गुगलको भिओ ३.१ फोटोबाट भिडियो बनाउन थप अब्बल

काठमाडौं ।

गुगलले आफ्नो एआई भिडियो जेनेरेसन मोडेल ‘भिओ’ को नयाँ संस्करण भिओ ३.१ सार्वजनिक गरेको छ। यसले अब तस्वीरबाट भिडियो बनाउन र प्रयोगकर्ताको निर्देशन (प्रम्ट) अनुसार भिडियो तयार गर्न अझ राम्रो काम गर्नेछ।

यो संस्करण आजदेखि गुगलको जेमिनी एपीआईमार्फत प्रयोग गर्न सकिनेछ र यसले अहिले कम्पनीको फ्लो भिडियो सम्पादकलाई पनि शक्ति प्रदान गरिरहेको इन्ग्याजेटले उल्लेख गरेको छ।

भिओ ३.१ ले सन् २०२५ को गुगल आई/ओ कार्यक्रममा प्रस्तुत गरिएको भिओ ३ मा आधारित नयाँ क्षमताहरूलाई थप सुधार गरेको गुगलले जनाएको छ।

कम्पनीका अनुसार यस संस्करणले “प्रम्ट एडहियरेन्स” अर्थात् निर्देशनअनुसारको सटिकता बढाएको छ र प्रयोगकर्ताले अपलोड गरेका तस्वीर र लेखिएका निर्देशनलाई संयोजन गरेर अझ यथार्थपरक भिडियो बनाउन सजिलो बनाएको छ।

भिओ ३.१ ले अब तस्वीरलाई भिडियोमा रूपान्तरण गर्दा एकैसाथ अडियो पनि उत्पन्न गर्न सक्ने सुविधा प्रदान गरेको छ, जुन भिओ ३ मा उपलब्ध थिएन।

फ्लो भिडियो सम्पादकमा भिओ ३.१ ले नयाँ ‘फ्रेम टु भिडियो’ नामक सुविधा ल्याएको छ, जसले प्रयोगकर्तालाई भिडियोमाथि अझ सूक्ष्म नियन्त्रण दिन्छ। यसमा प्रयोगकर्ताले पहिलो र अन्तिम फ्रेम अपलोड गर्न सक्छन्, र प्रणालीले त्यसबीचको भिडियो स्वचालित रूपमा तयार गर्छ।

अडोब फायरफ्लाई (भिओ ३ मा आधारित) ले पनि यस्तै सुविधा दिएको भए पनि फ्लोले भिडियोसँगै अडियोसमेत एकैपटक सिर्जना गर्न सक्नेछ। यसले भिडियो क्लिप विस्तार गर्ने र पहिलेका फुटेजमा नयाँ वस्तुहरू थप्ने क्षमतामा पनि सुधार ल्याउनेछ।

गुगलले सार्वजनिक गरेका नमूना भिडियोहरू हेर्दा भिओ ३.१ ले बनाएका दृश्यहरू अझै पनि केही अस्वाभाविक देखिने भए पनि तिनको गुणस्तर निर्देशन र विषय अनुसार फरक–फरक देखिन्छ।

यद्यपि ओपनएआईको सोरा २ जत्तिको यथार्थता नपुगे पनि, भिडियो सर्जकहरूका लागि प्रयोगयोग्य बनाउने गुगलको यो प्रयास सामाजिक सञ्जालमा स्प्याम सामग्री उत्पादनभन्दा बढी उपयोगी कदमका रूपमा स्वागत गरिएको छ।