काठमाडौं ।
गत वर्षको अक्टोबरमा सामसङले गुगलको साथै आईवेयर (चश्माका) ब्रान्डहरु जेन्टल मोन्स्टर र वारबी पार्करसँगको सहकार्यमा एआई–संचालित स्मार्ट ग्लासेस विकास गरिरहेको घोषणा गरेको थियो। कम्पनीहरूले अब गुगल आई/ओ २०२६ मा आगामी एन्ड्रोइड एक्सआर रनिङ वेयरेबलको पहिलो आधिकारिक रूप प्रस्तुत गरेका छन्।
एआई स्मार्ट ग्लासेस दुई फरक डिजाइनहरूमा उपलब्ध हुनेछ भने त्यसमा एउटा जेन्टल मोन्स्टरले र अर्को वारबी पार्करले सिर्जना गर्ने बताइको छ। गुगल र सामसङले विस्तृत हार्डवेयर स्पेसिफिकेसनहरूको बारेमा खुलासा नगरेका भए तापनि कम्पनीहरूले चश्माले प्रदान गर्ने धेरै प्रमुख सुविधाहरूको बारेमा हाइलाइट गरेको जीएसएमएरिनाले रिपोर्ट गरेको छ।
गुगल र सामसङका अनुसार एआई ग्लासेसले एन्ड्रोइड एक्सआर रन गर्नेछ र भ्वाइस कमाण्डहरू मार्फत जेमिनीमा ह्यान्ड्स–फ्री पहुँच प्रदान गर्न सक्नेछ। प्रयोगकर्ताहरूले पालैपालो नेभिगेसन प्राप्त गर्न, नजिकैका ठाउँहरू पत्ता लगाउन र वास्तविक समयमा व्यक्तिगत सिफारिसहरू प्राप्त गर्न सक्षम हुनेछन्।
ग्लासेसले अर्डरहरू गर्ने, संक्षेपित सन्देश नोटिफिकेसनहरू हेर्ने, क्यालेन्डर इभेन्टहरू सिर्जना गर्ने र थप कुराहरू सहित उत्पादकता सुविधाहरूको दायरालाई पनि समर्थन गर्नेछ।
त्यसको अतिरिक्त, एन्ड्रोइड एक्सआर ग्लासेसले कुराकानीको क्रममा रियल–टाइम ट्रान्सलेसन (वास्तविक–समय अनुवाद) सक्षम पार्नेछ भने बिल्टि–इन क्यामरा र एआई क्षमताहरूले टेक्स्ट र संकेतहरूको तत्काल अनुवाद प्रदान गर्न सक्नेछ। साथै क्यामरालाई फोटो र भिडियोहरू खिच्न पनि प्रयोग गर्न सकिनेछ।
हाल बजारमा रहेका धेरैजसो स्मार्ट ग्लासेस जस्तै नयाँ वेयरेबलले स्मार्टफोनसँग पेयर हुने अन्य कम्प्यानियन डिभाइसको रूपमा काम गर्नेछ।
विस्तृत हार्डवेयर स्पेसिफिकेसनहरू अझै खुलासा नगरिएको भए तापनि आधिकारिक तस्बिरहरूले एकल क्यामरा र एलईडी इन्डिकेटर लाइटले ग्लासेस सुसज्जित देखाएको उल्लेख गरिएको छ।
सामसङ र गुगलद्वारा विकसित एआई–संचालित स्मार्ट ग्लासेस यो शरद ऋतुको अन्त्यमा लन्च हुने तय गरिएको बताइएको छ भने थप विवरणहरू आगामी महिनाहरूमा साझा गरिने अपेक्षा गरिएको छ।
प्रकाशित: ७ जेष्ठ २०८३, बिहीबार
