ताइवानका सरकारी निकायहरूमा भएको असङ्ख्य साइबर आक्रमणमा चिनियाँ “अनलाइन ट्रोल सेना” को हात रहेको दावी

काठमाडौं ।

चिनियाँ साइबर आक्रमणहरू यस वर्ष ताइवानका सरकारी निकायहरूमा १७ प्रतिशतले बढेका छन्। यसको औसत दैनिक २८ लाख आक्रमण पुगेको ताइवानको राष्ट्रिय सुरक्षा ब्युरोले जनाएको छ। ब्युरोले बेइजिङको “अनलाइन ट्रोल सेना” ले ताइवानमा विभाजन फैलाउने प्रयास गरिरहेको चेतावनी दिएको छ।

रोयटर्सका अनुसार ताइवानले पटक–पटक चीनका दैनिक सैन्य अभ्यासदेखि लिएर साइबर आक्रमणसम्मका तथाकथित “ग्रे-जोन” रणनीतिहरूको विरोध गर्दै आएको छ।

चीनले लोकतान्त्रिक शासन प्रणाली भएको ताइवानलाई आफ्नो अधीनमा ल्याउने उद्देश्यले राजनीतिक र सैन्य दबाब बढाइरहेको आरोप ताइपेईले लगाउँदै आएको छ।

राष्ट्रिय सुरक्षा ब्युरोको विवरणका आधारमा रोयटर्सले गरेको गणनाअनुसार, ताइवानको सरकारी सेवा सञ्जालले यस वर्ष दैनिक औसत २८ लाख साइबर आक्रमण भोगेको छ, जुन सन् २०२४ मा २४ लाखको औसतबाट वृद्धि भएको हो।

बुधबारको संसदीय सत्र अघि रोयटर्सले समीक्षा गरेको संसदमा पेश गरिएको प्रतिवेदनमा स्वास्थ्य प्रणाली, रक्षा, दूरसञ्चार र ऊर्जा क्षेत्र प्रमुख रूपमा “व्यवस्थित साइबर आक्रमण” का लक्ष्य बनेका उल्लेख छ।

“गोप्य जानकारी चोरीभन्दा बाहिर, यी आक्रमणहरूले डार्क वेब, इन्टरनेट फोरम र मिडिया च्यानलहरू प्रयोग गरी गलत सामग्री फैलाइरहेका छन्, जसले सरकारको साइबर सुरक्षाप्रतिको जनविश्वास कमजोर बनाइरहेको छ,” प्रतिवेदनमा भनिएको छ।

चीनको ताइवान मामिला कार्यालयले यस विषयमा कुनै टिप्पणी गरेको छैन। चीनले प्रायः ह्याकिङमा संलग्न भएको आरोप अस्वीकार गर्छ, तर उसमाथि अन्य देशहरूले नियमित रूपमा यस्तो आरोप लगाइरहेका छन्।

चीनले आफूमाथि पनि ताइवानका साइबर सञ्चालनहरूबाट आक्रमण भएको दावी गर्दै आइरहेको छ। गत शनिबार चीनले १८ जनालाई इनामको सूचीमा राखेको थियो, जसलाई उसले “विभाजनकारी सन्देश” फैलाउने ताइवानका सैन्य मनोवैज्ञानिक अफिसरहरू भएको आरोप लगाएको छ।

ताइवानको प्रतिवेदन अनुसार १० हजारभन्दा बढी “असामान्य” सामाजिक सञ्जाल खाता फेला परेका छन्, जसमा धेरै फेसबुकमा छन्। ती खाताहरूले १५ लाखभन्दा बढी गलत सूचनात्मक सन्देशहरू फैलाएका ब्युरोले जनाएको छ।

प्रतिवेदनमा भनिएको छ, चीनले आफ्नो राज्य सञ्चालित मिडिया र “अनलाइन ट्रोल सेना” लाई प्रयोग गरेर ताइवान सरकारमाथि आलोचनात्मक सामग्री फैलाउने, चीन समर्थक कथाहरू प्रवर्द्धन गर्ने र ताइवानका प्रमुख सहयोगी संयुक्त राज्य अमेरिकाप्रति अविश्वास फैलाउने कार्य गरिरहे।