काठमाडौं ।
एसएमएस सेवा प्रदायक स्प्यारो एसएमएसले निर्वाचन आयोगले तोकेको ४८ घण्टे मौन अवधिलाई पूर्ण सम्मान गर्दै आफ्नो एसएमएसप्रणालीमार्फत राजनीतिक प्रचार–प्रसार पूर्ण रूपमा नियन्त्रण गर्ने व्यवस्था लागू गरेको छ।
आज एक विज्ञप्ति जारी गर्दै यसबारे जानकारी दिएको हो।
निर्वाचन अवधिमा स्वच्छ, निष्पक्ष र मर्यादित वातावरण सुनिश्चित गर्न स्प्यारो एसएमएसले विशेष कीवर्ड ब्लक सिस्टम सञ्चालनमा ल्याएको र यस प्रणालीमार्फत राजनीतिक दल, उम्मेदवार तथा निर्वाचन प्रचारसँग सम्बन्धित सामग्रीहरू पहिचान गरी स्वचालित रूपमा अवरुद्ध गरिने कम्पनीले जनाएको छ।
‘मौन अवधिमा कुनै पनि प्रकारको राजनीतिक प्रचारात्मक एसएमएसप्रसारण हुन नदिने सुनिश्चित गर्दछ’, विज्ञप्तिमा उल्लेख छ।
स्प्यारो एसएमएसका सीईओ मनोज थापाले भने, “नेपालमा जिम्मेवार प्रविधि सेवा प्रदायकको हैसियतले हामी निर्वाचन आयोगका मार्गनिर्देशनहरू पूर्ण रूपमा सम्मान गर्छौं। लोकतान्त्रिक प्रक्रियाको सुरक्षा हाम्रो दायित्व हो र मौन अवधिमा डिजिटल माध्यमबाट हुने कुनै पनि दुरुपयोग रोक्नु हाम्रो मुख्य प्राथमिकता हो।”
कम्पनीका अनुसार उक्त अवधिमा राजनीतिक प्रचारसँग सम्बन्धित सन्देशहरू मात्र अवरुद्ध गरिनेछन्। अन्य सेवा जस्तै बल्क एसएमएस, ओटीपी, बैंकिङ सन्देश, सेवा सूचना तथा व्यावसायिक मार्केटिङ सन्देशहरू भने नियमित रूपमा सञ्चालनमा रहनेछन्।
स्प्यारो एसएमएसले आगामी दिनहरूमा पनि कानुनी प्रावधान, नियामक निकायका निर्देशन तथा सामाजिक जिम्मेवारीलाई उच्च प्राथमिकतामा राख्दै आफ्ना सेवा सञ्चालन गर्ने प्रतिबद्धता व्यक्त गरेको छ।
प्रकाशित: २० फाल्गुन २०८२, बुधबार
