काठमाडौं ।
एप्पलले नयाँ पुस्ताको एप्पल इन्टेलिजेन्स सार्वजनिक गरेको छ। कम्पनीले वार्षिक वर्ल्डवाइड डेभलपर्स कन्फ्रेन्स (डब्लूडब्लूडीसी) मा सिरी एआई मुख्य आकर्षणका रूपमा प्रस्तुत गरे पनि आईओएस २७, आईप्याडओएस २७, म्याकओएस २७, वाचओएस २७ र भिजन २७ मा आउने अन्य धेरै एप्पल इन्टेलिजेन्ससुविधाहरू पनि घोषणा गरेको टेलिग्राफले जनाएको छ।
एप्पलका अनुसार फोटोज एपले अब अझ शक्तिशाली इमेज मोडेल प्रयोग गर्ने भएकाले प्रयोगकर्ताले फोटो सम्पादन गर्दा मूल दृश्यको स्वरूप जोगाएर परिवर्तन गर्न सक्नेछन्।
भिजन प्रो हेडसेटको स्थानिक ढाँचाबारेको गहिरो बुझाइ प्रयोग गर्दै स्पाशियल रिफ्रेमिङ सुविधाले फोटोमा ट्याप गरी तानेर वास्तविक समयमा दृष्टिकोण परिवर्तनको पूर्वावलोकन देखाउनेछ।
यसले मूल दृश्यमा क्यामेरा सारिएको जस्तै गरी फोटो सम्पादन गर्न सकिने बनाउँछ। दृष्टिकोण परिवर्तन हुँदा मात्र नयाँ सामग्री सिर्जना हुने भएकाले फोटो मूल दृश्यसँग मिल्दोजुल्दो रहने कम्पनीको भनाइ छ।
एक्सटेण्ड टुलमार्फत तस्बिर विस्तार गर्न सकिनेछ। यसले महत्त्वपूर्ण भाग नहटाई बाङ्गो क्षितिजलाई सीधा बनाउन वा अनुपात परिवर्तन गर्न मद्दत गर्नेछ।
क्लिन अप टुललाई पनि उल्लेखनीय रूपमा सुधार गरिएको छ। एप्पलले जटिल दृश्यहरूमा समेत अझ राम्रो गुणस्तर र यथार्थपरक ढंगले फोटोमा रहेका अनावश्यक वस्तु हटाउन सकिने दावी गरेको छ।
सफारी ब्राउजरमा पनि धेरै एआई सुधार थपिएका छन्। यसले ट्याबहरूलाई स्वचालित रूपमा सम्बन्धित विषयअनुसार व्यवस्थित गर्नेछ। ब्राउजिङका क्रममा नयाँ ट्याबहरूलाई पहिलेका विषय समूहमा राख्ने वा आवश्यक परे नयाँ समूह बनाउनेछ।
टेलिग्रापका अनुसार नयाँ नोटिफाइ मी सुविधाले वेबपेजमा भएका परिवर्तनहरू निगरानी गर्न सक्नेछ। परिवर्तन देखिएमा सफारी ले प्रयोगकर्तालाई जानकारी दिनेछ। यसले वस्तुको उपलब्धता वा मूल्य घटेको जानकारी ट्र्याक गर्न मद्दत गर्नेछ।
डिस्क्राइब द एक्सटेन्सन नामक नयाँ एआई सुविधाले प्रयोगकर्ताले चाहेको सफारी एक्सटेन्सनको विवरण दिएपछि सफारीले त्यसअनुसार कस्टम एक्सटेन्सन तयार गरी टुलबारमा राख्नेछ।
पासवर्ड्स एपले अब कमजोर वा जोखिममा परेका पासवर्डहरू स्वचालित रूपमा सुधार गर्न सक्नेछ। एप्पल इन्टेलिजेन्स र सफारीको सहयोगमा वेबसाइटमा साइन इन गरी बलियो पासवर्ड सेट गर्ने र त्यसलाई सम्झेर राख्ने काम पनि यसले गर्नेछ।
इमेज प्लेग्राउण्डमा अब फोटोरियलिस्टिक शैलीसहित लगभग जुनसुकै शैलीमा उच्च गुणस्तरका तस्बिर बनाउन सकिनेछ। यो एप्पलको प्राइभेट क्लाउड कम्प्युटमा चल्ने नयाँ जेनेरेटिभ मोडेलमा आधारित छ। कम्पनीका अनुसार निजी डाटा सुरक्षित रहनेछ र एप्पलले समेत त्यसमा पहुँच पाउने छैन।
इमेज प्लेग्राउण्डले तस्बिर सम्पादन गर्न पनि सहज बनाउनेछ। कुनै वस्तुमा ट्याप, घेरा वा ब्रस प्रयोग गरी त्यसलाई सार्न वा आकार परिवर्तन गर्न सकिनेछ।
