फक्सकनको तेस्रो त्रैमासिक आम्दानीले राख्यो नयाँ रेकर्ड, बजार अनुमानभन्दा भने कम

काठमाडौं ।

विश्वकै ठूलो ठेक्का इलेक्ट्रोनिक्स निर्माता ताइवानको फक्सकनले तेस्रो त्रैमासिकमा कृत्रिम बुद्धिमत्तासम्बन्धी उत्पादनको बलियो मागका कारण रेकर्ड आम्दानी गरेको छ, यद्यपि परिणाम बजार अनुमानभन्दा कम रह्यो। कम्पनीले विनिमय दरका प्रभावबारे सावधानी अपनाउनुपर्ने पनि जनाएको छ।

एनभिडियाको सबैभन्दा ठूलो सर्भर आपूर्तिकर्ता र एप्पलको प्रमुख आइफोन असेंबलर फक्सकनले आइतबार जारी विज्ञप्तिमा भने अनुसार, कम्पनीको आम्दानी अघिल्लो वर्षको सोही अवधिको तुलनामा ११ प्रतिशत बढेर २.०५७ ट्रिलियन ताइवान डलर (करिब ६७.७१ अर्ब अमेरिकी डलर) पुगेको छ।

रोयटर्सका अनुसार यो परिणाम एलएसईजी स्मार्टएस्टिमेटले अनुमान गरेको २.१३४ ट्रिलियन ताइवान डलरभन्दा कम भए पनि कम्पनीले यसलाई ‘अपेक्षाभन्दा राम्रो’ परिणाम भएको जनाएको छ। अमेरिकी डलरका आधारमा हेर्दा, तेस्रो त्रैमासिक आम्दानी अघिल्लो वर्षको तुलनामा १६.१ प्रतिशतले बढेको कम्पनीले जनाएको छ। यस वर्ष ताइवान डलर अमेरिकी डलरको तुलनामा करिब ८ प्रतिशतले बलियो भएको छ।

एआई उत्पादनको उच्च मागका कारण फक्सकनको क्लाउड र नेटवर्किङ उत्पादन विभागको आम्दानीमा मजबुत वृद्धि भएको छ। यद्यपि स्मार्ट उपभोक्ता इलेक्ट्रोनिक्स (जसमा आइफोन पनि पर्छ) विभागको आम्दानी विनिमय दरका कारण केही घटेको कम्पनीले जनाएको छ।

सेप्टेम्बर महिनाको आम्दानी अघिल्लो वर्षको तुलनामा १४.२ प्रतिशत बढेर ८३७.१ अर्ब ताइवान डलर पुगेको छ, जुन महिनाको नयाँ रेकर्ड हो।

कम्पनीका अनुसार, “चौथो त्रैमासिकमा एआई सर्भर आपूर्ति अझ बढ्दै जाने र पश्चिमी बजारको वर्षअन्त्यको छुट्टी सिजन नजिकिँदै जाँदा, त्रैमासिक आम्दानी क्रमिक रूपमा वृद्धि हुने अपेक्षा गरिएको छ।” तर कम्पनीले थपेको छ, “वैश्विक राजनीतिक र आर्थिक परिस्थिति तथा विनिमय दरका उतारचढावको प्रभावलाई नजिकबाट निगरानी गर्न आवश्यक छ।”

फक्सकन (अधिकारिक रूपमा होन हाइ प्रेसिजन इन्डस्ट्री) ले संख्यात्मक पूर्वानुमान सार्वजनिक गर्दैन। कम्पनीले तेस्रो त्रैमासिकको नाफा नोभेम्बर १२ मा सार्वजनिक गर्नेछ।

यस वर्ष फक्सकनका सेयर मूल्य २३ प्रतिशतले बढेका छन्, जुन ताइवान बजारको १६ प्रतिशत वृद्धिभन्दा उच्च हो। राजस्व विवरण सार्वजनिक हुनु अघि शुक्रबार कम्पनीको सेयर ०.४४ प्रतिशत बढेको थियो, जबकि सूचकांक १.४५ प्रतिशतले उक्लिएको थियो।