काठमाडौं ।
एआईका कारण बढ्दो डाटा ट्राफिकलाई ध्यानमा राख्दै नोकियाले नयाँ अप्टिकल नेटवर्किङ उत्पादनहरूको सेट सार्वजनिक गरेको छ, जसलाई कम्पनीले “एआई सुपरसायकलले ल्याएको अभूतपूर्व स्केल र विभिन्न प्रयोग आवश्यकताहरू सम्बोधन गर्न डिजाइन गरिएको” बताएको छ।
नोकियाका अनुसार एआई ट्राफिक र डाटा सेन्टर इन्टरकनेक्ट (डीसीआई) को माग तीव्र रूपमा बढिरहेको छ, जसले अघिल्ला पुस्ताका साना सुधारमा आधारित प्रविधिको सीमालाई पार गरिरहेको छ।
टेलिकम्स डटकमका अनुसार कम्पनीले नयाँ उपकरणहरूलाई एआई युगका नेटवर्कका लागि कोहेरेंट अप्टिकल समाधान निर्माण गर्ने नयाँ दृष्टिकोणका रूपमा वर्णन गरेको छ, जसले कार्यसम्पादन बढाउँदै लागत, स्थान र ऊर्जा खपत घटाउने तथा नेटवर्क सञ्चालनलाई सरल बनाउने दावी गरेको छ। यी नयाँ उत्पादनहरूमा कोहेरेंट अप्टिकल समाधानहरूको सेट र सानो आकारको बहु-फाइबर अनुकूल इन-लाइन एम्प्लिफायर समावेश छन्।
कम्पनीका अनुसार यी उत्पादनहरू “बिल्डिङ ब्लक” आधारित विकास विधिमा आधारित छन्, जसले अप्टिकल ट्रान्सपोर्टका विभिन्न प्रयोगहरूमा प्रविधि सजिलै एकीकृत गर्न मद्दत गर्छ। यसमा चार नयाँ डिजिटल सिग्नल प्रोसेसर र इन्डियम फस्फाइड तथा सिलिकन फोटोनिक्स प्रयोग गरेर बनाइएका विभिन्न अप्टिकल फ्रन्ट एन्डहरू समावेश छन्।
यस दृष्टिकोणले हालका र आगामी नेटवर्क आवश्यकताहरूका लागि अनुकूल समाधान प्रदान गर्ने, लागत, स्थान र ऊर्जा दक्षता सुधार गर्ने तथा कुल स्वामित्व लागतमा ७० प्रतिशतसम्म बचत सम्भव बनाउने कम्पनीको दावी छ।
नोकियाका नेटवर्क इन्फ्रास्ट्रक्चर प्रमुख डेविड हर्डले उद्योग अहिले महत्वपूर्ण मोडमा पुगेको भन्दै स्केल, विश्वास र नवप्रवर्तन आवश्यक भएको बताएका छन्। उनले कम्पनीले आफ्ना ग्राहकहरूसँग सहकार्य गर्दै कम लागत, कम ऊर्जा खपत र एआई-सक्षम दक्षतासहित समाधान विकास गरिरहेको बताए।
कम्पनीले बहु-फाइबर प्रयोगका लागि नयाँ मल्टि-रेल इन-लाइन एम्प्लिफायर पनि सार्वजनिक गरेको छ, जसले हालका समाधानको तुलनामा ४० गुणा बढी घनत्व प्रदान गर्ने र एकै र्याकमा १६० फाइबर जोडी समर्थन गर्ने बताइएको छ। यो उत्पादन यस वर्षको दोस्रो भागमा उपलब्ध हुने जनाइएको छ।
नोकियाका अप्टिकल नेटवर्क्स विभागका वरिष्ठ उपाध्यक्ष रोन जोन्सनले कम्पनीको उच्च स्तरको भर्टिकल इन्टिग्रेसन र आफ्नै उत्पादन क्षमताका कारण नवीन समाधान उपलब्ध गराउन सक्षम भएको बताए। उनले बिल्डिङ ब्लक आधारित विकास विधिले स्केलेबिलिटी बढाउने र सञ्चालन सरल बनाउने साथै लागत, ऊर्जा र स्थान घटाउने बताए।
यसै महिनाको सुरुवातमा आयोजित एमडब्लूसी कार्यक्रममा नोकियाले भविष्यका नेटवर्क र सिक्सजी युगबारे आफ्नो दृष्टिकोण पनि प्रस्तुत गरेको थियो। कम्पनीका क्लाउड एन्ड नेटवर्क सर्भिसेस विभागका वरिष्ठ उपाध्यक्ष काल डेले सॉफ्टवेयरमा आधारित, लचिलो, विस्तारयोग्य र बुद्धिमान नेटवर्क निर्माण गर्ने लक्ष्य रहेको बताएका छन्।
प्रकाशित: ४ चैत्र २०८२, बुधबार
