काठमाडौं ।
रुसको प्रमुख एआई मोडल गिगाच्याट सञ्चालनका लागि चिनियाँ चिप प्रयोग गर्ने आशा गरिएको राष्ट्रपति भ्लादिमिर पुटिनको चीन भ्रमणका क्रममा स्वेरब्याङ्कका प्रमुख कार्यकारी अधिकृतले बताएका छन्। पश्चिमी प्रतिबन्धका कारण रुसको उन्नत हार्डवेयरमा पहुँच अझै अवरुद्ध छ।
“हामी गिगाच्याटका लागि चिनियाँ माइक्रोचिप प्रयोग गर्न सक्ने आशा गरिरहेका छौं,” प्रमुख कार्यकारी अधिकृत जर्मन ग्रेफले सरकारी प्रसारक च्यालनवनलाई बताएका छन्।
गिगाच्याट रुसको सबैभन्दा ठूलो ऋणदाता स्वेरब्याङ्कले विकास गरेको हो, जसले रुसको एआई विस्तार प्रयासलाई अगाडि बढाइरहेको छ।
रोयटर्सका अनुसार चीनबाट उन्नत चिप खरिद गर्ने बैंकको प्रयासले कडा प्रतिस्पर्धा सामना गरिरहेको छ, किनकि चीनका ठूला इन्टरनेट कम्पनीहरू बाइटडान्स, टेन्सेन्ट र अलिबाबा पनि ह्वावेको एसेण्ड ९५० एआई चिप अर्डर गर्न हतारिरहेका छन्।
चीनको सबैभन्दा उन्नत चिप मानिएको एसेण्ड ९५० अझै अमेरिकी कम्पनी एनभिडियाको एच२०० मोडलभन्दा पछाडि रहेको छ। ग्रेफले स्वेरब्याङ्कले कुन चिप खरिद गर्न खोजिरहेको हो भन्ने खुलाएका छैनन्।
एआई प्रविधिको विकासमा रुस अमेरिका र चीनभन्दा पछाडि छ। रक्षा लगायत संवेदनशील क्षेत्रहरूमा रुस आयातित इलेक्ट्रोनिक्समा धेरै निर्भर छ, जसको मुख्य आपूर्तिकर्ता चीन हो।
प्रकाशित: ७ जेष्ठ २०८३, बिहीबार