यसले लक स्क्रिन वालपेपर र कन्ट्याक्ट पोस्टर पनि सिर्जना गर्न सक्नेछ। तस्बिर बनाउँदा आवश्यकताअनुसार यसको अनुपात पनि छनोट गर्न सकिनेछ।
मेसेजेज एपले कुराकानीको सन्दर्भअनुसार एक ट्यापमै सुझाव दिनेछ, जस्तै रिमाइन्डर वा नोट बनाउने। कसैले फोटो मागेमा यसले फोटो लाइब्रेरीमा रहेका शब्द, स्थान र व्यक्तिको आधारमा उपयुक्त तस्बिर खोज्न मद्दत गर्नेछ।
मेल एपका सुझावहरू पनि अझ सक्षम भएका छन्। अब तिनले तेस्रो-पक्ष एपहरूसँग काम गर्न सक्नेछन्। मेल र मेसेजेजमा रहेको स्मार्ट रिप्लाई सुविधा अब प्रयोगकर्ताको व्यक्तिगत लेखन शैलीमा आधारित हुनेछ।
व्यवसायलाई फोन गर्दा कल कन्टेक्स्ट सुविधाले पुष्टि कोड वा रिजर्भेसन नम्बरजस्ता सम्बन्धित जानकारी फोन एपमै देखाउनेछ।
यो सुविधा कसलाई फोन गरिएको हो भन्ने आधारमा काम गर्नेछ, के कुरा भइरहेको छ भन्ने आधारमा होइन। साथै सम्पूर्ण प्रक्रिया उपकरणमै हुने भएकाले कुनै जानकारी एप्पल वा अन्य पक्षसँग साझेदारी गरिने छैन।
डिस्क्राइब अ शर्टकट सुविधाले शर्टकट्स एप प्रयोग गर्न अझ सजिलो बनाउनेछ। प्रयोगकर्ताले आफूले के गर्न चाहेको हो भन्ने बताएपछि आवश्यक सबै चरणहरू स्वचालित रूपमा तयार गरिनेछ। परिवर्तन आवश्यक परे त्यसको विवरण दिएर संशोधन गर्न सकिनेछ।
होम एपमा अब स्मार्ट होम उपकरणबाट प्राप्त भिडियो क्लिपहरूको स्वचालित विवरण उपलब्ध हुनेछ, जसले भिडियो नहेरी पनि के भएको थियो भन्ने बुझ्न मद्दत गर्नेछ। क्यामेरा क्लिपहरूमा खोजी गरी प्याकेज डेलिभरीजस्ता विशेष घटनाहरू पनि फेला पार्न सकिनेछ। Search पृष्ठको माथिल्लो भागमा समीक्षा गर्न लायक महत्त्वपूर्ण क्लिपहरू देखाइनेछन्।
भ्वाइस कन्ट्रोल सुविधालाई पनि सुधार गरिएको छ। अब प्रयोगकर्ताले बटन वा नियन्त्रणको ठ्याक्कै नाम वा नम्बर सम्झनु नपरी स्क्रिनमा देखिएको वस्तुको वर्णन गरेर उपकरण सञ्चालन गर्न सक्नेछन्। एक्सेसिबिलिटी रिडरले आवश्यक पर्दा सारांश र अनुवाद पनि उपलब्ध गराउनेछ।
फाइल र फोल्डरको सामग्रीका आधारमा तिनका नामका लागि बुद्धिमत्तापूर्ण सुझाव प्राप्त गर्न सकिनेछ। साथै जेनमोजीको गुणस्तर पनि अझ सुधारिएको एप्पलले जनाएको छ। प्रयोगकर्ताले जेनमोजीमा चाहेको परिवर्तनको विवरण दिन सक्नेछन्।
एप्पल इन्टेलिजेन्स आईफोन १६ र त्यसपछिका मोडेल, आईफोन १५ प्रो, आईफोन १५ प्रो म्याक्स,आईप्याड मिनी (ए१७ प्रो), एम१ वा त्यसपछिका चिप भएका आईप्याड, म्याकबुक निओ, एम१ वा त्यसपछिका चिप भएका म्याक, भिजन प्रो, एप्पल वाच सिरिज १० वा त्यसपछिका मोडेल, एप्पल वाच अल्ट्रा २ वा त्यसपछिका मोडेल तथा एप्पल इन्टेलिजेन्ससमर्थित आईफोनसँग जोडिएको एप्पल वाच एसई ३ मा उपलब्ध हुनेछ।
तस्बिर निर्माणजस्ता केही सुविधामा दैनिक प्रयोग सीमा हुनेछ, जसलाई आईक्लाउड प्लस सदस्यता लिएर बढाउन सकिनेछ। यस्ता योजनामा होम एपमार्फत समर्थित क्यामेराका लागि एप्पल इन्टेलिजेन्ससुविधाहरू पनि समावेश हुने टेलिग्राफले जनाएको छ।
प्रकाशित: २७ जेष्ठ २०८३, बुधबार
