टेस्लाले आगामी अप्रिलदेखि साइबरक्याब उत्पादन सुरु गर्ने

काठमाडौं ।

टेस्लाले आगामी अप्रिलदेखि साइबरक्याब उत्पादन सुरु गर्ने भएको छ। टेक्सासको अष्टिनस्थित कारखानामा उत्पादन सुरु हुने जानकारी कम्पनीका प्रमुख कार्यकारी अधिकृत एलन मस्कले बिहीबार शेयरधारकहरूको बैठकमा दिएका छन्।

मस्कले भनेका छन्, “हामीले यस्तो पहिलो कार तयार गरेका छौं जसलाई पूर्ण स्वचालित रूपमा बिना चालक चलाउन सकिन्छ। यो रोबोट्याक्सी ‘साइबरक्याब’ हो, जसमा पेडल र स्टीयरिङ व्हील नै छैन।”

उनका अनुसार कारमा साइड मिरर पनि हुँदैन र यो यात्राको लागत घटाउने हिसाबले डिजाइन गरिएको हो। उनले थपे, “यसै कारखानामा यसको उत्पादन भइरहेको छ, र आगामी वर्ष अप्रिलदेखि उत्पादन सुरु हुनेछ।”

मस्कको टिप्पणी शेयरधारकहरूले उनलाई दिइएको क्षतिपूर्ति प्याकेज अनुमोदन गरेपछि आएको हो, जसको मूल्य करिब १ ट्रिलियन डलरसम्म हुन सक्छ — यो कम्पनी इतिहासकै सबैभन्दा ठूलो भएको टेकक्रञ्चले उल्लेख गरेको छ।

तर टेस्लाले अहिलेसम्म आफ्ना कारहरू बिना सुरक्षा निरीक्षण स्वचालित रूपमा चलाउन सक्ने स्तरमा प्रदर्शन गर्न सकेको छैन। यसअघि टेस्ला अध्यक्ष रोबिन डेनहोमले ब्लूमबर्गलाई दिएको अन्तर्वार्तामा भने साइबरक्याबमा ब्याकअपका रूपमा स्टीयरिङ व्हील र पेडल रहने बताएकी थिइन्।

टेस्लाले सुरुवाती योजना अनुसार पेडल र स्टीयरिङसहितको संस्करण बनाउन खोजेको थियो, तर मस्कले त्यस योजना रद्द गरी सस्तो मोडलका सरल संस्करण उत्पादन गर्ने निर्णय गरेका थिए।

मस्कका अनुसार साइबरक्याबको उत्पादन लाइनको साइकल समय १० सेकेन्ड हुनेछ, जुन हालको मोडल वाईको एक मिनेट साइकल समयभन्दा धेरै तीव्र हो। उनले यो दरमा वार्षिक २० देखि ३० लाख साइबरक्याब उत्पादन गर्न सकिने दाबी गरे। “भविष्यमा यी कारहरू सबै ठाउँमा देखिनेछन्,” उनले भने।

टेस्लाले सन् २०२४ को अक्टोबरमा क्यालिफोर्नियाको वार्नर ब्रदर्स डिस्कभरी स्टुडियोमा आयोजित “वी, रोबोट” कार्यक्रममा साइबरक्याब पहिलो पटक सार्वजनिक गरेको थियो। त्यसबेला कम्पनीले भविष्यमा व्यक्तिगत प्रयोगका लागि पनि यो गाडी बिक्री गर्ने वाचा गरेको थियो।

त्यसपछि टेस्लाले सीमित स्वरूपको रोबोट्याक्सी सेवा सुरु गरेको छ, तर प्रस्तावित साइबरक्याब प्रयोग भएको छैन। यो सेवा जुन महिनादेखि अष्टिनका केही क्षेत्रमा सुरु भएको हो, जसमा मोडल वाई एसयूभी प्रयोग गरिएको छ। यी कारहरूमा टेस्लाको नयाँ “बिना निरीक्षण स्वचालित” सॉफ्टवेयर प्रयोग गरिएको छ, र यात्राको क्रममा टेस्लाका कर्मचारीहरू अगाडिको सिटमा बस्ने गर्छन्।

पेडल र स्टीयरिङ नभएको गाडी सडकमा उतार्नका लागि संघीय नियामक निकायको स्वीकृति आवश्यक पर्छ। यसअघि अमेजनको समर्थनमा रहेको जुक्सले यस्तो स्वीकृति प्राप्त गरेको थियो, तर अझै पनि व्यावसायिक रूपमा सञ्चालन गर्न अनुमति पाएको छैन।

जनरल मोटर्सले आफ्ना क्रूज ओरिजिन गाडीका लागि अनुमति माग्दा असफल भएको थियो, जबकि अमेरिकामा वेमोले अझै पनि परम्परागत नियन्त्रण प्रणाली भएको जगुआर आइ-पेस गाडी प्रयोग गरिरहेको छ।

मस्क भने सम्भावित नियामक अवरोधबारे चिन्तित देखिएनन्। उनले वेमोको प्रशंसा गर्दै भने, “वेमोले बाटो खोलिदिएको छ।” उनका अनुसार, “हामीले उत्पादन गर्ने सबै साइबरक्याब सडकमा उतार्न सक्नेछौं। जब यो सहरहरूमा सामान्य दृश्य बन्छ, नियामकहरूले ‘ना’ भन्नका कारणहरू पनि क्रमशः घट्दै जानेछन्।”