइन भएको मेनुमा ट्याप गर्नुहोस् र ‘एकाउन्ट्स सेन्टर‘ खोल्नुहोस्। त्यहाँ ‘एक्टिभिटी फ्रम अदर बिजनेस’ खोज्नुहोस्। मेटाले यो सुविधा देशअनुसार क्रमशः उपलब्ध गराइरहेकाले केही खातामा अझै पनि एड प्रेफरेन्सेज > एड सेटिङ्स > एक्टिभिटी इन्फर्मेशन फ्रम एड पार्टनर्स देखिन सक्छ। मेटालाई यो गतिविधि व्यक्तिगतकरणका लागि प्रयोग गर्न नदिने विकल्प चयन गर्नुहोस्।
यसले व्यवसायहरूलाई डाटा पठाउनबाट रोक्दैन र इन्स्टाग्रामभित्र उत्पन्न भएको गतिविधि मेटाले प्रयोग गर्न पनि रोक्दैन। तपाईंले फलो गरेका खाता, तपाईंले संलग्न भएका पोस्ट वा रील्स, खोजी, विज्ञापनमा गरेका क्लिक, प्रोफाइल विवरण वा विज्ञापनदाताले अपलोड गरेका ग्राहक सूचीका आधारमा अझै पनि विज्ञापन देखिन सक्छन्।
यो सेटिङले मेटाका प्लेटफर्मबाहिरको तपाईंको गतिविधिलाई विज्ञापन अनुभवमा प्रयोग हुनबाट रोक्छ, सबै विज्ञापन व्यक्तिगतकरणलाई बन्द गर्दैन।
युरोपेली क्षेत्रमा ‘एकाउन्ट सेन्टर‘ ले एड प्रेफरेन्सेज > एड सेटिङ्स > एड एक्सपिरियन्स अन्तर्गत व्यक्तिगत वा कम व्यक्तिगतकरण भएका विज्ञापनको विकल्प पनि दिन्छ।
दोस्रो विकल्पले कम संकेत प्रयोग गर्छ। तर मेटाका अनुसार यसले उमेर, स्थान, उपकरणसम्बन्धी जानकारी, विज्ञापनसँगको अन्तरक्रिया र हालको सेसनमा स्क्रिनमा देखिएको सामग्रीजस्ता विवरण अझै प्रयोग गर्न सक्छ।
इन्स्टाग्रामलाई फोन र खातामा पहुँच सीमित गर्नुहोस्
आईफोनमा सेटिङ्स > प्राइभेसी एण्ड सेक्युरिटी > ट्याकिङमा जानुहोस् र इन्स्टाग्रामको अनुमति बन्द गर्नुहोस्। एप्पलको ‘आस्क एप नट टु ट्र्याक’ नियन्त्रणले विज्ञापन वा डाटा ब्रोकरसँग जानकारी साझा गर्नका लागि अन्य कम्पनीका एप र वेबसाइटमा हुने ट्र्याकिङ रोक्छ। तर यसले इन्स्टाग्रामको आफ्नै एपभित्रको गतिविधि रेकर्ड गर्न भने रोक्दैन।
एन्ड्रोइडमा सामान्यतया सेटिङ्स > एपs > इन्स्टाग्राम > पर्मिशन्समा जानुपर्छ। त्यहाँ स्थान, सम्पर्क, फोटो तथा भिडियो, क्यामेरा र माइक्रोफोनको पहुँच जाँच गर्नुहोस् र आवश्यक नभएका अनुमति बन्द गर्नुहोस्।
स्थान बन्द गर्दा प्रत्यक्ष रूपमा प्राप्त हुने एउटा स्रोत हट्छ, तर मेटाले आईपी एड्रेस, नेटवर्कसम्बन्धी जानकारी, उपकरणका संकेत र खाताको गतिविधिबाट तपाईंको स्थान अनुमान गर्न सक्छ।
सम्पर्क सिंक गर्ने सुविधालाई पनि छुट्टै जाँच गर्नुपर्छ। एकाउन्ट्स सेन्टर > योर इन्फर्मेशन एण्ड पर्मिशन्स > अपलोड कन्ट्याक्ट्समा जानुहोस्, इन्स्टाग्राम खाता चयन गर्नुहोस् र प्रत्येक उपकरणमा ‘कनेक्ट कन्ट्याक्ट्स’ बन्द गर्नुहोस्।
