काठमाडौं ।
न्युयोर्ककी गभर्नर क्याथी होचुलले यस साता एउटा विधेयकमा हस्ताक्षर गरेकी छन् जसअनुसार सामाजिक सञ्जाल प्लेटफर्महरूले अटोप्ले र अनन्त स्क्रोल जस्ता फिचर प्रयोग गर्नुअघि किशोर प्रयोगकर्तालाई चेतावनी सन्देश देखाउनुपर्नेछ।
राज्य विधायिकाले उक्त विधेयक गत जुनमै पारित गरेको थियो। विधेयकमा “लत लाग्ने सामाजिक सञ्जाल प्लेटफर्म” मा मानसिक स्वास्थ्यसम्बन्धी चेतावनी अनिवार्य गरिनुपर्ने उल्लेख छ।
यस्ता प्लेटफर्म भनेका ती हुन्, जसले आफ्ना सेवाको महत्त्वपूर्ण हिस्साका रूपमा लत लाग्ने फिड, पुश नोटिफिकेसन, अटोप्ले, अनन्त स्क्रोल र/वा ‘लाइक काउन्ट’ प्रयोग गर्छन्।
यद्यपि, यदि ती फिचर प्रयोगको उद्देश्य प्लेटफर्ममा समय लम्ब्याउनु बाहेक अन्य वैध कारणका लागि भएको ठहर अटर्नी जनरलले गरेमा अपवाद लागू हुन सक्ने व्यवस्था पनि गरिएको छ।
होचुलको कार्यालयबाट जारी विज्ञप्तिअनुसार, यस्ता प्लेटफर्महरूले “किशोर प्रयोगकर्ताले लतजन्य फिचर पहिलोपटक प्रयोग गर्दा र त्यसपछि पनि निश्चित अन्तरालमा” चेतावनी देखाउनुपर्नेछ। प्रयोगकर्ताले ती चेतावनी सन्देशलाई स्किप गर्न पाउने छैनन्।
विज्ञप्तिमा प्रस्तावित चेतावनी लेबललाई सुर्तीजन्य पदार्थ, मदिरा तथा झिलिमिली बत्ती भएका मिडियामा प्रयोग हुने चेतावनीसँग तुलना गरिएको टेकक्रञ्चले जनाएको छ। अमेरिकी सर्जन जनरल रहेका बेला विवेक मूर्तिले गत वर्ष सामाजिक सञ्जाल प्लेटफर्महरूले चेतावनी लेबल राख्नुपर्ने सुझाव दिएका थिए।
“पद सम्हालेदेखि नै न्युयोर्कवासीको सुरक्षा मेरो शीर्ष प्राथमिकता रहँदै आएको छ, र यसमा अत्यधिक प्रयोगलाई प्रोत्साहित गर्ने सामाजिक सञ्जाल फिचरबाट हाम्रा बालबालिकालाई जोगाउनु पनि पर्छ,” होचुलले विज्ञप्तिमा भनेकी छन्।
विधेयकका एक प्रायोजक, एसेम्ब्ली सदस्य निली रोजिकले पनि यस्तै धारणा व्यक्त गरेका छन्। “न्युयोर्कका परिवारहरूले सामाजिक सञ्जालले मानसिक स्वास्थ्यमा पार्ने प्रभावबारे स्पष्ट जानकारी पाउनुपर्छ। पछिल्लो चिकित्सकीय अनुसन्धानका आधारमा चेतावनी लेबल अनिवार्य गरेर यो कानुनले सार्वजनिक स्वास्थ्यलाई प्राथमिकतामा राखेको छ र हामीलाई सचेत निर्णय लिन आवश्यक उपकरण दिएको छ,” उनले भनेका छन्।
गत वर्ष न्युयोर्कले १८ वर्षमुनिका प्रयोगकर्तालाई ‘लत लाग्ने फिड’ देखाउनुअघि अभिभावकको सहमति लिनुपर्ने र बालबालिकाको व्यक्तिगत डाटा संकलन वा बिक्री गर्न नपाइने व्यवस्था गर्ने कानुन पनि पारित गरेको थियो।
यो होचुलले वर्षको अन्त्यतिर हस्ताक्षर गरेको एक मात्र प्रविधिसम्बन्धी नियमन होइन। उनले हालै एआई सुरक्षामा केन्द्रित रेज एक्टमा पनि हस्ताक्षर गरेकी छन्।
प्रकाशित: १४ पुष २०८२, सोमबार
