माग बढेका कारण एनभिडियाले एच२०० एआई चिपको उत्पादन क्षमता बढाउने

काठमाडौं ।

चीनबाट माग बढेपछि एनभिडियाले एच२०० एआई चिपको उत्पादन क्षमता बढाउने मूल्याङ्कन गरिरहेको छ। एनभिडियाले चीनका ग्राहकहरूलाई शक्तिशाली एच२०० एआई चिपको उत्पादन क्षमता थप्ने सम्भावनाबारे मूल्याङ्कन गरिरहेको जानकारी दिएको छ। हालको उत्पादन क्षमताभन्दा अर्डर धेरै भएपछि यस्तो तयारी गरिएको हो, यस विषयमा जानकारी पाएका दुई स्रोतले बताएका छन्।

अमेरिकी राष्ट्रपति डोनाल्ड ट्रम्पले मंगलबार अमेरिकी सरकारले एनभिडिया लाई आफ्नो दोस्रो–सबैभन्दा छिटो एआई चिप एच२०० चीन निर्यात गर्न अनुमति दिने र त्यस्ता बिक्रीमा २५ प्रतिशत शुल्क असुल्ने बताएको केही समयपछि यो कदम आएको हो।

चिनियाँ कम्पनीहरूबाट एच२०० चिपको माग अत्यन्तै बलियो रहेकाले एनभिडिया नयाँ उत्पादन क्षमता थप्ने दिशातर्फ झुकिरहेको एक स्रोतले बताए। छलफल निजी भएकाले ती स्रोतहरूले नाम सार्वजनिक गर्न चाहेनन्।

“चीनका अधिकृत ग्राहकहरूलाई लाइसेन्स प्राप्त एच२०० बिक्री गर्दा अमेरिकी ग्राहकहरूलाई आपूर्ति गर्ने हाम्रो क्षमतामा कुनै असर नपरोस् भन्ने सुनिश्चित गर्न हामी आपूर्ति शृंखला व्यवस्थापन गरिरहेका छौं,” एनभिडिया का प्रवक्ताले समाचार प्रकाशित भएपछि रोयटर्सलाई दिएको वक्तव्यमा भनेका छन्।

अलिबाबा र बाइटडान्सजस्ता ठूला चिनियाँ कम्पनीहरूले यसै साता एच२०० खरिदका लागि एनभिडिया सँग सम्पर्क गरिसकेको र ठूलो अर्डर दिन इच्छुक रहेको रोयटर्सले बुधबार जनाएको छ।

तर अझै अनिश्चितता कायमै छ, किनकि चिनियाँ सरकारले एच२०० खरिदलाई औपचारिक रूपमा स्वीकृति दिएको छैन। एक र तेस्रो स्रोतका अनुसार बुधबार चिनियाँ अधिकारीहरूले आपत्कालीन बैठक बोलाएर यस विषयमा छलफल गरेका छन् र चिप चीन पठाउन दिने/नदिने निर्णय गर्नेछन्।

हाल एच२०० चिपको उत्पादन अत्यन्त सीमित मात्रामा भइरहेको जनाइएको छ। यसको कारण एनभिडियाले आफ्ना सबैभन्दा उन्नत ब्ल्याकवेल र आगामी रुबिन चिप शृंखलाको उत्पादनमा प्राथमिकता दिइरहेको हो।

चीनले आफ्नै एआई उद्योग प्रवर्द्धन गरिरहेको पृष्ठभूमिमा एच२०० चिपको आपूर्ति चिनियाँ ग्राहकहरूका लागि ठूलो चासोको विषय बनेको छ। स्रोतहरूका अनुसार उनीहरूले यसबारे स्पष्टता माग्दै एनभिडिया सँग सम्पर्क गरेका छन्। एनभिडियाले दिएको ब्रिफिङका क्रममा हालको आपूर्ति अवस्थाबारे मार्गदर्शन दिएको भए पनि ठोस सङ्ख्या भने सार्वजनिक गरिएको छैन।