एएमआईसी कार्यक्रमलाई सेमीकन्डक्टर उत्पादन बाहेकका क्षेत्रमा विस्तार गर्न ट्रम्प प्रशासनलाई ओपनएआईको सुझाव

काठमाडौं ।

ओपनएआईले संघीय सरकारसँग डाटा सेन्टर निर्माणका लागि सहयोगको अपेक्षा गर्दै पठाएको पछिल्लो पत्रमा कम्पनीका महत्वाकांक्षी योजनाबारे थप विवरण सार्वजनिक भएको छ।

कम्पनीका ग्लोबल अफेयर्स प्रमुख क्रिस लाहानेद्वारा पठाइएको र ह्वाइट हाउसका विज्ञान तथा प्रविधि नीति निर्देशक माइकल क्राटसियोसलाई सम्बोधन गरिएको उक्त पत्रमा सरकारले एडभान्स्ड म्यानुफ्याक्चरिङ इन्भेस्टमेन्ट क्रेडिट (एएमआईसी) कार्यक्रमलाई सेमीकन्डक्टर उत्पादन मात्र नभई विद्युत् ग्रिडका उपकरण, एआई सर्भर र एआई डाटा सेन्टरहरूमा समेत विस्तार गर्न विचार गर्नुपर्ने उल्लेख गरिएको छ।

एएमआईसी बाइडेन प्रशासनको चिप्स एक्टमा समावेश गरिएको ३५ प्रतिशत कर छुट योजना हो।

“एएमआईसीको दायरा विस्तार गर्दा पूँजी लागत घट्नेछ, प्रारम्भिक लगानीको जोखिम कम हुनेछ, निजी लगानी आकर्षित हुनेछ, र अमेरिकी एआई विकासमा देखिएको अवरोध हटाउन मद्दत हुनेछ,” लाहानेले पत्रमा लेखेका छन्।

टेकक्रञ्चका अनुसार ओपनएआईले सरकारलाई यी परियोजनाका लागि अनुमति र वातावरणीय समीक्षा प्रक्रियालाई छिटो पार्न र तामाको तार, एल्युमिनियम तथा प्रशोधित दुर्लभ खनिजजस्ता एआई पूर्वाधारका लागि आवश्यक कच्चा पदार्थको रणनीतिक भण्डार बनाउन पनि आग्रह गरेको छ।

यो पत्र अक्टोबर २७ मा सार्वजनिक गरिएको भए पनि यो विषयमा मिडियाको ध्यान यस सातादेखि मात्रै केन्द्रित भएको हो, जब ओपनएआईका अधिकारीहरूले ट्रम्प प्रशासनसँगको सम्बन्धबारे दिएको टिप्पणीले व्यापक चर्चा पायो।

बुधबार वाल स्ट्रिट जर्नलको कार्यक्रममा सीएफओ साराह फ्रायरले सरकारले ओपनएआईका पूर्वाधार ऋणहरू “ब्याकस्टप” गर्नुपर्ने बताएकी थिइन्, तर पछि उनले लिंक्डइनमा लेख्दै भनिन्, “ओपनएआईले आफ्नो पूर्वाधार प्रतिबद्धताका लागि सरकारी सहयोग खोजेको होइन। मैले ‘ब्याकस्टप’ शब्द प्रयोग गर्दा अर्थ स्पष्ट हुन सकेन।”

सीईओ साम अल्टम्यानले पनि ओपनएआईका डाटा सेन्टरका लागि सरकारी ग्यारेन्टी हालसम्म नभएको र नचाहिएको प्रस्ट पारे।

“हाम्रो विश्वास छ कि सरकारले कुनै कम्पनीलाई विजेता वा पराजित बनाउने काम गर्नु हुँदैन, र करदाताले खराब व्यवसायिक निर्णय लिने कम्पनीलाई बचाउनु पनि हुँदैन,” उनले लेखेका छन्। तर उनले सेमीकन्डक्टर उत्पादन विस्तारका लागि अमेरिकी फ्याक्ट्री निर्माणमा सरकारी ऋण ग्यारेन्टीको सम्भावना बारे छलफल भएको बताएका छन्।

त्यही पोस्टमा अल्टम्यानले कम्पनीले २०२५ को अन्त्यसम्म “वार्षिक २० अर्ब डलरभन्दा बढी आम्दानी दर” पुग्ने अपेक्षा गरेको र २०३० सम्म सयौँ अर्ब डलरमा वृद्धि गर्ने लक्ष्य रहेको बताएका छन्। उनले आगामी आठ वर्षका लागि कम्पनीले १.४ ट्रिलियन डलर बराबरको पूँजी प्रतिबद्धता गरेको पनि खुलासा गरेका छन्।