काठमाडौं ।
सामाजिक सञ्जाल एक्समा प्रयोगकर्ताले अपलोड गरेका तस्वीरहरूलाई एक्सएआईको ग्रोक च्याटबोटले सम्पादन गर्न नदिन सकिने नयाँ विकल्प थपिएको छ।
इलन मस्कको स्वामित्वमा रहेका एक्स वा एक्सएआईले यस फिचरबारे सार्वजनिक घोषणा गरेका छैनन्। तर पछिल्ला केही दिनमा आईओएस एपमा फोटो वा भिडियो अपलोड गर्ने मेनुमा प्रयोगकर्ताले यो विकल्प देख्न थालेका छन्।
इन्ग्याजेटका अनुसार यो विकल्प सम्भवतः ग्रोकसँग सम्बन्धित हालैको विवादपछि ल्याइएको मानिन्छ। सन् २०२६ को सुरुमा च्याटबोटमा तस्वीर निर्माण गर्ने सुविधा थपिएपछि करिब ३० लाख यौनिक वा नग्न बनाइएका तस्वीरहरू सिर्जना गरिएको थियो।
सेन्टर फर काउन्टरिङ डिजिटल हेटका अनुसार ११ दिनको अवधिमा बनेका ती तस्वीरमध्ये करिब २३ हजारमा बालबालिकाका यौनिक स्वरूपका चित्र समावेश थिए। यस विषयमा अहिले ग्रोक विरुद्ध युरोपेली संघका नियामकहरूले दुईवटा अलग अनुसन्धान सुरु गरेका छन्।
नयाँ विकल्पको सकारात्मक पक्ष भनेको एक्स र एक्सएआई ले ग्रोक को अनुचित प्रयोग सीमित गर्न केही कदम चालेका छन्। यो ब्लक साधारण टगलका रूपमा उपलब्ध छ र प्रयोगकर्ता इन्टरफेसमा लुकाइएको छैन।
तर यसको नकारात्मक पक्ष पनि छ। यो उपायले ग्रोक को प्रयोग तरिका वा प्रणालीमा ठूलो सुधार ल्याएको भने देखिँदैन।
यो सुविधा प्रयोग गरेपछि ग्रोक ले कुनै प्रयोगकर्ताले अपलोड गरेको फाइललाई सोझै सम्पादन गर्न सक्दैन। तर द भर्जको रिपोर्टअनुसार यसले केवल उत्तरमा ग्रोकलाई ट्याग गरेर तस्वीर सम्पादन गराउन मात्र रोक्छ।
यसका कारण कसैले चाह्यो भने अन्य तरिकाबाट प्रणालीलाई छल्न सक्ने सम्भावना अझै बाँकी छ, विशेषगरी सहमतिबिनै मानिसका तस्वीरलाई नग्न बनाउने जस्ता जनरेटिभ एआई प्रयोग गर्न चाहने व्यक्तिहरूका लागि।
जनवरीमा एक्सएआई ले वास्तविक व्यक्तिलाई अत्यन्त खुला कपडामा देखाउने तस्वीर बनाउन ग्रोक मा केही प्रतिबन्ध लगाएको थियो। तर ती प्रतिबन्धहरू पनि आंशिक रूपमा मात्र प्रभावकारी भएको बताइएको छ।
यदि कम्पनीले यस्तै सीमित उपाय मात्र ल्यायो भने, सहमतिबिनाको नग्न सामग्रीप्रति ‘शून्य सहनशीलता’ नीति भएको दावी विश्वसनीय नदेखिने टिप्पणी गरिएको छ।
विशेषगरी समस्या पूर्ण रूपमा समाधान नभएसम्म तस्वीर निर्माण सुविधा नै अस्थायी रूपमा बन्द गर्न सकिने विकल्प पनि रहेको विश्लेषकहरूले बताएका छन्।
प्रकाशित: २६ फाल्गुन २०८२, मंगलवार
