त्रिवि रङ्गशालामा प्रविधि र सुविधामा प्रभावकारी व्यवस्थापन भएको दर्शकको भनाइ

काठमाडौं ।

कीर्तिपुरस्थित त्रिवि क्रिकेट रङ्गशालामा जारी नेपाल प्रिमियर लिग (एनपिएल) हेर्न पुगेका दर्शकले सुविधा र प्रविधिमा दोस्रो संस्करणको व्यवस्थापन प्रभावकारी रहेको प्रतिक्रिया दिएका छन्। दर्शकले खाद्य स्टल, शौचालयलगायत सुविधाको भने उचित व्यवस्थापन हुन नसकेको गुनासो गरेका हुन्।

१० हजार दर्शक अट्ने क्षमताको प्यारापिटसहित अन्तर्राष्ट्रियस्तरको रङ्गशाला निर्माण भएको छ भने ‘फ्लडलाइट’का कारण राति पनि खेल सम्भव भएकाले एनपिएलको उत्सह थपिएको कैलालीको टीकापुरबाट खेल हेर्न आएका सुदूरपश्चिम रोयल्सका एक समर्थकले बताए।

बस्न, हेर्न र दर्शकको क्षमतामा वृद्धि भए पनि चिया, पानी र शौचालयको भने उचित व्यवस्थापन हुन नसकेको उनको गुनासो छ।

दर्शकले सुविधा र प्रविधिका हिसाबले दोस्रो संस्करण उच्चस्तरको भएको बताउँदै आगामी दिनमा व्यवस्थित खाद्य स्टल तथा शौचालयको सुविधा थप गर्नुपर्नेमा उनले जोड दिए।

“पोहोर गेटबाट प्रवेश गर्न पनि असहज थियो। दर्शकको घुइँचो व्यवस्थापन कमजोर हुँदा, धक्का खाँदै धुलैधुलो भएर खेल हेर्ने ठाउँ खेज्नुपर्थ्यो। बस्ने स्थान चिसो हुँदा कागज ओछ्याएर बस्नुपर्ने बाध्यता थियो। यसपालि सुरुदेखि नै व्यवस्थित छ, आरामले सिटमा बसेर हेर्न पाइएको छ”, उनले भने।

पोहोरको तुलनामा सुरक्षा व्यवस्थापन, पार्किङलगायतको व्यवस्थापन पनि सहज भएको उनले बताए। शौचालयको पर्याप्त व्यवस्था नहुँदा, पानी र खाजागायतका लागि खाद्य स्टल नभएकाले केही अप्ठ्यारोमा पर्ने गरेको उनले प्रतिक्रिया दिए। “पहिलो दिन त पानीको व्यवस्थासमेत थिएन, दर्शकले आवाज उठाएपछि दोस्रो दिनदेखि पानी भने पाइयो”, उनले थपे।

भित्र केही सुविधासम्पन्न रेस्टुराँका स्टल रहे पनि अधिकांश दर्शकका लागि महँगो हुने उनले बताए।

एनपिएल हेर्न सात वर्षको छोरासहित कीर्तिपुर पुगेकी अर्की महिला समर्थकले पोहोरको तुलनामा टिकट बिक्री छिट्टै भएकाले रोजेको टिमको खेल हेर्न नपाएको गुनासो गरिन्। पोहोर आफूले उभिएर हेर्नुपरेको सम्झदै उनले यस पटक भने सपरिवारले सहज रूपमा अवलोकन गर्न पाइरहेको प्रतिक्रिया दिइन्।

कर्णाली एक्सका एक समर्थक राजेश रानाले गत वर्षजस्तो चौरको चिसोमा बसेर खेल हेर्नुनपरेको बताए। रङ्गशाला अन्तरराष्ट्रियस्तरमा पुगेकाले पोहोरकोभन्दा प्रभावकारी व्यवस्थापन गरिँदा यसपटक खेल हेर्न सहज हुनुका साथै दर्शक पनि बढेका उनको भनाइ छ। “टिकटको मूल्य बढेको भए पनि वितरण र रङ्गशालामा प्रवेश गराउने प्रक्रियासमेत व्यवस्थस्थित छ”, उनले भने।

एनपिएल हेर्नका लागि जुम्लाबाट कीर्तिपुर आएका तरुण काफ्लेले पोहोरभन्दा उत्कृष्ट व्यवस्थापन भएको प्रतिक्रिया दिए। “पोहोर यत्तिको व्यवस्था थिएन। टिकट ब्ल्याकमा बिक्री हुने र जो सुकै पनि छिर्न सक्ने अवस्था थियो। अहिले सुरक्षासहित टिकट बिक्रीवितरण पनि प्रभावकारी रूपमा भइरहेको छ”, उनले भने।–रासस