काठमाडौं ।
अमेरिकी चिप निर्माता एनभिडियाका प्रमुख कार्यकारी अधिकृत (सीईओ) जेन्सेन हुआङ चीनका स्थानीय प्रतिस्पर्धी कम्पनीहरूको तीव्र चुनौती र चिनियाँ अधिकारीहरूको नियामक निगरानीका बीच शाङ्घाइ पुगेका छन्।
एनभिडियाका चीनस्थित कर्मचारीहरूसँग वार्षिक उत्सवको सुरुवात गर्ने उद्देश्यले गरिएको हुआङको यो भ्रमण नियमित प्रकृतिको रहेको बताइएको छ। उनी शनिबार शाङ्घाइमा आयोजना हुने एनभिडियाको एक कार्यक्रममा सहभागी भएपछि बेइजिङ, शेन्जेन हुँदै ताइवान जाने कार्यक्रम रहेको अर्को स्रोतले जनाएको छ।
रोयटर्सका अनुसार क्यालिफोर्नियाको सान्ता क्लारामा मुख्यालय रहेको एनभिडियाले यस विषयमा प्रतिक्रिया दिन अनुरोधको जवाफ दिएको छैन। चिनियाँ समाचार माध्यम टेन्सेन्ट न्युजले शुक्रबार नै हुआङ शाङ्घाइमा रहेको खबर सार्वजनिक गरेको थियो। हुआङले गत वर्ष कम्तीमा तीन पटक चीन भ्रमण गरेका थिए र जुलाईमा चीनका वाणिज्यमन्त्रीसँग पनि भेट गरेका थिए।
हाल एनभिडिया आफ्नो शक्तिशाली एच२०० कृत्रिम बुद्धिमत्ता (एआई) चिप चिनियाँ ग्राहकलाई बिक्री गर्न अनुमति दिने वा नदिनेबारे बेइजिङको निर्णयको प्रतीक्षामा छ। उक्त बिक्रीलाई वाशिङ्टनले भने पहिले नै स्वीकृति दिइसकेको छ।
यसै महिना रोयटर्सलाई जानकारी दिइएका स्रोतहरूका अनुसार चिनियाँ अधिकारीहरूले भन्सार कर्मचारीलाई एच२०० चिप चीन भित्र्याउन अनुमति नदिन निर्देशन दिएका छन्। तर यो औपचारिक प्रतिबन्ध हो वा अस्थायी व्यवस्था हो भन्ने स्पष्ट भइसकेको छैन।
एनभिडियाको दोस्रो सबैभन्दा शक्तिशाली एआई चिप मानिने एच२०० हाल अमेरिका–चीन सम्बन्धमा प्रमुख विवादको विषय बनेको छ। चिनियाँ कम्पनीहरूबाट यसको माग बलियो रहे पनि बेइजिङले घरेलु चिप उत्पादकलाई समर्थन गर्न चिपमा पूर्ण प्रतिबन्ध लगाउने हो कि अझै प्रतिबन्धबारे छलफलमै छ वा वाशिङ्टनसँगको वार्तामा दबाबको साधनका रूपमा प्रयोग गर्ने हो यस विषयमा अन्योल कायम छ।
प्रकाशित: ११ माघ २०८२, आईतवार
