काठमाडौं ।
मेटाले ह्वाट्सएपले काम गर्ने तरिकामा ठूलो परिवर्तनको तयारी गरिरहेको छ। एप्लिकेसनले चाँडै नै प्रयोगकर्ताहरूलाई ह्वाट्सएप प्रयोग नगर्ने व्यक्तिहरूबाट पनि सन्देशहरू पठाउन र प्राप्त गर्न अनुमति दिन सक्छ भनि पोर्टल “एन्ड्रोइड सेन्ट्रल” ले खुलासा गरेको छ।
“थर्ड–पार्टि च्याट” भनिने नयाँ सुविधा हाल बिटा (एन्ड्रोइड २.२५.३३.८) मा परीक्षण भइरहेको छ। यसले व्हाट्सएप र अन्य च्याट एप्लिकेसनहरू बीच टेक्स्ट म्यासेजहरू, फोटोहरू, भिडियोहरू, भ्वाइस म्यासेजहरू र कागजातहरूको आदानप्रदान सक्षम पार्ने अपेक्षा गरिएको छ।
प्रयोगकर्ताहरूले यी कुराकानीहरू मुख्य च्याट सूचीमा वा छुट्टै “थर्ड–पार्टि च्याटहरू” खण्डमा देखियोस् भनेर छनौट गर्न सक्नेछन्। अहिलेसम्म, केवल “बर्डीच्याट” एप्लिकेसन परीक्षणमा भाग लिइरहेको थाहा हुन आएको छ।
स्टिकरहरू, स्ट्याटस र डिस्अपियरिङ्ग मेसेजेज (सन्देशहरू गायब हुने) जस्ता केही सुविधाहरू क्रस–एप कम्युनिकेसनको समयमा उपलब्ध नहुने बताइएको छ।
साथै, ह्वाट्सएपमा कन्ट्याक्ट ब्लक गर्नुको अर्थ स्वचालित रूपमा त्यो व्यक्तिले अर्को एप मार्फत सम्पर्क गर्न नसक्ने भन्ने होइन र यो अर्को प्लेटफर्मले ब्लकिङलाई समर्थन गर्छ कि गर्दैन भन्नेमा निर्भर गर्ने उल्लेख गरिएको छ।
यो सुविधाको कार्यान्वयन भने कुनै संयोग नभएको बताइएको छ। युरोपेली संघको डिजिटल मार्केट्स ऐन (डीएमए) नियमनको कारणले मेटाले यो कदम चालेको बताइएको छ र ऐनले ठूला प्रविधि कम्पनीहरूलाई प्रतिस्पर्धी एप्लिकेसनहरूसँग आफ्ना सेवाहरूको अन्तरक्रियालाई अनुमति दिन बाध्य पार्दछ।
मेटाले एउटा प्रणाली लागू गर्न काम गरिरहेको घोषणा गरेको छ। यसले प्राइभेसी (गोपनीयता) र इन्क्रिप्शनको उच्च मापदण्डहरू कायम राख्दै सन्देशहरूको आदानप्रदानलाई सक्षम बनाउने बताइएको छ जसको लागि व्हाट्सएप परिचित रहेको छ। यद्यपि, मेटाले यो फङ्शन सबै प्रयोगकर्ताहरूको लागि कहिले उपलब्ध हुनेछ भनेर खुलासा नगरिएको टेलिग्राफले रिपोर्ट गरेको छ।
प्रकाशित: २८ कार्तिक २०८२, शुक्रबार
