मेक्सिकोले हिंसात्मक भिडियो गेमहरूमा आठ प्रतिशत कर लगाउने विचार गर्दै

काठमाडौं ।

हिंसात्मक भिडियो गेमहरू फेरि पनि राजनीतिज्ञहरूको निशानामा परेका छन् र यस पटक मेक्सिको सरकारको यसतर्फ नजर गएको उल्लेख गरिएको छ। यस हप्ताको सुरुमा, मेक्सिकोको चेम्बर अफ डेपुटीजले एक व्यापक वित्तीय प्याकेजलाई अनुमोदन गरेको छ जसमा म्याच्योर कन्टेन्ट (परिपक्व सामग्री) भएका भिडियो गेमहरूमा आठ प्रतिशत कर समावेश रहेको बताइएको छ। इनसाइडर गेमिङले पहिलो पटक रिपोर्ट गरेझैं, प्रस्तावित करले मेक्सिकोको भिडियो गेम उमेर वर्गीकरण प्रणाली अन्तर्गत सी वा डी रेटिङ (मूल्याङ्कन) भएका खेलहरूलाई समेट्दछ जुन अमेरिकाको ईएसआरबी जस्तै हो। सी रेटिङ कम्तिमा १८ वर्ष उमेरका खेलाडीहरूको लागि भएको र यसले चरम हिंसा, रक्तपात र मध्यम ग्राफिक यौन सामग्रीको लागि अनुमति दिनेछ। साथै डी रेटिङ मूल्याङ्कन वयस्कहरूको लागि मात्र आरक्षित गरिएको र समान सामग्री समावेश गर्ने लामो दृश्यहरूको लागि अनुमति दिने बताइएको छ।

प्रस्तावित कानून पहिलो पटक सेप्टेम्बरमा पेश गरिएको थियो र देशको ट्रेजरी विभागले “हालैका अध्ययनहरूले किशोरकिशोरीहरूमा हिंसात्मक भिडियो गेमहरूको प्रयोग र उच्च स्तरको आक्रामकता, साथै एक्लोपन र चिन्ता जस्ता नकारात्मक सामाजिक र मनोवैज्ञानिक प्रभावहरू बीचको सम्बन्ध फेला पारेको छ” दाबी गरेको थियो। सन् २०१२ को एक अध्ययनलाई फुटनोटमा उद्धृत गरेको प्रतिवेदनले मोटर लर्निङ र लचिलोपन निर्माण सहित भिडियो गेमहरूसँग केही सकारात्मक सम्बन्धहरू पनि अवलोकन गरेको छ।

चेम्बर अफ डेपुटीजद्वारा अनुमोदित प्रस्तावको हालको व्याख्या प्रभावित खेलहरूको डिजिटल र भौतिक प्रतिलिपिहरू, साथै कुनै पनि इन–गेम खरिदहरू वा माइक्रोट्रान्सेक्शनहरूमा लागू हुनेछ। प्रस्ताव अझै पनि मेक्सिकोको अन्य कंग्रेसनल चेम्बर, सिनेट मार्फत जान बाँकी रहेको बताइएको छ जहाँ बजेट प्रस्ताव पेश गर्न नोभेम्बर १५ को समयसीमा अघि बहस गरिने इनग्याजेटले रिपोर्ट गरेको छ।