काठमाडौं ।
१० अर्ब डलरको नयाँ लगानीपछि एन्थ्रोपिकको मूल्यांकन ३५० अर्ब डलर पुगेको छ।
ठूला भाषा मोडेल (एलएलएम) विकास गर्ने कम्पनी एन्थ्रोपिकले नयाँ लगानीका लागि सहमति जनाएपछि यसको मूल्यांकन ३५० अर्ब डलर पुगेको छ। यसले ओपनएआई र एक्सएआईजस्ता प्रतिस्पर्धी कम्पनीहरूसँग प्रतिस्पर्धा गर्न आवश्यक वित्तीय क्षमता बलियो बनाउने अपेक्षा गरिएको छ।
एन्थ्रोपिकले १० अर्ब डलरको लगानी जुटाउन लागेको खबर पहिलो पटक वाल स्ट्रिट जर्नलले अज्ञात स्रोतहरूलाई उद्धृत गर्दै सार्वजनिक गरेको थियो। त्यसपछि सीएनबीसीले पनि आफ्ना स्रोतहरूका आधारमा लगानी सम्झौता भइसकेको जनाएको छ।
दुवै सञ्चारमाध्यमका अनुसार सिंगापुरको सार्वभौम सम्पत्ति कोष जीआईसी र अमेरिकी लगानी कम्पनी कोट्यु यस लगानी चरणका प्रमुख लगानीकर्ता हुन्। कोट्यु यसै साता सिंगापुरको डाटा सेन्टर निर्माता डे–वनको २ अर्ब डलरको सिरिज सी लगानीको नेतृत्व गरेपछि चर्चामा आएको थियो।
यो नयाँ लगानी चरणले एन्थ्रोपिकको मूल्यांकन ३५० अर्ब डलरमा पुर्याएको छ। यो अनुमान केही सतर्क हुन सक्ने पनि बताइएको छ। किनकि नोभेम्बरमै माइक्रोसफ्ट र एनभिडियाले क्रमशः ५ अर्ब र १० अर्ब डलर लगानी गर्न सहमति जनाउँदा पनि यस्तै मूल्यांकनको चर्चा भएको थियो। वाल स्ट्रिट जर्नलका स्रोतका अनुसार पछिल्लो लगानी माइक्रोसफ्ट र एनभिडियाको लगानीभन्दा अतिरिक्त हुनेछ।
सन् २०२६ सुरु भएको दुई हप्ता पनि नपुग्दै लगानीकर्ताहरूले २०२५ मा जस्तै एआई कम्पनीहरूमा अर्बौं डलर लगानी गर्न थालेका छन्। यही सन्दर्भमा केही दिनअघि इलन मस्कको एक्सएआईले सिरिज ई लगानी चरणबाट २० अर्ब डलर जुटाएको थियो।
टेलिकम्स डटकमका अनुसार एक्सएआईले यो लगानीले आफ्नो पूर्वाधार विस्तार, अर्बौं प्रयोगकर्तासम्म पुग्ने एआई उत्पादन विकास र अनुसन्धानलाई तीव्र बनाउने जनाएको छ।
पिचबुकका तथ्यांकअनुसार हालसम्म एक्सएआईले कुल ४२.१ अर्ब डलर लगानी जुटाइसकेको छ, जसले एन्थ्रोपिकको हालसम्मको ३९.१ अर्ब डलरको कुल लगानीलाई केहीले उछिनेको छ।
तर वाल स्ट्रिट जर्नल र सीएनबीसीको रिपोर्ट सही भएमा एन्थ्रोपिक फेरि अघि बढ्ने देखिन्छ।
यी दुवै कम्पनी हालसम्म ओपनएआईभन्दा केही पछि छन्। पिचबुकका अनुसार च्याटजीपीटी विकास गर्ने ओपनएआईले अहिलेसम्म ६६.४ अर्ब डलर लगानी जुटाइसकेको छ।
यद्यपि डिसेम्बरमा ओपनएआईले करिब १०० अर्ब डलरको नयाँ लगानी चरणबारे छलफल गरिरहेको हल्ला चलेको थियो, जसले कम्पनीको मूल्यांकन करिब ८३० अर्ब डलर पुग्ने अनुमान गरिएको छ।
प्रकाशित: २६ पुष २०८२, शनिबार
