नयाँ उपकरणहरू सार्वजनिक गरेको केही दिनमै अमेजनले गुमायो प्रमुख प्राविधिक अधिकारी

काठमाडौं ।

वार्षिक ‘डिभाइस र सर्भिसेस’ कार्यक्रम सम्पन्न गरेको केही दिनमै अमेजनले आफ्नो एक वरिष्ठ उपाध्यक्ष गुमाएको छ। रोयटर्सले हेरेको आन्तरिक मेमोअनुसार, डिभाइस सफ्टवेयर र सर्भिसका उपाध्यक्ष तथा सिईओ एन्डी ज्यासीलाई सल्लाह दिने उच्चस्तरीय समूह “एस–टिम” का सदस्य रोब विलियम्सले आफ्नो पद छोडेका छन् र वर्षअन्त्यसम्ममा अमेजनबाट पूर्ण रूपमा अवकाश लिनेछन्। अमेजनले सोधपुछपछि उक्त जानकारी पुष्टि गरे पनि थप विवरण दिएको छैन।

डिभाइस र सर्भिस विभागका वरिष्ठ उपाध्यक्ष पानोस पानायले मेमोमा लेखेका छन्, “रोबले हामीले सिर्जना र बजारमा ल्याएका लगभग सबै उत्पादनको सफ्टवेयर र प्रयोगकर्ता अनुभवमा ठूलो प्रभाव पारेका छन्।” उनका अनुसार विलियम्सले “अमेजनबाट अवकाश लिने निर्णय” गरेका हुन्, तर उनी भविष्यमा के गर्ने भन्नेबारे जानकारी खुलाइएको छैन।

पानायले आफ्नो विभागभित्रका केही टोलीहरू पुनर्संरचना गर्ने घोषणा पनि गरेका छन्। त्यसअनुसार, एलेक्सा स्मार्ट व्हेइकल टोलीलाई अब एलेक्साको मुख्य समूहमा समावेश गरिएको छ।

साथै, फायर टिभी उत्पादन र इन्जिनियरिङ हेर्दै आएका उपाध्यक्ष तापस रोयलाई विलियम्सको स्थानमा नियुक्त गरिएको छ। यी परिवर्तनहरू बिहीबारदेखि लागू भएका हुन्।

मेमोअनुसार, विलियम्स सन् २०२५ को अन्त्यसम्म पानायका सल्लाहकारका रूपमा र “एस–टिम” का सदस्यका रूपमा रहनेछन्।

अमेजनको २९ सदस्यीय “एस–टिम” अत्यन्त प्रतिष्ठित समूह मानिन्छ, जसका सदस्यहरूलाई सिईओसँग प्रत्यक्ष पहुँच हुन्छ। यस्तो समूहका सदस्यहरूले पद छोड्नु दुर्लभ हुन्छ। विलियम्स सन् २०२२ को अन्त्यमा उक्त टोलीमा सामेल भएका थिए र १२ वर्षदेखि अमेजनमा कार्यरत थिए।

उनी मंगलबार न्यूयोर्कमा आयोजित अमेजनको डिभाइस कार्यक्रममा पनि सहभागी थिए, जहाँ कम्पनीले नयाँ इको स्पिकर, रङीन किन्डल ई–रीडर र सुधारिएको फायर टिभी सेट जस्ता उत्पादनहरू सार्वजनिक गरेको थियो।

विलियम्सले इमेलमा आफ्नो लिङ्क्डइन पोस्टको उल्लेख गर्दै उनी वर्षभरि नै आफ्नो प्रस्थान योजना तयार गर्दै आएका र हालैका उपकरणहरूको सार्वजनिक प्रदर्शनपछि मात्र जाने निर्णय गरेका लेखेका छन्। उनले २०२५ पछिको योजनाबारे भने केही खुलाएका छैनन्।

अमेजनको डिभाइस र सर्भिस विभाग, जसले हाल घाटा ब्यहोर्दै आएको छ, पछिल्ला वर्षहरूमा बारम्बार कर्मचारी कटौती गरिरहेको छ। कम्पनीले एलेक्सा भ्वाइस असिस्टेन्टमा जेनरेटिभ एआई समावेश गर्ने बहुवर्षीय परियोजना सुरु गरे पनि यसको मुनाफाको स्पष्ट बाटो देखिएको छैन। साथै, कम्पनीले आफ्ना फायर ट्याब्लेटहरूमा पहिलो पटक एन्ड्रोइड अपरेटिङ सिस्टम प्रयोग गर्ने तयारी गरिरहेको छ।

यसै साताको सुरुमा, विलियम्सले लिङ्क्डइनमा नयाँ अपरेटिङ सिस्टम “भेगा” को घोषणा गरेका थिए, जुन आगामी फायर टिभी उपकरणहरूमा प्रयोग हुनेछ। यो नयाँ प्रणालीले गुगलको एन्ड्रोइडलाई प्रतिस्थापन गर्ने लक्ष्य राखेको छ र तीव्र गति तथा कम लागतमा सञ्चालन हुने दावी गरिएको छ।