वार्नर ब्रदर्स डिस्कभरीका लागि पारामाउन्टले फेरि दोहोर्यायो प्रस्ताव, यसपटक पूर्णरुपमा नगद कारोबार हुने

काठमाडौं ।

वार्नर ब्रदर्सको भविष्य नियन्त्रण गर्ने प्रतिस्पर्धा अझ तीव्र बन्दै गएको छ। यही क्रममा पारामाउन्ट स्काइडान्सले सोमबार लिगेसी चलचित्र स्टुडियो वार्नर ब्रदर्स डिस्कभरी (डब्लूबीडी) किन्न संशोधित पूर्ण नगद प्रस्ताव सार्वजनिक गरेको छ।

यस प्रस्तावमा ओरेकलका अर्बपति तथा प्रमुख लगानीकर्ता ल्यारी एलिसनबाट “अपरिवर्तनीय व्यक्तिगत ग्यारेन्टी” पनि समावेश गरिएको छ, जसअन्तर्गत उनले सम्झौताका लागि आवश्यक दशौँ अर्ब डलर बराबरको इक्विटी वित्तीय व्यवस्था सुनिश्चित गर्ने प्रतिबद्धता जनाएका छन्।

यो कदम प्यारामाउन्ट स्काइडान्सका सीईओ तथा ल्यारी एलिसनका छोरा डेभिड एलिसनले स्ट्रिमिङ दिग्गज नेटफ्लिक्ससँगको प्रतिस्पर्धामा सम्भावित अधिग्रहण आफ्नो पक्षमा पार्न चालेको पछिल्लो प्रयास हो।

पारामाउन्टले सोमबार जारी गरेको प्रेस विज्ञप्तिअनुसार “ल्यारी एलिसनले प्रस्तावसँग सम्बन्धित इक्विटी वित्तीय व्यवस्थाका लागि ४०.४ अर्ब डलर तथा प्यारामाउन्टविरुद्ध आउन सक्ने कुनै पनि क्षतिपूर्ति दाबीका लागि अपरिवर्तनीय व्यक्तिगत ग्यारेन्टी दिन सहमति जनाएका छन्।” यद्यपि इक्विटी वित्तीय व्यवस्था अघिल्लो प्रस्तावमै समावेश थियो तर एलिसनको व्यक्तिगत ग्यारेन्टी भने नयाँ रहेको विज्ञप्तिमा उल्लेख छ।

संशोधित प्रस्ताव डब्लूबीडी बोर्डले पारामाउन्टको प्रारम्भिक प्रस्ताव अस्वीकार गरेको ठीक एक सातापछि आएको हो। बोर्डले त्यसबेला नेटफ्लिक्ससँगको सम्झौतालाई प्राथमिकता दिएको थियो। उक्त सम्झौता डिसेम्बर ५ मा सार्वजनिक गरिएको थियो, जसअनुसार नेटफ्लिक्सले प्रति सेयर २७.७५ डलर मूल्यांकनमा नगद र सेयर मिश्रित विकल्पमार्फत स्टुडियो किन्न सहमत भएको थियो। सम्झौताअनुसार कुल उद्यम मूल्य ८२.७ अर्ब डलर रहेको छ।

टेकक्रञ्चका अनुसार नेटफ्लिक्ससँगको सम्झौता सार्वजनिक भएको तीन दिनपछि नै प्यारामाउन्टले १०८.४ अर्ब डलर मूल्यको प्रस्ताव ल्याउँदै प्रति सेयर ३० डलर प्रस्ताव गरेको थियो। तर डब्लूबीडी बोर्डले उक्त प्रस्तावलाई “भ्रमपूर्ण” भन्दै अस्वीकार गर्‍यो र वित्तीय स्रोतबारे शेयरधनीलाई भ्रामक जानकारी दिएको आरोप लगायो। बोर्डले त्यस बेला नेटफ्लिक्ससँगको सम्झौता “इक्विटी फाइनान्सिङ आवश्यक नपर्ने, बलियो ऋण प्रतिबद्धतासहितको कानुनी रूपमा बाध्यकारी सम्झौता” भएको स्पष्ट पारेको थियो।

अब पारामाउन्टले आफ्नो संशोधित प्रस्ताव डब्लूबीडीले उठाएका चासोहरू सम्बोधन गर्न तयार पारिएको जनाएको छ। यसअघि, अक्टोबरमा सीएनबीसीले रिपोर्ट गरेअनुसार नेटफ्लिक्ससँग सम्झौता हुनुअघि नै डब्लूबीडीले प्यारामाउन्टका तीन फरक अधिग्रहण प्रस्ताव अस्वीकार गरिसकेको थियो।

“पारामाउन्टले डब्लूबीडी अधिग्रहणप्रति आफ्नो प्रतिबद्धता पटक–पटक प्रमाणित गरिसकेको छ,” प्यारामाउन्ट स्काइडान्सका सीईओ डेभिड एलिसनले सोमबारको विज्ञप्तिमा बताएका छन्। “डिसेम्बर ४ मा सार्वजनिक गरिएको हाम्रो प्रति सेयर ३० डलरको पूर्ण रूपमा वित्तीय सुनिश्चित गरिएको नगद प्रस्ताव अहिले पनि डब्लूबीडीका शेयरधनीका लागि सबैभन्दा मूल्यवर्धक विकल्प हो।”

उनका अनुसार, लगानी र विकासप्रतिको प्रतिबद्धताका कारण प्यारामाउन्टको अधिग्रहणले सबै सरोकारवालालाई फाइदा पुर्‍याउनेछ, जसले सामग्री उत्पादन, सिनेमा हलमा प्रदर्शन हुने फिल्महरूको संख्या तथा उपभोक्ताको छनोट बढाउनेछ। “हामी डब्लूबीडी बोर्डले यो मूल्यवर्धक सम्झौता सुरक्षित गर्न आवश्यक कदम चाल्ने र भविष्यका लागि एक प्रतिष्ठित हलिउड सम्पदालाई संरक्षण तथा सुदृढ गर्ने अपेक्षा गर्दछौं,” उनले थपे।