काठमाडौं ।
गुगलका प्रमुख कार्यकारी अधिकृत सुन्दर पिचाईले एक्समार्फत जेमिनी एप कम्पनीका सबैभन्दा तीव्र गतिमा बढिरहेका उत्पादनमध्ये एक बनेको र हालै यसको मासिक सक्रिय प्रयोगकर्ता १ अर्ब पुगेको घोषणा गरेका छन्।
पिचाईका अनुसार १ अर्ब प्रयोगकर्ता पुग्ने जेमिनी गुगलको १४औँ उत्पादन हो।
यो तीव्र वृद्धिसँगै जेमिनीले ओपनएआईको च्याटजीपीटीसँग पनि गति मिलाएको छ। च्याटजीपीटीले गत जुनमा १ अर्ब मासिक सक्रिय प्रयोगकर्ता पार गरेको थियो।
टेकक्रञ्चका अनुसार गुगलले सर्च, वर्कस्पेस, एन्ड्रोइड र आफ्नै छुट्टै एपलगायत विभिन्न उत्पादनमा जेमिनीलाई निरन्तर समावेश गर्दै आएको छ। विशेषगरी गुगल सर्चमा रहेको एआई मोडले राम्रो सफलता हासिल गरेको छ। यसका विश्वभर १ अर्बभन्दा बढी मासिक सक्रिय प्रयोगकर्ता छन्।
तर आज सार्वजनिक गरिएको तथ्यांक जेमिनी एपका प्रयोगकर्तासँग मात्र सम्बन्धित छ र अन्य माध्यमबाट जेमिनी प्रयोग गर्ने प्रयोगकर्ता यसमा समावेश छैनन्।
गुगलले नयाँ मोडल र सुविधाहरू सार्वजनिक गर्ने क्रमलाई पनि निरन्तरता दिएको छ। यसमा जेमिनी ३.५ फ्ल्यास पनि समावेश छ। गुगलका अनुसार यो कोडिङ र स्वायत्त एआई एजेन्टका कामलाई सुधार गर्न डिजाइन गरिएको हो।
गुगलले मानिसहरूले च्याटबट कसरी प्रयोग गरिरहेका छन् भन्ने तथ्यांक पनि सार्वजनिक गरेको छ। जेमिनीका ६३ प्रतिशत प्रयोगकर्ताले भ्वाइस फिचरमार्फत सहायकसँग प्रत्यक्ष कुराकानी गर्ने गरेका छन्।
गुगलका अनुसार जेमिनीले अहिले दैनिक १५ करोडभन्दा बढी तस्बिर निर्माण गर्छ।
जेमिनीको वृद्धि गुगलका आफ्नै उत्पादनमा मात्र सीमित छैन। कम्पनीका अनुसार आईओएसमा जेमिनीका सक्रिय प्रयोगकर्ता पनि १० करोडभन्दा बढी पुगेका छन्।
यो उपलब्धि गुगलको सन् २०२६ को दोस्रो त्रैमासिक आम्दानी सार्वजनिक गर्ने कार्यक्रमलगत्तै आएको हो। उक्त कार्यक्रममा कम्पनीले जेमिनीका ९५ करोडभन्दा बढी मासिक प्रयोगकर्ता पुगेको जानकारी दिएको थियो। गत एक वर्षमा दैनिक सक्रिय प्रयोगकर्ताको संख्या तीन गुणाले बढेको पनि कम्पनीले जनाएको थियो।
यो घोषणा गुगलको ‘मेड बाइ गुगल’ कार्यक्रमअघि आएको हो। उक्त कार्यक्रममा पिक्सेल उपकरणहरूका लागि जेमिनीमा आधारित थप सुविधाहरू सार्वजनिक हुने अपेक्षा गरिएको छ।
प्रकाशित: २८ श्रावण २०८३, बिहीबार
