पेन्टागनले एन्थ्रोपिकलाई आपूर्ति शृंखला जोखिमको रूपमा सूचीकृत गर्ने

काठमाडौं ।

पेन्टागनले एन्थ्रोपिकलाई आपूर्ति शृंखला जोखिमको रूपमा सूचीकृत गर्ने कदम चालेको छ।

ट्रुथ सोसलमा गरिएको पोस्टमा राष्ट्रपति ट्रम्पले रक्षा विभागसँगको सार्वजनिक विवादपछि संघीय निकायहरूलाई एन्थ्रोपिकका सबै उत्पादनहरूको प्रयोग बन्द गर्न निर्देशन दिएका छन्। उत्पादन प्रयोग गरिरहेका विभागहरूलाई छ महिनाको समय दिइए पनि एन्थ्रोपिक अब संघीय ठेकेदारका रूपमा स्वीकार्य नहुने उनले स्पष्ट पारे।

“हामीलाई यसको आवश्यकता छैन, हामी चाहँदैनौं, र अब यससँग कुनै व्यापार गर्ने छैनौं,” उनले लेखेका छन्।

राष्ट्रपतिको पोस्टमा एन्थ्रोपिकलाई औपचारिक रूपमा आपूर्ति शृंखला जोखिम घोषणा गर्ने योजना उल्लेख गरिएको थिएन। तर त्यसपछि रक्षा सचिव पिट हेगसेठले छुट्टै सन्देशमार्फत यस्तो निर्णय लागू गरिएको जनाए।

“राष्ट्रपतिको निर्देशनअनुसार संघीय सरकारले एन्थ्रोपिकको प्रविधि प्रयोग बन्द गर्नेछ। त्यससँगै म रक्षा विभागलाई एन्थ्रोपिकलाई राष्ट्रिय सुरक्षाका लागि आपूर्ति शृंखला जोखिमको रूपमा सूचीकृत गर्न निर्देशन दिन्छु,” उनले लेखेका छन्। “तुरुन्त प्रभावबाट अमेरिकी सेनासँग काम गर्ने कुनै पनि ठेकेदार, आपूर्तिकर्ता वा साझेदारले एन्थ्रोपिकसँग कुनै व्यावसायिक गतिविधि गर्न पाउने छैन।”

एन्थ्रोपिकले शुक्रबार सरकारबाट प्रत्यक्ष सूचना नआएको बताए पनि “यदि आपूर्ति शृंखला जोखिम घोषणा गरिएमा अदालतमा चुनौती दिने” जनाएको छ।

विवादको मुख्य कारण एन्थ्रोपिकले आफ्ना एआई मोडलहरू सामूहिक घरेलु निगरानी वा पूर्ण स्वायत्त हतियार सञ्चालनका लागि प्रयोग गर्न नदिने अडान लिएको थियो। रक्षा सचिव हेगसेथले यसलाई अत्यधिक प्रतिबन्धात्मक भनेका थिए।

कम्पनीका प्रमुख कार्यकारी अधिकृत डारियो अमोडेईले बिहीबार सार्वजनिक रूपमा आफ्नो अडान दोहोर्‍याएका थिए।

“हाम्रो प्राथमिकता विभाग र सैनिकहरूलाई सेवा दिइरहने हो — तर हामीले राखेका दुई सुरक्षा सर्तसहित,” उनले लेखेका थिए। “यदि विभागले एन्थ्रोपिकसँगको सहकार्य अन्त्य गर्ने निर्णय गरेमा, हामी अर्को प्रदायकतर्फ सहज रूपान्तरणका लागि सहकार्य गर्नेछौं, ताकि सैन्य योजना, सञ्चालन वा अन्य महत्वपूर्ण मिसनमा अवरोध नआओस्।”

ओपनएआईले पनि एन्थ्रोपिकको निर्णयलाई समर्थन गरेको बताइएको छ। बीबीसीका अनुसार ओपनएआईका प्रमुख कार्यकारी अधिकृत साम अल्टम्यानले कर्मचारीहरूलाई पठाएको मेमोमा उस्तै “रेड लाइन” साझा गरेको उल्लेख छ। उनका अनुसार, ओपनएआईसँग सम्बन्धित कुनै पनि रक्षा सम्झौतामा “गैरकानुनी वा क्लाउडमा उपयुक्त नभएका प्रयोग, जस्तै घरेलु निगरानी र स्वायत्त आक्रामक हतियार” अस्वीकार गरिनेछ।

ओपनएआईका सह–संस्थापक इल्या सुट्स्केभरले पनि एक्समा लेख्दै एन्थ्रोपिक आफ्नो अडानबाट पछि नहट्नु सकारात्मक भएको र ओपनएआईले पनि समान धारणा लिनु महत्वपूर्ण भएको बताएका छन्।

तर ट्रम्प प्रशासनले संघीय निकायहरूलाई एन्थ्रोपिकसँग सम्बन्ध तोड्न निर्देशन दिएको केही घण्टामै ओपनएआईले पेन्टागनसँग सम्झौता घोषणा गर्‍यो। अल्टम्यानले उक्त सम्झौताले एन्थ्रोपिकले उठाएका मुख्य सिद्धान्त — घरेलु निगरानी र स्वायत्त हतियारमा प्रतिबन्ध जोगाइराखेको दावी गरेका छन्।

द न्यूयोर्क टाइम्सका अनुसार, ओपनएआई र अमेरिकी सरकारले सम्भावित सहकार्यबारे यसै साता बुधबारदेखि छलफल सुरु गरेका थिए। गत जुलाईमा एन्थ्रोपिक, ओपनएआई र गुगलले अमेरिकी रक्षा विभागबाट ठेक्का प्राप्त गरेका थिए। गुगलका केही कर्मचारीले एन्थ्रोपिकको समर्थन गरे पनि गुगल र यसको मातृ कम्पनीले औपचारिक प्रतिक्रिया दिएका छैनन्।