काठमाडौं ।
कम्प्युटर एशोसिएशन नेपाल महासंघ (क्यान महासंघ) र नेपाल मोबाइल डिस्ट्रिब्युटर्स एशोसिएशन (एनएमडीए) बीच नेपालमा मोबाइल उद्योगको विकास र विद्यमान चुनौतीहरू समाधानका लागि रणनीतिक संस्थागत सहकार्य सुरु भएको छ।
क्यान महासंघको खुसिबुस्थित केन्द्रीय कार्यालयमा आइतबार (जेठ १७ गते) दुवै संस्थाको उच्च नेतृत्व तहबीच एक महत्वपूर्ण ‘संस्थागत गठबन्धन छलफल’ (इन्स्टिच्युशनल अलायन्स डिस्कसन मिटिङ) सम्पन्न भएको हो।
मोबाइल इकोसिस्टमको सुधार र नीतिगत पैरवी बैठकमा विशेषगरी नेपालको मोबाइल क्षेत्रले भोगिरहेको नीतिगत अस्पष्टता, अनधिकृत च्यानलबाट भित्रिने मोबाइल (ग्रे मार्केट) का चुनौतीहरू र समग्र हार्डवेयर तथा मोबाइल इकोसिस्टमको नियमनका विषयमा विस्तृत छलफल भएको थियो।
क्यान महासंघका कार्यवाहक अध्यक्ष चिरन्जीवी अधिकारी र नेपाल मोबाइल डिस्ट्रिब्युटर्स एशोसिएशन (एनएमडीए) का अध्यक्ष रघु त्रिपाठीले संयुक्त रूपमा यो सहकार्यले नेपाली मोबाइल बजारलाई थप सुरक्षित, पारदर्शी र व्यवस्थित बनाउन राज्यस्तरमा बलियो दबाब सिर्जना गर्ने प्रतिबद्धता व्यक्त गरे।
क्यान महासंघका कार्यवाहक अध्यक्ष अधिकारीले मोबाइल तथा प्रविधिको क्षेत्र देशकै अर्थतन्त्रको मेरुदण्ड बनिसकेको अवस्थामा यस भित्रका बेथिति अन्त्य गर्न दुवै संस्थाको सहकार्य अपरिहार्य रहेको बताए। अवैध आयात (ग्रे मार्केट) ले राज्यको राजस्व गुम्नुका साथै वैधानिक व्यवसायीहरू मर्कामा परेको हुँदा यस विरुद्ध संयुक्त पैरवी गरिने उनको भनाइ थियो।
त्यस्तै एनएमडिएका अध्यक्ष त्रिपाठीले मोबाइल डिभाइस म्यानेजमेन्ट सिस्टम (एमडीएमएस) जस्ता प्रणालीको प्रभावकारी कार्यान्वयन र व्यावहारिक आयात नीतिका लागि क्यान महासंघसँगको यो गठबन्धनले ठूलो ऊर्जा दिएको उल्लेख गरे।
कार्यक्रममा क्यान महासंघका कार्यवाहक अध्यक्ष चिरन्जीवी अधिकारी, महासचिव, कोषाध्यक्ष तथा १५ औँ कार्यसमितिका सदस्यहरू तथा नेपाल मोबाइल डिस्ट्रिब्युटर्स एशोसिएशन – एनएमडीए अध्यक्ष रघु त्रिपाठी, निवर्तमान अध्यक्ष, उपाध्यक्ष, महासचिव, कोषाध्यक्षको उपस्थिती रहेको थियो ।
प्रकाशित: १८ जेष्ठ २०८३, सोमबार