यसले भविष्यमा सम्पर्क सिंक हुनबाट रोक्छ, तर यसअघि अपलोड भएका सम्पर्क हटाउँदैन। ती हटाउन इन्स्टाग्राम डटकममा एकाउन्ट्स सेन्टर अन्तर्गत ‘म्यानेज कन्ट्याक्ट्स’ प्रयोग गर्नुहोस्। मेटाका अनुसार सम्पर्क मेटिन ९० दिनसम्म लाग्न सक्छ।
एउटै एकाउन्ट्स सेन्टर मा थपिएका खाताबीचको जानकारी पनि मेटाले विज्ञापन व्यक्तिगतकरण गर्न र फलो गर्न मिल्ने खाता सुझाव दिन प्रयोग गर्छ। एकाउन्ट्स सेन्टर > एकाउन्टस बाट कुनै खाता हटाउँदा त्यो खातालाई उक्त एकाउन्ट्स सेन्टर बाट हटाइन्छ, तर साझा लगइन र अन्य जोडिएका सुविधा बन्द हुन सक्छन्। यसले खाता वा त्यसमा पहिले नै रहेको जानकारी भने मेटाउँदैन।
एआई च्याटबाट मेटाले सिक्ने जानकारी सीमित गर्नुहोस्
मेटाले अधिकांश क्षेत्रमा डिसेम्बर १६, २०२५ देखि आफ्ना एआई सुविधासँगको अन्तरक्रियालाई सामग्री र विज्ञापन व्यक्तिगतकरणका लागि संकेतका रूपमा प्रयोग गर्न थालेको हो।
उदाहरणका लागि, पदयात्राबारे गरिएको कुराकानीले पछि पदयात्रासम्बन्धी पोस्ट वा उत्पादनको सिफारिसमा योगदान गर्न सक्छ। तर मेटाले प्रयोगकर्तालाई मेटा एआईसँग कुराकानी जारी राख्दै ती कुराकानीलाई यस्तो प्रयोगबाट अलग राख्ने छुट्टै सेटिङ भने उपलब्ध गराएको छैन।
यद्यपि, इन्स्टाग्रामका एआई च्याटमा दुईवटा डाटा हटाउने कमान्ड छन्। ‘/रिसेट डट एआई’ टाइप गर्दा उक्त एआईले कुराकानीको राखेको प्रतिलिपि र सुरक्षित गरेको विवरण मेटिन्छ। ‘/रिसेट-अल-एआईज’ टाइप गर्दा एपमा रहेका सबै एआई च्याट रिसेट हुन्छन्।
तपाईंलाई देखिने च्याट भने छुट्टै नमेटेसम्म रहन्छ। यी कमान्डले सुरक्षित गरिएको सन्दर्भ हटाउँछन्, तर विज्ञापनबाट बाहिरिने, सामान्य डाटा संकलन रोक्ने वा मोडल प्रशिक्षणबाट बाहिरिने विकल्प भने होइनन्।
मोडल प्रशिक्षण र व्यक्तिगतकरण फरक विषय हुन्। मेटाले वयस्क खाताबाट सार्वजनिक रूपमा पोस्ट गरिएका सामग्री र कमेन्टसँगै एआई सुविधासँगको अन्तरक्रियालाई जेनेरेटिभ एआई मोडल सुधार गर्न प्रयोग गर्छ।
यस्तो प्रयोग वैध हितमा आधारित हुने क्षेत्रमा यो लागू हुन्छ। युरोपेली संघ र बेलायतका प्रयोगकर्ताले मेटाको प्राइभेसी सेन्टरमार्फत यसको विरोध गर्न सक्छन्। यो अधिकार सबै इन्स्टाग्राम प्रयोगकर्ताका लागि उपलब्ध हुने विश्वव्यापी सेटिङ भने होइन।
मेटा एआई च्याटमा आफ्नो नाम, ठेगाना, आर्थिक विवरण, स्वास्थ्यसम्बन्धी जानकारी वा सार्वजनिक रूपमा पोस्ट गर्न नचाहने अन्य कुनै जानकारी नराख्नुहोस्। एआईले सम्झिराख्न नचाहेको कुराकानीपछि रिसेट कमान्ड प्रयोग गर्नुहोस् र उपलब्ध भएको ठाउँमा आपत्ति जनाउने फारम प्रयोग गर्नुहोस्।
प्रकाशित: ८ भाद्र २०८३, सोमबार
