नाटोको “अनक्लासिफाइड” नेटवर्कमा आफ्नो एआई प्रविधि प्रयोग गर्न सम्झौता गर्दै ओपनएआई

काठमाडौं ।

ओपनएआई नाटोको “अनक्लासिफाइड” नेटवर्कमा आफ्नो एआई प्रविधि प्रयोग गर्ने सम्भावित सम्झौताबारे विचार गरिरहेको एक स्रोतले मंगलबार जानकारी दिएको छ। यो खबर च्याटजीपीटीको स्वामित्व रहेको कम्पनीले हालै अमेरिकी रक्षा मन्त्रालयसँग सम्झौता गरेपछि सार्वजनिक भएको हो।

द वाल स्ट्रीट जर्नलले पहिलो पटक ओपनएआई नाटोसँग सम्भावित सम्झौता गर्नेबारे विचार गरिरहेको समाचार सार्वजनिक गरेको थियो। सो पत्रिकाका अनुसार ओपनएआईका प्रमुख कार्यकारी अधिकृत साम अल्टम्यानले प्रारम्भिक कम्पनी बैठकमा नाटोका सबै “क्लासिफाइड” नेटवर्कमा प्रविधि तैनाथ गर्ने सम्भावनाबारे बताएका थिए।

तर पछि कम्पनीकी प्रवक्ताले उनले गलत शब्द प्रयोग गरेको स्पष्ट पार्दै उक्त अवसर नाटोका “अनक्लासिफाइड” नेटवर्कका लागि मात्र भएको जनाएकी थिइन्।

३२ सदस्यीय सैन्य गठबन्धन उत्तर एटलान्टिक सन्धी संगठन (नाटो) ले कार्यालय समय बाहिर सोधिएको टिप्पणीको अनुरोधमा तुरुन्त प्रतिक्रिया दिएको थिएन।

रोयटर्सका अनुसार माइक्रोसफ्ट र अमेजन लगायतका कम्पनीहरूले समर्थन गरेका ओपनएआईले गत साता अन्त्यतिर अमेरिकी रक्षा मन्त्रालयको “क्लासिफाइड” नेटवर्कमा आफ्नो प्रविधि प्रयोग गर्ने सम्झौता घोषणा गरेको थियो। यो निर्णय अमेरिकी राष्ट्रपति डोनाल्ड ट्रम्पले प्रतिस्पर्धी कम्पनी एन्थ्रोपिकसँगको सहकार्य रोक्न निर्देशन दिएपछि आएको हो।

व्यापक निगरानीसम्बन्धी बहस

एन्थ्रोपिकसँगको सम्झौता वार्तामा असहमति उत्पन्न भएपछि उक्त कम्पनीलाई हटाइएको थियो। एन्थ्रोपिकका सीईओ डारियो अमोडेईले पेन्टागनले आफ्नो एआई मोडेललाई व्यापक घरेलु निगरानी वा पूर्ण रूपमा स्वायत्त हतियार प्रणाली सञ्चालन गर्न प्रयोग गर्ने विषयमा कम्पनीको असहमति रहेको बताएका थिए।

पेन्टागनले यसअघि अमेरिकी नागरिकमाथि व्यापक निगरानी गर्न वा मानव संलग्नता बिना चल्ने हतियार विकास गर्न एआई प्रयोग गर्ने कुनै रुचि नभएको स्पष्ट पारेको थियो। तर कानुनी रूपमा मान्य प्रयोगहरूमा एआईको उपयोग गर्न पाउनुपर्ने उसको धारणा रहेको छ।

गत शुक्रबार सम्झौता गरेपछि सोमबार जारी अद्यावधिक वक्तव्यमा ओपनएआईले आफ्ना एआई प्रणालीहरू “अमेरिकी नागरिक तथा राष्ट्रियहरूमाथि घरेलु निगरानीका लागि जानाजानी प्रयोग नगरिने” जनाएको थियो। साथै, पेन्टागनले राष्ट्रिय सुरक्षा नियोग (एनएसए) जस्ता गुप्तचर निकायले पनि उक्त एआई सेवा प्रयोग नगर्ने पुष्टि गरेको उल्लेख गरिएको छ।

“यो अत्यन्त जटिल तर सही निर्णयको उदाहरण थियो, जसले छोटो अवधिमा हाम्रो ब्रान्ड र जनसम्पर्कमा नकारात्मक असर पारेको छ,” अल्टम्यानले पेन्टागन सम्झौताबारे कम्पनी बैठकमा भनेको कुरा द वाल स्ट्रीट जर्नलले उद्धृत गरेको छ।